Fərid Həşimov: "Bu cür qanunsuzluq bir çox kafe-restoran, gözəllik salonları, iaşə obyektlərinin qarşısında müşahidə olunur"
Bakı yollarında sıxlıq, bir çox hallarda "tıxac" yaradan amillərdən biri də avtomobillərin parklanması ilə bağlıdır. Bu halın qarşısını almaq üçün, qanunvericiliyin tələbinə uyğun olaraq, bir çox yerlərdə parklanma qadağan edilir və müvafiq qaydada cərimələr tətbiq edilir.
Ancaq elə ərazilər var ki, həmin yerlərdə qadağanedici işarələr olmadığı halda, müəyyən obyektlərin qarşısında dayanan şəxslər "bura bizim obyektin ərazisidir" deməklə sürücülərə avtomobil saxlamağa icazə vermir, yaxud da saxlamağa görə ödəniş tələb edirlər. Bunun üçün də ərazini zəncir və digər maneə vasitələri ilə bağlayırlar. Mağazaların, ofis və idarələrin qarşısında, şəxsi evlərin yerləşdiyi küçələrdə avtomobil saxlamaq olmur. Ya kimsə qarşına keçib "bura mənimdir" deyir, ya da xüsusi hazırlanmış "qadağandır!" nişanı ilə qarşılaşırsan. Demək olar ki, bu problemlə bütün sürücülər üzləşir. Hüququnu bilən sürücü heç kimi dinləmədən avtomobilini saxlayır, bilməyən isə…
"Kiminsə yolu zəbt etməsi, müəyyən əraziləri barmaqlıqlara alması, təbii ki, qanun pozuntusudur və bu insanlardan şikayət edildiyi təqdirdə onlar müəyyən məbləğdə cərimə edilirlər"
Mövzu ilə bağlı fikir bildirən Fərid Həşimov "Bakı-Xəbər"ə şərhində bildirdi ki, kiminsə dövlətin yolunu zəbt etmək səlahiyyəti yoxdur: "Belə hallar tez-tez baş verir. Bəzi mağaza, kafe sahibləri elə hesab edirlər ki, kafenin qarşısı, ətrafı, hətta yol belə onlara aiddir. Yol dövlətindir. Kiminsə yolu zəbt etməsi, müəyyən əraziləri barmaqlıqlara alması, təbii ki, qanun pozuntusudur və bu insanlardan şikayət edildiyi təqdirdə onlar müəyyən məbləğdə cərimə edilirlər. Sürücülər belə hallarla qarşılaşan zaman şikayət edə bilərlər. Bununla yanaşı, xüsusi həyəti olan, çəpərlənmiş idarələrin, nazirliklərin, məktəblərin həyətində kənar avtomobillərin saxlanılması qanunla qadağandır. Yol isə dövlətindir və onu qeyri-qanuni şəkildə zəbt etmək qanunu pozmaq deməkdir".
Həmsöhbətimiz onu da əlavə etdi ki, obyekt sahibi məkan qarşısındakı park yerinin ona aid olduğunu bəyan edirsə, müvafiq sənədləri təqdim etməlidir: "Əgər obyektin bu əraziyə sahib olması ilə bağlı rəsmi sənədləri yoxdursa, o zaman obyektin sahibi vətəndaşın hüquqlarını pozaraq ərazini qanunsuz zəbt edir. Belə hallarla qarşılaşdıqda vətəndaş aidiyyəti qurumlara müraciət edə bilər".
Ekspertin sözlərinə görə, bu cür qanunsuzluq bir çox kafe-restoran, gözəllik salonları, iaşə obyektlərinin qarşısında müşahidə olunur: "Ölkədə parklanma problemi yaşanır. Danılmaz faktdır ki, bu gün ölkədə park yerlərinin sayı olduqca azdır. Şəhərin müxtəlif yerlərində belə parklanma yerlərinin salınmasına ehtiyac var. Çoxmərtəbəli avtodayanacaqların sayı artırılmalıdır. Parklanma probleminin həlli üçün ilk növbədə bütün yaşayış və qeyri-yaşayış obyektlərinin parklanma yerlərinin olması zəruridir. Çoxmərtəbəli parklanma yerlərinin tikilməsi ilə bağlı konkret işlər həm şəhərin mərkəzində, həm də şəhərdən kənarda görülməlidir. Ölkədə parklanma problem olduğu halda obyekt sahiblərinin yol kənarını qanunsuz zəbt etməsi düzgün deyil. Həmin şəxslər bunu etməklə qanunu pozurlar".
Günel CƏLİLOVA
