Eyyub Hüseynov: "Bazar iqtisadiyyatıdır, kimə necə sərf edir, o cür də məhsulu qəbul edir"
Meyvə-tərəvəz məhsulları bazarla yanaşı, marketlərdə də satılır. Marketlərdə satılan meyvə-tərəvəzin qiyməti ilə yanaşı, keyfiyyəti də narazılıq yaradır. Əsasən "Araz" və başqa supermarketlərdə alıcılar meyvə-tərəvəzin, yemiş-qarpızın, göyərtinin keyfiyyətsizliyindən şikayətlənirlər.
Deyirlər ki, supermarketlər ucuz olsun deyə nisbətən aşağı keyfiyyətli malları alıb gətirir və bunun üstünə əlavə pul qoyaraq xeyli qazanırlar. Məsələn, alıcılar iddia edir və qəti əmindirlər ki, "Araz" supermarket şəbəkəsində şirin yemiş-qarpıza rast gəlmək mümkün deyil. Halbuki, supermarketin lap yaxınlığındakı pərakəndə satış nöqtələrində olduqca keyfiyyətli meyvə-tərəvəz və bostan məhsulları almaq olar. Xüsusilə yemiş- qarpız kimi mövsumun ən dadlı bostan məhsullarının pərakəndə satış nöqtələrində çox keyfiyyətli olması heç kimə sirr deyil... Nəinki supermarketlərdə. İddialara görə, supermarketlər məhz keyfiyyətli göyərti, meyvə-tərəvəz və bostan məhsulları satışında pərakəndə satış nöqtələrindən çox geridə qalmağa başlayıblar.
"Malların keyfiyyətsizliyində alverçi qrupların rolu var, onlar yararsız nəqliyyat vasitələrində meyvə-tərəvəzi əməkdaşlıq etdiyi marketə gətirir"
Azad İstehlakçılar Birliyinin sədri Eyyub Hüseynov "Bakı-Xəbər"ə açıqlamasında bildirdi ki, Bakının meyvə-tərəvəz satış məntəqələrinə, o cümlədən, marketlərə çatdırılan məhsul birbaşa fermerden gətirilmir: "Məlumdur ki, rayondan gətirilən istənilən məhsul ilk olaraq "Meyvəli" adlanan bazara daxil olur, daha sonra hər alverçi qrupun özünün əməkdaşlıq etdiyi market və dükanlara paylanır. Malların keyfiyyətsizliyində məhz həmin alverçi qrupların rolu var. Həmin alverçilər istifadəyə yararsız nəqliyyat vasitələrində meyvə-tərəvəzi əməkdaşlıq etdiyi marketə gətirir. Marketlərdə satışda olan keyfiyyətsiz məhsullar qeyd etdiyim halla bağlıdır. Marketlər çalışmalıdır ki, ixtisaslaşmış meyvə-tərəvəz dükanlarından daha ucuz qiymətə və keyfiyyətli məhsul alsınlar".
Həmsöhbətimiz onu da əlavə etdi ki, bazar iqtisadiyyatıdır, kimə necə sərf edir, o cür də məhsulu qəbul edir: "Supermarketlərin dövriyyəsi çox olduğundan keyfiyyətə o qədər də önəm verilmir. Yaxşı olar ki, marketlər keyfiyyətsiz məhsulu geri qaytarsın. Bununla bağlı marketlər öhdəlik götürməlidir".
Günel CƏLİLOVA
