Özəl məktəblərdə qiymət qalxdı - valideynlər ciddi təlaşda...
Nizami Hüseynov: "Özəl məktəblərin təhsil haqqının rəsmi olaraq tənzimlənməsinə ehtiyac var"
Yeni tədris ilinin başlamasına 1 ay yarım qalsa da, özəl məktəblərdə şagird qəbulu prosesi başlayıb. Bəzi valideynlər özəl məktəblərdə təhsil və tədris səviyyəsinin dövlət məktəblərinə nisbətən daha yüksək olduğunu düşünür və buna görə özəl məktəblərə üstünlük verirlər.
Lakin hazırda özəl məktəblərdə uşaq oxutmaq hər kəsə nəsib olmur. Çünki orta məktəblərin təhsil haqları ali məktəblərdən dəfələrlə yüksəkdir. Hətta bəzilərində məktəbli forması, nəqliyyat xidməti, nahar təhsil haqqına daxil edilmir.
Qeyd edək ki, özəl orta məktəblərdə təhsil haqqı siniflərə və azərbaycan, ya xarici dilli tədrisə görə fərqlənir.
Məlumata görə, artıq bəzi özəl məktəblər indidən təhsil haqqını qaldırıb, hətta bununla bağlı məlumat da yayılıb.
Erudit liseyində bütün siniflər üçün illik təhsil haqqı 6000 manatdır. Keçən il bu məktəbdə təhsil haqqı 5000 manat olub.
Hədəf liseyinin Bakı filialında illik təhsil haqqı 5000-9000 manat, Abşeron filialında isə 4000-7500 manat arasındadır.
Zirvə liseyindən bildirilib ki, yeni tədris ilində illik təhsil haqları 2900-8670 manat arasında dəyişəcək.
Müasir İnnovasiyalar Liseyində isə 5000-8500 manat illik təhsil haqqı olacaq.
"Landau School"da 3800-12900 manat arasında olan təhsil haqqı ötən il 5800-10000 manat arasında idi.
Bakı Atatürk Liseyinin Nərimanov filialında 4500 manat, 28 May filialında 2500 manat təhsil haqqı nəzərdə tutulub.
Bakı Oxford Məktəbində isə bu il qiymətlər 16800-17500 manat arasında olacaq.
Britaniya məktəbində isə illik təhsil haqqı siniflərə görə 12000-14000 manat arasında olacaq.
Qeyd edək ki, özəl məktəblərdə təhsil haqqı mütəmadi olaraq qalxır. Maraqlıdır, bu sahə necə tənzimlənməlidir?
"Təhsilin özəl sektorunu əlçatan etmək üçün təşkilati və stimullaşdırıcı tədbirlər həyata keçirilməlidir"
Təhsil eksperti Nizami Hüseynov "Bakı-Xəbər"ə açıqlamasında bildirdi ki, özəl məktəblərin təhsil haqqının rəsmi olaraq tənzimlənməsinə ehtiyac var: "Azərbaycanda özəl məktəblərin qiyməti çox bahadır. Xarici ölkələrlə belə qiymət müqayisə oluna bilməz. Bu səbəbdən də hesab edirəm ki, özəl məktəblərin də təhsilhaqlarının tənzimlənməsinə ciddi ehtiyac var. Özəl məktəblər qiymətin baha olmasını onunla əsaslandırırlar ki, müəllimlərin maaşı yüksəkdir, dərslikləri xaricdən alırlar və s. Araşdırsaq görərik ki, həmin təhsil müəssisələrində çalışan müəllimlər 10-20 min əmək haqqı almır".
Ekspert hesab edir ki, təhsilin özəl sektorunu əlçatan etmək üçün təşkilati və stimullaşdırıcı tədbirlər həyata keçirilməlidir.
Həmsöhbətimiz onu da əlavə etdi ki, Azərbaycanda illik təhsil haqqı 50-60 min manata qədər olan özəl liseylər var: "Buraxılış və qəbul imtahanlarının nəticələrini təhlil edəndə görürük ki, həmin məktəblərin nəticələri heç də regiondakı məktəblərin nəticələrindən üstün deyil. Hətta bəzi bölgə məktəblərinin göstəriciləri onlardan daha yuxarıdır. Burada digər üstün tərəflərdən biri özəl liseylərin beynəlxalq imtahanları ilə bağlıdır. Lakin biz bu xərcləri də hesablasaq, heç də bu qədər yüksək qiymətlər alınmır. Etiraf etmək lazımdır ki, özəl məktəblər yalnız varlılar üçündür. Çünki bu məktəbləri yaradan sahibkarlar kommersiya məqsədilə bu addımı atıblar. Rəqabət olmadığına görə qiymətlər də fantastikdir. Demək olar ki, hamısında standart qaydalar tətbiq olunub. Yəni kreativ və fərqli metodlar yoxdur".
Günel CƏLİLOVA
