Elman Rüstəmov "Premium Bank" vasitəsilə faktiki olaraq Mərkəzi Bankdan 2,5 milyon manat məbləğində kredit götürüb. Heç bir gəliri olmayan şəxsin adına və məlumatsız digər vətəndaşın əmlakını qanunsuz girov qoymaqla. İndi də "Premium Bank" həmin əmlaka göz dikib ki, pulumu verin. İşə Yasamal rayon Məhkəməsinin hakimi Ayşən Sultanova-Məmmədova baxır.
Bunu vəkil Əkrəm Həsənov bildirib. Onun sözlərinə görə, uzun fasilədən sonra sabah növbəti iclas olacaq: "Bankdan kredit dosyesini tələb edirəm ki, gətir görək bu krediti necə vermisən, gətirmir, qorxur. Hakimə vəsatət verirəm ki, dosyeni bankdan tələb etsin, təmin etmir. İndi əmlakı ondan xəbərsiz girov qoyulmuş və mənimsənilməsi təhlükəsi olan vətəndaş haqqını necə tələb etsin? Ay bank, qanuni kredit vermisənsə, niyə sənədləri gizlədirsən? Ay hakim, kredit üzrə işə sənədləri görmədən necə baxıb qərar verəcəksən?"
Biz bu məsələ ilə bağlı təfərrüatı daha ətraflı öyrənmək üçün vəkillə əlaqə saxladıq.
Əkrəm Həsənov: "Bu pullar heç bir gəliri olmayan şəxslərə verilib"
Hüquqşunas Əkrəm Həsənov "Bakı-Xəbər"ə açıqlamasında bildirdi ki, vətəndaş Nizami Kərimov yeni yaşayış obyekti alıb və restoran kimi işlətməyə başlayıb: "Ancaq alınan obyekt tikintisi başa çatmayan binada olduğu üçün, çıxarışı olmayıb. Elman Rüstəmovun biznes şəriki olan tikinti şirkətinin rəhbərləri öz adlarına çıxarış ediblər. İki bank – "Deka" və "Premium"dan hərəsindən iki milyon yarım kredit götürüblər. Əslində isə Mərkəzi Bankdan götürülən pullar heç bir gəliri olmayan şəxslərə verilib. Eyni zamanda bunu biznes krediti kimi yox, istehlak krediti kimi veriblər. Bu krediti də 4 faizlə bir illik müddət sonunda qaytarmaq şərti ilə veriblər. Həmin obyekt də bu üç bank qarşısında girov qoyulub və bundan əmlak sahibinin də xəbəri yoxdur. Krediti götürən adamlar sonradan həbs olunur. Onlar bu etdiklərini inkar etsələr də, krediti Elman Rüstəmovun götürdüyünü deyiblər. Pul da geri qayıtmadığına görə, "Deka", "Premium" və Mərkəzi Bank həmin bu əmlakı tələb edir. Biz də məhkəmədə bildiririk ki, kredit vermisizsə hansı sənədləri tələb etmisiniz? Mən müdafiə etdiyim vətəndaş Nizami Kərimov məhkəməyə verib və udub ki, əmlak onundur. Buna baxmayaraq, iş məhkəmədə gedir və bu üç bank deyir ki, biz kredit götürənə inanmışıq. Biz də onlara bildiririk ki, inanmısızsa, Mərkəzi Bankın təlimatına uyğun olaraq, bankların kredit verərkən tələb edəcəyi kredit dosyesini gətirin, baxaq. Onlar da bu sənədləri gətirmirlər. Əgər bu sənədlər gəlsə, orda ilk növbədə bilinəcək ki, onlardan kredit götürən adamların gəliri yoxdur. İstənilən bir bankda min manat götürmək üçün gəlir tələb edəcəklər sizdən. İki milyon yarımı gəliri olmayan bir adama necə verə bilərlər? Girov qoyulan əmlaka baxış keçirilməlidir. Onlar baxışa gəlsəydi, görəcəkdilər ki, əmlak Nizami Kərimova aiddi, adlarını rəsmiləşdirdikləri şəxsə yox. Onlar da indi bunu gizlədirlər və sənədləri üzə çıxarmırlar. Məhkəmə də bizim vəsatətimizi qəbul etmir. Çünki məhkəmə də onlara kömək edir və bilir ki, sənədlər yoxdur. Sənədlər ortaya çıxsa bilinəcək ki, sözügedən banklar Mərkəzi Bankın birbaşa göstərişi ilə qanunsuz, saxta kredit verib".
