İstirahət mərkəzlərində soyğunçuluq tüğyan edir... - qiymət hər gün dəyişir
Hər fəsildə istirahət etmək mümkün olsa da, insan daha çox yayda istirahətə ehtiyac duyur və vaxtına və "cib"inə uyğun istirahət növünü seçir. Əvvəllər ölkə əhalisi daha çox xarici ölkələrdə istirahətə meyl etsə də, son illər yerli turizm xidmətlərindən yararlananların sayı artıb.
Yay fəsli ilə əlaqədar bölgələrdə turizm sektorunda canlanma müşahidə olunur. Bu canlanma xüsusilə Qəbələ, Lənkəran, Şamaxı, Quba, İsmayıllı kimi bölgələrimizdədir. Bundan başqa, işğaldan azad olunmuş rayonlara üz tutanların da sayı az deyil. İstirahətə gedənlərin sayında nə qədər çox canlanma varsa, yerli turizmlə bağlı qiymətlər də bir o qədər bahadır. Hoteldən asılı olaraq, bu il qiymətlər, səhər yeməyi daxil, bir gecəlik 110 manatdan başlayır və 1200 manata qədər gedib çıxır. Günlük kirayə evlər də şəraitindən asılı olaraq 70-200 manat arasında dəyişir. Onu da qeyd edək ki, tez-tez sosial şəbəkələrdə bununla bağlı postlara rast gəlmək olur. Onlar xüsusən kafe, restoranlarda absurd qiymətlər təklif edilməsindən, tək çay verilməməsindən, çayın yalnız dəstgahlarla satılmasından gileylənir. Maraqlıdır, dövlət qurumlarının bu müəssisələrə müdaxilə etmək hüququ varmı?
Fuad İbrahimov: "Ölkədə turizmin baha olmasının başqa səbəbi turizm infrastrukturunun azlığı ilə bağlıdır"
İqtisadçı Fuad İbrahimov "Bakı-Xəbər"ə açıqlamasında qeyd etdi ki, quru sərhədlərin bağlı olması səbəbindən insanların seçim imkanı azalıb: "Seçim imkanı azaldıqca qiymətlər də artır. Uçuş biletləri baha olduğuna görə insanların xaricə çıxmağa imkanları azdır deyə, onlar daxili bazar imkanlarından istifadə etməyə məcbur olurlar. Buna görə daxili bazarda qiymətlər artır, çünki alternativlərin sayı azdır. Ölkədə turizmin baha olmasının başqa səbəbi turizm infrastrukturunun azlığı ilə bağlıdır. Mehmanxanaların sayı, mehmanxanalarda otaqların sayı, istirahət yerləri azdır. Bu da qiymətlərə müəyyən qədər təsir edir. Başqa bir faktor isə odur ki, sahibkarlar sui-istifadə edib çox vaxt qiymətləri qaldırırlar. Onlar bütün risqləri nəzərə alırlar və qiymətləri maksimum baha edirlər. Gələcəyi düşünərək maksimum mənfəət əldə etməyə çalışırlar".
Ramin Qafarov: "Ölkə daxilində hotellərin qiymətləri baha təqdim etməsinin əsas səbəbi rəqabət mühitinin zəif olması ilə bağlıdır"
Turizm sahəsi üzrə ekspert Ramin Qafarov "Bakı-Xəbər"ə açıqlamasında qeyd etdi ki, Azərbaycanda qiymət artımı müşahidə olunur. Daxili turizm get-gedə bahalaşır: "Azərbaycanda istirahət digər ölkələrlə müqayisədə bahadır. Hazırda rayonlarda otellər tamamilə doludur. İnsanlar baha da olsa, gedib dincəlirlər. Baxmayaraq ki, ölkəmizdə Türkiyə ilə, Gürcüstanla, hətta bəzi Avropa ölkələri ilə müqayisədə istirahət xərcləri daha bahadır".
Ekspert hesab edir ki, istirahət qiymətlərinin formalaşmasına 3 əsas xidmətin qiyməti təsir göstərir. Bunlar nəqliyyat, yerləşdirmə müəssisəsi və iaşə obyektlərinin göstərdiyi xidmətlərdir: "Azərbaycanda taksi xidmətləri münasib olsa da, aviaşirkətlərin qiymətləri çox bahadır. AZAL-ın qiymət tariflərindən narazılıq kütləvi hal alıb. Ölkə daxilində hotellərin qiymətləri baha təqdim etməsinin əsas səbəbi rəqabət mühitinin zəif olması ilə bağlıdır. Daxili turizm üzrə qiymətlərin ucuzlaşmasına nail olmaq üçün daha çox hotelçilik sahəsində, xüsusilə kənd yerlərində kiçik və orta sahibkarların imkanlarını genişləndirmək lazımdır. Bir sıra iqtisadi mexanizmləri - aşağı faizli kreditlərin verilməsi, vergi kreditlərinin tətbiqi mexanizmlərini işə salmaqla bu sahəni inkişaf etdirmək olar".
Günel CƏLİLOVA
