"Sənətkarları millətin tanınan simvoluna çevirmək olmaz!"
Azərbaycan mətbuatı, sosial media, sosial şəbəkə platformalarını, ayrı-ayrı şəxslərə, KİV-lərə aid Youtube kanallarını bir həftədir ki, xalq artisti Ağadadaş Ağayevlə bağlı insident zəbt edib. Haranı açırsan ordan A.Ağayevin əlində balta təsvir edilmiş görüntüsü, kollajlar, fotolar çıxır. Balta olayını nə qədər fırlatmaq olar, nə qədər gündəmdə saxlamaq olar? Anlamaq çətindir.
Sanki biriləri bu olayı gündəmdə saxlamaqdan, onu trendə çevirməkdən həzz alır. Belə olmasaydı, bu hadisə günlərlə sosial mediada, sosial şəbəkələrdə, kanallarda trendə çevrilməzdi. Bu olayı o qədər qurdalayıb şitini-şorunu çıxarıblar ki, adam çiyrənir. Məsələyə hüquqi müstəvidə qiymət veriləcək, günahkar cəzasını alacaq, amma bunu bu qədər gündəmdə saxlamağa nə ehtiyac var? Gündə olayla bağlı yeni bir "detal" çıxarırlar meydana. Bu kimin üçün maraqlıdır ki?
Xalq artistinin hərəkətinə necə baxırsız? Bu hadisənin mediada gündəm trendinə çevrilməsi doğrudurmu? Cəmiyyətimizin informasiya zövqü niyə bu gündədir və günahkar kimdir? Onun xalq artisti olmasını niyə xüsusi qabardırlar? Mədəniyyət - incəsənət xadimləri ilə mənəvi-əxlaqi mövzuda xüsusi maarifçilik işi aparmağa ehtiyac varmı?
Mədəniyyət-incəsənət xadimlərini millətimizin tanınma simvoluna çevirmək nə dərəcədə risqlidir?
"Bezdim artıq Ağadadaş mövzusundan..."
Bu sualları tanınmış yazıçı və ictimai xadim Xeyrəddin Qocaya ünvanladıq. X.Qoca qeyd etdi ki, bu məsələnin sosial medianı, saytları, Youtube kanallarını zəbt etməsi müsbət hal deyil. "Bezdim artıq Ağadadaş mövzusundan. Hara baxırsan bundan danışırlar" - deyən X.Qoca daha sonra qeyd etdi: "Həmin əhvalatdan indiyədək 100-dən çox adamın bu məsələyə münasibətini dinləmişəm. Əhvalatı saqqız kimi çeynəyirlər. Hərə özünü göstərir, demək istəyirlər ki, bunlar da nə isə bilirlər!
Hüquq-mühafizə orqanları var, hüquq elmi var, kiminsə məsələyə münasibət bildirməsi heç nəyi dəyişməyəcək!
Mediada gündəm trendinə çevrilməsi də yersizdir! Görünür, bizim saytlar səhifələri doldurmağa material tapmırlar!...
Cəmiyyətin informasiya zövqü ona görə bu gündədir ki, yazı-pozunun nə olduğunu bilməyənlər hərəsi bir sayt açıb, cəmiyyəti pis tərəfə yönləndirilir. Düz 6 aydır oxuyuram ki, qar yağacaq, dolu düşəcək. Nə qar yağır, nə dolu düşür! Belə xəbərləri oxunuş sayı çox olsun deyə yazırlar! Bir ildir hər gün yazırlar ki, "pensiyalar artacaq". Məlum olur ki, hələ pensiyaların artmasından xəbər yoxdur!
Ağadadaşın xalq artisti olmasını qabardanlar sənətin, sənətkarın necə olmasını bilməyənlərdir! Dünyada belə şeylərə baxmırlar. Təqsirkar kimdirsə, cəzasını alır.
Sənətkarlar elə bilirlər ki, onlar hamıdan ağıllıdırlar, belə isə onlar xalqın qarşısında getməlidirlər. Həyat göstərir ki, bu belə deyil!
Sənətkarları millətin tanınan simvoluna çevirmək olmaz! Onlar xalqın hörmətini özləri qazanmalıdırlar və şəxsiyyət olmalıdırlar. Nə boyda sənətkar olursansa ol, şəxsiyyət olmasan unudulacaqsan!" - deyə X.Qoca bildirdi.
İradə SARIYEVA
