Müəllimlərin işə qəbulu üzrə (MİQ) müsabiqənin müsahibə mərhələsinə aid Azərbaycan və rus bölməsi üzrə mövzular hazırlanıb. Bu barədə Təhsil İnstitutu məlumat yayıb.
Qeyd edilir ki, müsahibə zamanı namizədlərin peşəkar kompetensiyaları, psixoloji hazırlığı və ümumi dünyagörüşü müsahibə proqramına uyğun olaraq müvafiq komissiya tərəfindən yoxlanılacaq.
Bildirilir ki, MİQ imtahanlarında ümumtəhsil proqramı üzrə minimun 34 bal və tədris metodikası üzrə minimum 6 bal olmaqla, ümumi 40 bal və daha yüksək nəticə göstərən namizədlər vakant yerlərin seçiminə buraxılıblar.
İyulun 31-də başlayan vakansiya seçimi avqustun 5-i saat 11:00-dək davam edib. Namizədlərə 8 vakant yer seçə bilmək imkanı verilib.
Namizədlərin vakant yerlərə yerləşdirilməsi onların elektron ərizədə qeyd etdikləri ardıcıllığa əsasən aparılıb.
2024-2025-ci tədris ili üzrə müəllimlərin işə qəbulu müsahibə mövzuları (Azərbaycan bölməsi) təqdim edilib.
Siniflər üzrə təqim edilən Azərbaycan dili və ədəbiyyat mövzuları:
Oxu bacarıqlarının formalaşdırılması (V-XI)
Rəsmi sənədlərlə işgüzar sənədlərin tərtibinə verilən ortaq cəhətlər (V-XI)
Bədii ədəbiyyatın qollarının (yazılı, şifahi) oxşar və fərqli cəhətləri (V-XI)
Bədii əsərlərin mövzu və ideya anlayışı (V-XI)
Tabesizlik əlaqələrinin işlənmə məqamları (VIII-IX)
İbtidai siniflər üzrə mövzular:
Ölçmə bacarığının formalaşdırılması (I-IV)
Rabitəli nitq bacarığının formalaşdırılmasdı (II)
Oxuyub-anlama bacarığının yazı bacarığı ilə əlaqələndirilməsi (III)
Dinləyib-anlama bacarığının yazı bacarığı ilə əlaqələndirilməsi (IV)
Onluq kəsirlərlə işin təşkili (IV)
Qeyd etdiyimiz kimi, MİQ imtahanlarının müsahibə mərhələsində Azərbaycan dili və ədəbiyyat, ibtidai sinif müəllimləri üçün müsahibənin mövzuları müəyyənləşib. Ekspertlərin bu mövzuların hər iki blokda ümumi dəyərləndirilməsi çox vacibdir.
Bu mövzular nə dərəcədə dəqiq və ehtivalı seçilib? Yəni bunların əsasında aparılan müsahibə həqiqətən də yüksək səviyyəli müəllimin ortaya çıxarılmasına nə dərəcədə kömək edir? Bəlkə bu sırada unudulmuş mövzular var, kimsə hesab edir ki, daha vacib mövzular salmaq olar, bu mövzular o dərəcədə əhəmiyət kəsb etmir. Biz bunu deyə bilmərik, amma buna təhsil mütəxəssisi öz rəyini bildirə bilər. Bunu bloklar üzrə ekspertlər necə dəyərləndirə bilər? Beş-altı mövzu nə qədər dəqiq və ehtivalı seçilib? Yaxud ibtidai sinif müəllimlərinin seçimi bu mövzular bloku üzrə aparılarkən nə dərəcədə dəqiq seçilir? Bunu ümumi şəklildə necə dəyərləndirmək olar? Bəlkə daha başqa mövzulara ehtiyac vardı?
