Naxçıvan Muxtar Respublikasının Babək şəhər Nehrəm kəndində yaşayan S.İsmayılov adına 1 saylı orta məktəbin ibtidai sinif müəllimi, "Əməkdar müəllim" Mehdiyeva Xuraman Məhiyyədin qızı qəzetimiz vasitəsilə Prezident İlham Əliyevə müraciət edib.
X.Mehdiyeva ölkə başçısından ona Prezidentin "fərdi təqaüdünün" verilməsini xahiş edir. Səhhəti ilə əlaqədar problemlər yaşadığını yazan "Əməkdar müəllim" bildirir ki, bu təqaüdə böyük ehtiyacı var.
X.Mehdiyevanın yazdığına görə, o, 1982-ci ildə Y.H. Məmmədəliyev adına Naxçıvan Pedaqoji İnstitutunun tarix fakültəsə qəbul olunub, 1987-ci ildə həmin ali məktəbi müvəfəqqiyətlə bitirib. "1984-cü ildən etibarən Naxçıvan Muxtar Respublikasının Babək şəhər S.İsmayılov adına 1 saylı orta məktəbdə fəaliyyətə başlamışam və 40 (qırx) ildən çoxdur ki, həmin məktəbdə ibtidai sinif müəllimi kimi fəaliyyətimi davam etdirirəm.
Mənim vətənə, torpağa, xalqa, dövlətə olan sevgim sonsuz olduğundan, şagirdlərin elmi dünyagörüşlərinin formalaşmasında və onlara elmin sirlərinin öyrədilməsində peşəkar fəaliyyətimi, pedaqoji ustalığımı layiqincə yerinə yetirərək dövlətimizə, xalqımıza xidmət edərək, ona həmişə sadiq olmuşam".
X.Mehdiyeva yazır ki, müəllim olaraq həmişə peşəsi ilə qürur duyub, xalqımızın şərəf daşıyıcısı olan müəllim peşəsini həmişə uca tutub. "Mən nümunəvi, tələbkar müəllim olmaqla yanaşı, yüksək əxlaqi-mənəvi dəyərlərin örnəkçisi olub, peşə fəaliyyətimi layiqincə və ciddi məsuliyyətlə icra edib, qabaqcıl müəllim olaraq həmişə tərifnamə və təltiflərə layiq görülmüşəm.
Eyni zamanda 11 mart 2022-ci il tarixində müəllimlərin sertifikatlaşma imtahanında yüksək nəticə göstərərək dövlət ümumtəhsil müəssisələrində pedaqoji fəaliyyətimi davam etdirmək hüququ qazanmışam.
Odur ki, buna rəğmən Prezident İlham Əliyevin 2018-ci il tarixli 520 nömrəli sərəncamı ilə "Əməkdar Müəllim" fəxri adına layiq görülmüşəm. Bu mənim peşə fəaliyyətimə verilən ən böyük, ən qiymətli dəyərdir!"
Əməkdar müəllim yazır ki, mərhum Prezident Heydər Əliyevin Nehrəm kəndinə tarixi gəlişinin təşkilatçılarından biri olub və bununla qürur duyur.
Prezident İlham Əliyevin daxili və xarici siyasətini dəstəklədiyini qeyd edən müəllimə "Prezident İlham Əliyevin düşünülmüş və diplomatik siyasi uzaqgörənliyi nəticəsində müqəddəs Qarabağ torpağı işğaldan azad olundu. Bu danılmaz faktdır ki, 200 (iki yüz) ildə heç bir dövlət xadiminin elə bilmədiyi tarixi gerçəkliyi cənab perzident İlham Əliyev reallaşdırıb, bu sevinci, bu xoşbəxtliyi bizə yaşadıb...
Çox məmnunam ki, bu sevincdə bizim ailəmizin də payı var. Oğlum Mehdiyev Emin Azər oğlu yüksək rütbəli zabit olaraq Kəlbəcər rayonunun N saylı hərbi hissəsində xidməti vəzifəsinin icrasındadır. O, 2016-cı ildə Lələtəpə uğrunda gedən döyüşlərin və antiterror əməliyyatlarının iştirakçısı olub".
X.Mehdiyeva yazır ki, oğlu qüsursuz xidmətə görə bir sıra tərifnamə və təltiflərə layiq görülüb. O qeyd edir ki, kürəkəni Həmzəyev Tural Baba oğlu da Xocavənd rayonunda N saylı hərbi hissədə xidmət edir.
"Onu da nəzərinizə çatdırım ki, səhhətimdə kifayət qədər ciddi problemlər yaranıb, hərəkət etməkdə çətinlik çəkirəm"-deyə yazan X.Mehdiyeva ölkə başçısından ona Prezidentin "fərdi təqadünün" verilməsini xahiş edir. "Xahiş edirəm ki, yuxarıda sadalananları nəzərə alaraq, Azərbaycan Respublikası Prezidentinin 11 iyun 2022-ci il tarixli 715 saylı Fərmanına və "Dövlətin ən ali varlığı insanlar, onun təməli ədalətdir" prinsipini ön plana çəkərək "İnsan və vətəndaş hüquqlarının təmin edilməsi sahəsində tədbirlər haqqında"22 fevral 1998-ci il tarixli 678 saylı Azərbaycan Respublikası Prezidenti mərhum H.Əliyevin imzaladığı fərmana əsasən mənə Azərbaycan Respublikası Prezidentinin "fərdi təqadünün" verilməsi haqqında sərəncam versəsiniz" - deyə X.Mehdiyeva müraciətində qeyd edib.
İradə SARIYEVA