Elçin Qurbanov: "Uzun müddət ölkənin pul siyasətini müəyyən edən təşkilatın başında dayanan şəxs tərəfindən belə dəhşətli hadisənin törədilməsi ağılagəlməzdir"
İqtisadçı Elçin Qurbanov isə qəzetimizə açıqlamasında bildirdi ki, onun bu hadisə barəsində məlumatı yoxdur: "Ola bilsin ki, mətbuata sızan məlumatlar tam deyil, amma ictimaiyyətə sızan məlumatlar əsasında onu demək olar ki, 2.5 mln manat məbləğində kredit xüsusi portfelə aiddir. Kredit məsələləri qanunvericiliklə müəyyən edilmiş prudensial normativlərə və tələblərə uyğun çərçivədə bankçılıq fəaliyyətinin əsas istiqamətlərindən biridir. Banklar haqqında Azərbaycan Respublikası Qanununa əsasən, bank krediti - bağlanmış müqaviləyə uyğun olaraq qaytarılmaq, müəyyən müddətə və faizlər və ya müqavilədə göstərilən digər ödənişlər ödənilmək şərti ilə, təminatla və ya təminatsız müəyyən məbləğdə borc verilən pul vəsaitidir. Belə iri həcmli bank kreditinin əldə edilməsi üçün ciddi sənədləşmələr tələb olunur. Girov qoyulan əmlakın qiymətləndirilməsi, sığorta, vəsaitin sığortası və digər prosedurlar belə nəticələrə görə prosesdə iştirak edən digər təşkilatlar üçün də məsuliyyət yaradır. Burada qiymətləndirici təşkilat, sığorta şirkətləri, bank əməkdaşları, girovda olmayan əmlakın Əmlak Məsələləri üzrə Reyest Xidmətinin girov kimi qeydiyyata alınmasında iştirak edən digər şəxslər mütəşəkkil şəkildə məsuliyyətə cəlb olunmalıdır. Məsələni birtərəfli qiymətləndirmək olmaz. Bəzən tərəflər bilərəkdən belə hallara yol verə bilər. Əvvəlcədən tərəflər arasında razılaşma olur. Sənədlər tam şəkildə toplanmır, imzalar və sənədlər saxtalaşdırılır ki, mübahisələr məhkəmələrdə həll oluna bilməsin. Uzunmüddətli kredit müqaviləsi üzrə icra edilməyən öhdəliklərin icrası barədə müvafiq bildirişlər gəlməlidir. Maraqlıdır, işdə zərərçəkmiş kimi çıxış edən şəxsin hadisədən qəfil xəbər tutması necə baş verib?
Mən Rusiyadan saxta yolla əldə olunmuş notarial etibarnamə ilə Azərbaycanda vətəndaşların əmlakının girov qoyularaq kredit götürülməsi kimi dələduzluq hallarına rast gəlmişəm. Bu hadisələr mülki qanunvericilikdə boşluqların və cəmiyyətdə mənəvi aşınmanın yüksək səviyyəsinin göstəricisidir. Uzun müddət ölkənin pul siyasətini müəyyən edən təşkilatın başında dayanan şəxs tərəfindən belə dəhşətli hadisənin törədilməsi ağılagəlməzdir. Təəssüf ki, hüquq -mühafizə orqanları dələduzluq və mənimsəmə hallarına mötədil münasibət sərgiləyirlər. Azərbaycan belə cinayətlər üçün geniş areal yaratmamalıdır. Belə cinayətlərin həddindən artıq çoxalması cinayət qanunvericiliyinin daha da sərtləşdirilməsi üçün zərurət yaradır. Mən bu problemi çoxdan səsləndirmişəm".
Məhəmmədəli QƏRİBLİ
