Fatimə Hacıbəyli: "İnsanlar öncə özünü tapmağı, öz missiyasını həyatda tapıb, sonra ailə həyatına başlamağı seçir"
Son illərdə ölkəmizdə ailə həyatı quranların sayı getdikcə azalır. Cari ilin ilk beş ayı ərzində ölkədə 17 448 nikah halı qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə nikahların sayı azalaraq 4,6-dan 4,1-ə düşüb.
Belə üzücü mənzərənin yaranması heç də səbəbsiz deyil. Mütəxəssislər hesab edirlər ki, bu məsələdə psixoloji, sosioloji faktorlarla yanaşı iqtisadi faktorlar da rol oynayır.
"Valideynlər və qohumlar icazə verməlidir ki, gənclər özləri öz ayaqları üzərində dayanmağı bacarsınlar, daha sonra ailə həyatı qursunlar"
Sosioloq Fatimə Hacıbəyli "Bakı-Xəbər"ə açıqlamasında qeyd etdi ki, maddiyyat burda əsas rol oynayır: "Ailə həyatı qurduqdan sonra xərclərin artması da bu məsələyə öz təsirini göstərir. Çünki evliliyə qədərki prosesdə o qədər əlavə xərclər çıxır ki, dost-tanışlarında bunu görən gənclər normal olaraq evlənmə prosesini bir az daha uzadır. Gənclərin bu cür davranmasını normal qarşılamaq olar, ancaq təəssüf ki, əksər mövzularda olduğu kimi, kənar təzyiqlər öz sözünü burda da deyir. Misal olaraq, cütlük sadə bir toy istəyir, valideynlər, qohumlar isə, təbii, ki əksini. Ümumiyyətlə, insan evliliyə həm psixoloji, həm də maddi baxımdan özünü hazır hiss edəndə ailə həyatı qurmalıdır. Ola bilər ki, gəncin 24 yaşı var, ətrafına görə o, artıq "evlilik yaşı"ndadır, amma reallıq onu göstərir ki, həmin gənc özünü hazırda evlilikdə görmür. Bu zaman ona əlavə təzyiqlər əks təsir də göstərə bilər. Valideynlər və qohumlar icazə verməlidir ki, gənclər özləri öz ayaqları üzərində dayanmağı bacarsınlar, daha sonra ailə həyatı qursunlar".
Həmsöhbətimiz onu da əlavə etdi ki, gənclərin ailə qurmağa tələsməməsinin bir çox səbəbləri var: "Burada mənfi və müsbət düşüncələr mövcuddur. Birinci səbəb maddi məsələ, ən başlıcası da ev məsələsidir. Əvvəllər gənclər qaynana-qaynata ilə birlikdə yaşamağa razı idilərsə, bugünkü gün nə oğlanlar, nə də qızlar buna razı olur. Hər kəs özü ayrıca həyat yoldaşı ilə yeni bir həyata başlamaq istəyir. Əslində, bunu mən doğru bir düşüncə tərzi kimi dəyərləndirirəm. Çünki gənclər də fərqinə varır və görür ki, bir çox ailələrin söz-söhbətləri, dağılması, soyuqluq yaranması buradan qaynaqlanır və bu fakta əsaslanaraq ev məsələsini, şəxsi evlərinin olmasını ilk mərhələyə qoyurlar və bu çox doğru addımdır. Birlikdə yaşamaq heç bir halda, nə mehribançılıqla, nə də ailəcanlılıqla əlaqəli bir şey deyil.
İkincisi karyera məsələsidir ki, burada da həm qızlar, həm oğlanlar öncə karyera qurmaq, bir pillə əldə etmək, iş karyerası, daha sonra ailə haqqında düşününürlər. Bu da həm maddiyyata bağlanır ki, insanlar ailəli olanda yaxşı yaşamaq istəyirlər.
Bir də özünü təsdiqləmək kimi fakt var ki, o da son illər birinci yerdə durur. İnsanlar öncə özünü tapmağı, öz missiyasını həyatda tapıb, sonra ailə həyatına başlamağı seçirlər".
Günel CƏLİLOVA
