Tural İrfan: "Bu qədər qan hara gedir, kimlər onu satır, bu çox qaranlıqdır"
Hər il ənənəvi olaraq Aşura günündə qanvermə aksiyası keçirilir. Bu il Aşura günü keçirilən qanvermə aksiyası zamanı Bakı şəhəri üzrə 1378, respublikanın digər şəhər və rayonları üzrə isə 935 nəfər könüllü olaraq qan verib. Rəsmi məlumata görə, bu şəxslərdən ümumilikdə 1040 litr qan tədarük olunub.
Dediyimiz kimi, son bir neçə ildir ki, ənənəvi olaraq könüllü qanvermə aksiyası keçirilir. Əlbəttə, bu çox müsbət haldır və qana ehtiyacı olan insanların həyatının xilas edilməsi baxımından təqdirəlayiqdir.
Aidiyyəti qurumlar hər zaman bildirirlər ki, tədarük edilən qan ölkəmizin qan bankına təhvil verilir və bu qan xəstələrə pulsuz verilir.
Amma təəssüf ki, sosial şəbəkə istifadəçiləri, vətəndaşlardan çox zaman bunun əksini eşidirik. Yəni Aşurada toplanan qan xəstələrə təmənnasız verilmir. Belə iddialara son qanvermə aksiyasından sonra sosial şəbəkələrdə rast gəlinir. Maraqlıdır, əksər sosial şəbəkə istifadəçiləri bu qanın ehtiyacı olan xəstələrə pulsuz verildiyinə şübhə ilə yanaşır.
Bəzi məlumatlara görə, bu qan genetik xəstəlikləri olanlara pulsuz verilir. Əksər istifadəçilər qeyd edirlər ki, qan lazım olanda onlara "özünüz donor tapın, qan yoxdur" deyirlər.
Bir sözlə, Aşurada insanlardan götürülən qanın təmənnasız olaraq xəstələrə çatdırılması məsələsində ciddi şübhələr var. Qeyd etdiyimiz kimi, sosial şəbəkələrdə səsləndirilən fikirlərə görə, guya bu qan xəstələrə verilmir pulla satılır. Əksər vaxtlarda qan Bankına müraciət edən vətəndaşlara "yoxdur" cavabı verilir. İddialara görə, bu qana haram əl uzanır. Kifayət qədər ciddi adamlar yazıb soruşurlar ki, bu qan xəstələrə verilmirsə bəs hara gedir?
Təbii ki, rəsmi qurumların açıqlamalarında bu qanın aidiyyəti üzrə xəstələrə verildiyi deyilir.
Biz bu məsələnin mənəvi tərəfini araşdırıb öyrənmək istədik.
"Ehsan olaraq verilən bu qanları satmaq haramdır"
Tanınmış ilhahiyyatçı Tural İrfan "Bakı-Xəbər"ə "Ümumiyyətlə, əgər bir şey ehsan edilirsə, ianə edilirsə gərək o şey camaata təmənnasız verilsin. İstər qan, istərsə də başqa vasitə olsun. Məlumdur ki, bir neçə ildir ölkədə Aşura günü insanlar ianə, ehsan olaraq qan verirlər. İmam Hüseyn yolunda o qanı verirlər ki, xəstələrə, ehtiyacı olanlara ehsan edilsin, savab olsun. Amma şübhələr və narahatlıq da var. Bu narahatlıq ondan ibarətdir ki, bu qanların hara getməsi, sonradan insanlara təmənnasız verilib-verilməməsi şəffaf deyil. Aidiyyəti qurumlar, digər məsələlərdə olduğu kimi, bu işdə də qaranlıq tərəf görürlər. Cəmiyyətin ümumi rəyi budur ki, lazım olanda heç kəsə təmənnasız qan verilmir. Şəxsən mənim də qohumumun uşağına əməliyyat zamanı qan lazım oldu, qanköçürmə institutuna yolladılar, oradan pulla aldılar.
Əslində bu qanları satmaq İmam Hüseynin qanını təkrar tökmək kimi bir şeydir. Bax, bu qanı satırlarsa artıq onda bəla gələ bilər. Çünki bu, mənəvi tərəfdən çox qorxulu məsələdir" - deyə bildirdi.
T.İrfanın sözlərinə görə, ehtiyacı olan, xəstəxanalarda inləyən minlərlə məzlum, çarəsiz var. O vurğuladı ki, xalqımız kütləvi şəkildə gedib qan verir, hətta dövlət məmurları, deputatlar da qan verirlər. "Bu qədər qan hara gedir, kimlər onu satır, bu çox qaranlıqdır. Qan verənlər də verdiyi qanın satılmasından narahatdırlar. Aşurada qan verən bir nəfər mənə dedi ki, mən neçə ildir gedib qan verirdim, bir dəfə özümə qan lazım oldu, mənə pulla satdılar, daha mən qan verməyəcəm. Mən bununla bağlı maraqlandım, bildirdilər ki, guya Aşurada verilən qanların çoxunun tərkibində xəstəliklər, hepatit və digər viruslar çıxdığına görə onların çoxu istifadəyə yararsız olur və atılır. Şübhəsiz ki, bunlar bəhanədir. İldən-ilə qan verənlər artır. Tonlarla qan alınır əhalidən. Bəs bu hara gedir, bunun hesabatı niyə açıqlanmır, nədən qaranlıq qalır, bu məlum deyil.
Görünən odur ki, burada qara əllər işləyir, çünki qan biznesi böyük gəlirli sahədir.
Ehsan olaraq verilən bu qanları satmaq haramdır. Əgər bu cürdürsə o qanlar ehsan sayılmır, alver və istismar sayılır. Bu, qan verən əhalini aldatmaqdır. Vicdansızlığın, imansızlığın son həddidir. İnsanların qanı ilə alver etmək insanlıq əleyhinə cinayətdir". T.İrfan vurğuladı ki, Aşura günündə xəstə, çarəsiz adamlara ehsan olaraq verilən qanları kimlərsə satırsa, qeyri - şəffaf şəkildə mənimsəyir, öz mənfəətlərinə sərf edirsə, bu həm də qanunla cinayətdir. "Hər halda, bu sahədə şəffaflığın olmaması dəqiqdir. Bunun da arxasında qara işlərin olması şübhəsizdir. Mən bildiyim odur ki, tanıdığım yüzlərlə şəxsə qan lazım olanda hamısı gedib pulla alıb. Heç kəsə pulsuz qan verilməyib. Xəstəxanadan həkim yollayır, adam da gedir göstərilən yerdən xəstəsi üçün alıb gətirir. Aşurada verilən qanları kim içir, onu mən bilmirəm" - deyə T.İrfan bildirdi.
İradə SARIYEVA
