Dövlət İmtahan Mərkəzi ixtisas seçiminin keçiriləcəyi tarixi açıqlayıb. Belə ki, ali təhsil müəssisələrinə qəbul olmaq üçün müsabiqə şərtlərini ödəyən abituriyentlərin (həmçinin subbakalavrların) ixtisas seçimi 9-19 avqust tarixlərində aparılacaq.
Danılmaz faktdır ki, ixtisas seçimi qəbul imtahanının ən vacib mərhələsi sayılır. Məlumatlara görə, bu il abituriyentlər arasında rəqabətin güclü olacağı deyilir. Bu səbəbdən də valideynlər və abituriyenlər ixtisas seçimi zamanı bir yox, yüz düşünməlidir. Adətən valideynlər ixtisas seçimi zamanı övladlarının istəyi və bacarığına uyğun deyil, öz arzuladıqları ixtisaslar üzrə seçim edirlər. Məlumata görə, ixtisas seçimini bazar alverinə çevirənlər var. Belə ki, seçim üçün valideynlərdən 200-250 manat pul tələb olunur. Qeyd edək ki, əvvəllər ixtisas seçimi ölkənin hər yerində pulsuz olurdu. Bunu ya müəllimlər edirdi, ya valideynlər. Ancaq indi elə vəziyyət yaranıb ki, bu iş bəzi şəxslər tərəfindən həyata keçirilir.
Maraqlıdır, bu sahədə yaşanan problem necə həll olunmalıdır?
Elşən Qafarov: "İxtisas seçimi ilə bağlı konsaltinq xidmət sahələri fəaliyyət göstərir, onlar da müəyyən vəsait qarşılığında…"
Təhsil eksperti Elşən Qafarov "Bakı-Xəbər"ə şərhində bildirdi ki, ixtisas seçimi ilə bağlı konsaltinq xidmət sahələri fəaliyyət göstərir: "Müəyyən insanlar var ki, ixtisaslaşmanı gözəl bacarır və əməklərini təklif edərkən müəyyən vəsait tələb edir. Konsaltinq xidmət sahələri bir çox ölkələrdə də fəaliyyət göstərir, qiymət də bazara uyğun formalaşır.
Onu da deyim ki, hər bir uşağın bacarığını ən yaxşı müəllimi təyin edir. Yaxşı olar ki, ixtisas seçimini repetitorluqla məşğul olan müəllimlər etsin".
Cavanşir Əliyev: "Bəzi müəllimlər bilərəkdən valideynlər arasında narahatlıq, qorxu yaradır ki, onlar ixtisas seçimini həmin şəxsə etdirsin"
Təhsil eksperti Cavanşir Əliyev "Bakı-Xəbər"ə şərhində qeyd etdi ki, ixtisas seçimi elə nüansdır ki, tələbənin həyatı həll olunur: "Bu məqamda düzgün, ağıllı qərar qəbul etmək, öz istəyi ilə bərabər mövcud müsabiqə vəziyyətinin reallıqlarını – ixtisaslar üzrə plan yerlərini, müsabiqədə iştirak edən abituriyentlərin imtahan nəticələrinin bal intervalları üzrə paylanmasını, öz fərdi imtahan göstəricilərinin bu sıralamadakı yerini nəzərə almaq lazımdır. Həmçinin ötən illərin tələbə qəbulu müsabiqəsində ayrı-ayrı ixtisaslar üzrə formalaşmış keçid ballarını nəzərə almaq seçimin uğurlu olmasına müsbət təsir göstərə bilər. Bəli, bu gün bir qrup şəxslər ixtisas seçimi ilə məşğul olur. Onlar bunun üçün valideyndən müəyyən məbləğdə pul tələb edir. Bunun üçün valideynlərdən 150-250 manat istənilir. Ancaq ixtisas seçimi elə də çətin proses deyil ki, gedib hansısa şəxsə 250 manat verəsən. Abituriyentin topladığı bala əsasən ixtisas seçilir. Sadəcə, bəzi müəllimlər bilərəkdən valideynlər arasında narahatlıq, qorxu yaradır ki, onlar ixtisas seçimini həmin şəxsə etdirsin".
Günel CƏLİLOVA