Məzahir Məmmədli: "...Hazırlanan sualların içində müəllimə aid olmayan suallar da var"
Tanınmış təhsil eksperti Məzahir Məmmədli "Bakı-Xəbər"ə şərhində bildirdi ki, qoyduğumuz suallar həm aktualdır, həm də günün tələbləri ilə əlaqədardır. "Müəllimlərin müsahibə mərhələsi üçün müəyyən olunmuş mövzular var. Bu, müsahibə götürənlərin kifayət qədər məhdud olmasıdır. Bu müsahibə mərhələsi üçün xüsusi genişləndirilmiş komissiya yoxdur. Hər müsahibə qrupunda iki-üç nəfər şəxs əyləşir. Bunlar bəzən subyektiv fikirlər söyləyirlər. Xüsusi kurs müəyyənləşib, müəllimlədən müsahibə götürənlərin də özlərinin fərdi maraqları güc gəlir və orda yaranan əlavə sualları da səsləndirirlər. Amma bütün hallarda bu müsahibə mərhələsi, hər il olduğu kimi, yenə də müəyyən gərginliklər, narahatlıqlar yaradır. Bu narahatlıq onunla bağldır ki, testdən fərqli olaraq, müəllim sorğu-suala çəkilir. Test sualları belədir ki, müəllim texnika ilə baş-başa qalıb öz bilik və bacarığını ortaya qoya bilir. Amma müsahibə mərhələsində fərdi yanaşmalar müəllimləri müəyyən qədər sıxır. Onu həmişə əsas gətirirlər. İnanmıram ki, məqsədli şəkildə kimisə sıxışdırıb vəziyyətdən çıxarmaq təşəbbüsü olsun. Amma sadəcə olaraq, vəziyyət elədir ki, hazırlanan sualların içində müəllimə aid olmayan suallar da var. Biz sonrakı müzakirələrdə bunu görürük, bəzən elə suallar qoyulur ki, bunu müəllimin bilməməyi qəbahət deyil. Başqa bir tərəfdən, səsləndirilən fikirlər də var. Müəllimin müəyyən mərhələlərdən keçməli olduğunu deyirlər. Amma bunun o qədər də tərəfdarı deyiləm. Müəllimlərin xüsusilə sual atəşinə tutulması yaxşı hal deyil. Bunun bilik və bacarığı kifayət edirsə, təcrübə də qazanılır. Bu müəllim hələ sinfə girməyibsə o təcrübəni necə, hardan qazansın?".
M.Məmmədli hesab edir ki, suallar müəllimlərin bilik və bacarığını müəyyən etmək istiqamətində qurulmalıdır, əlavə suallara, yersiz tələblərə ehtiyac yoxdur. "İndi təklif var ki, müəllimlərin məhkumluğu ilə bağlı da bu məsələdə bir rəy alınsın. Şəxsən bunun tərəfdarı deyiləm. Bir insanın hansısa xətası olubsa, buna görə, yaxud məhkəmələrin ədalətsiz qərarları üzündən məhkum olunubsa, bəyəm o müəllim ola bilməz? Niyə? Mən bu cür fikirləri o qədər də səmimi saymıram. Əgər müəllim MİQ imtahanının test mərhələsindən keçibsə, onu bu qədər sıxışdırmağa, çətin-çətin suallar tərtib etməyə ehtiyac yoxdur. Heç ondan əlavə tələblər də edilməməlidir"-deyə M.Məmmədli qeyd etdi.
Elçin Əfəndi: "...Bunu faktiki olaraq nazirlik və tabeli qurumlar müəyyən dəqiqləşmə əsasında təyin ediblər"
Digər təhsil eksperti Elçin Əfəndinin məsələyə münasibəti belə oldu: "Müsahibə mövzuları təyin olunubsa bunu faktiki olaraq nazirlik və tabeli qurumlar müəyyən dəqiqləşmə əsasında təyin ediblər. Biz ilk növbədə müsahibədə bütün mövzular üzrə hər kəsin bilik və bacarığını yoxlaya bilmirik. Amma onlar test və müsabiqə mərhələsində suallar üzərindən yoxlanılıblar. Sadəcə, müəyyən mövzular var ki, o mövzularda suallar verilib cavablar alınacaq. Fikrimcə, müsabiqədən keçən müəllimin müsahibədə də müəyyən sualları cavablandırmağı kifayət edər ki, əmək fəaliyyətinin başlanmasına qərar verilsin. Zatən, işin gedişində onların müvafiq olaraq bilik və bacarıqları yoxlanılıb. Beş il sonra da sertifikasiyaya cəlb olunacaqlar, onların bilik və bacarıqları yenə də yoxlanılacaq".
İradə SARIYEVA
