Elxan Orucov: "Özəl binalardakı su anbarlarının təmizləmə işlərini MTK-lar özləri tənzimləməlidir, ancaq…"
"Hazırda Bakıda təxminən 2 000-ə yaxın binanın su anbarları yuyulmur və təmiz deyil". Bunu Dövlət Su Ehtiyatları Agentliyinin İri Şəhərlərin Birləşmiş Su Təchizatı Xidmətinin şöbə müdiri Cəmil Babayev "ASAN Radio"da yayımlanan "Su gündəmi" verilişində deyib.
O bildirib ki, Mənzil-Tikinti kooperativlərində (MTK), təhsil ocaqlarında, ictimai iaşə ocaqlarında su anbarları, çənlərin yuyulması həyata keçirilmir: "Təbii ki, daha çox şikayət MTK-lar ilə bağlıdır. Bəzi hallarda vətəndaşlar suyun çirkli, tərkibində çöküntü və sair maddələr olması ilə bağlı şikayət edirlər. Həmin zaman suyun yoxlanışı həyata keçirilir və keyfiyyətində problem olmadığı aşkarlanır. Səbəb isə əksər hallarda su anbarlarının yuyulmaması olur".
Şöbə müdiri qeyd edib ki, su anbarlarının yuyulmasını istəyənlər bu işlə məşğul olan MMC-lərə müraciət edə bilərlər və işin keyfiyyətli həyata keçirilməsinə nəzarət etmək üçün Agentlik tərəfindən nümayəndə təyin oluna bilər.
Qeyd edək ki, bu gün çoxmərtəbəli binalarda su çəninin vaxtında təmizlənməməsi zamanla müzakirə olunur. Buna baxmayaraq, adıçəkilən problem hələ də aktuallağını qoruyur.
"Anbarların yuyulması üçün müəyyən pul ödənilməlidir, burada əsas məsuliyyət idarəedicilərin üzərinə düşür"
Məlum problemin həlli ilə bağlı fikir bildirən binaların idarə edilməsi məsələləri üzrə ekspert Elxan Orucov "Bakı-Xəbər"ə açıqlamasında bildirdi ki, özəl binalardakı su anbarlarının təmizləmə işlərini MTK-lar özləri tənzimləməlidir: "Məlumat üçün deyim ki, Azərbaycanda mənzil fondu üç yerə - özəl, dövlət və bələdiyyə fondlarına bölünür. Özəl mənzil fondu mülkiyyətçilərin ödədiyi vəsait hesabına formalaşır. Bütün xərclər sakinlərin ödədiyi kommunal vəsaitlər hesabına maliyyələşdirilir. Respublika Gigiyena və Epidemiologiya Mərkəzi və Azərbaycan Dövlət Su Ehtiyatları Agentliyi tərəfindən qoyulan məcburi tələbə görə, ildə bir dəfə binalarda yerləşən su anbarları dezinfeksiya olunmalı və yuyulmalıdır. Məsələn, biz idarə etdiyimiz binalarda mütəmadi olaraq ildə bir dəfə olmaq şərti ilə həmin anbarları xüsusi lisenziyası olan şirkətlərə yuduzdururuq. Ümumiyyətlə, sakinlər özləri də sağlamlıqları üçün bunu MTK-dan tələb etməlidirlər. Amma bir çox binalarda su anbarlarında təmizliyə əməl olunmur. Bu, birbaşa insan sağlamlığı üçün təhlükəli məsələdir. Zaman-zaman bu məsələ gündəmə gətirilir, amma heç bir effekti olmur. Sakinlər özləri sağlamlıqlarını fikirləşməlidirlər. Təəssüflər olsun ki, buna nəzarət mexanizmi yoxdur. Dövlət tərəfindən tövsiyə olunur ki, yuyulsun. Amma özəl mənzil fondu olduğuna görə, işin görülməsi vəsaitə bağlı məsələdir. Anbarların yuyulması üçün müəyyən pul ödənilməlidir. Burada əsas məsuliyyət idarəedicilərin üzərinə düşür. Çünki vətəndaşlar kommunal xidmət haqlarını, binanın saxlanması xərclərini ödəyirlər. Bu məsələni idarəedicilər özləri təşkil etməlidir. Lakin bu sahə yaxşı vəziyyətdə deyil. İnsanlar da laqeydlik göstərib tələb etmirlər. Bir çox binalar MTK-lar tərəfindən idarə olunduğuna görə bu məsələlərə diqqət yetirilmir".
Günel CƏLİLOVA
