Fərid Həşimov: "Avtomobillərin yürüşünün geri çəkilməsi elə də bahalı prosedur deyil"
Avtomobil satışı ilə məşğul olan bəzi işbazlar maşınların kilometrajına müdaxilə edir və avtomobilin az məsafə getdiyi qənaəti yaradırlar. Bu yolla avtomobil real qiymətindən baha qiymətə satışa çıxarılır. Bununla da alıcılar aldadılır və onların pulları mənimsənilir. Belə hallara ən çox da Amerika və Koreya bazarından satış məqsədilə gətirilən avtomobillərdə rast gəlinir.
Ekspertlər bildirir ki, yürüşü çox olduğundan, alverçilər ucuz qiymətə aldıqları həmin nəqliyyat vasitələrini ölkəyə gətirib onun kilometrajını azaltmaqla satışa çıxarırlar.
"Avtomobillərin kilometrajı 50-200 min arasında geri çəkilir, yürüşün geri çəkilməsi ilə, demək olar ki, 90 faiz hallarda avtomobil alverçiləri məşğul olur"
Nəqliyyat eksperti Fərid Həşimov "Bakı-Xəbər"ə şərhində bildirdi ki, avtomobillərin yürüşünün geri çəkilməsi elə də bahalı prosedur deyil. Bakının müxtəlif yerlərində ustadan və yürüşü dəyişdirilən avtomobilin markasından asılı olaraq qiymətlər 80-100 manatadək arta bilər: "Avtomobillərin kilometrajını azaltmağın bir neçə üsulu var. Bunları bütün avtomobillərdə etmək mümkündür. Sayğacı roliklə olan maşınlarda yürüşü iynə ilə, sayğacı eloktron olanların yürüşünü isə cihazlar lövhəsini çıxardaraq geri çəkirlər. Avtomobillərin kilometrajı 50-200 min arasında geri çəkilir. Yürüşün geri çəkilməsi ilə, demək olar ki, 90 faiz hallarda avtomobil alverçiləri məşğul olur. Onlar bu üsuldan istifadə etməklə maşınların qiymətini orta hesabla 2-6 min manat artırırlar".
Ekspert onu da bildirdi ki, kilometrajı geriyə çəkilmiş avtomobili müəyyən etməyin də bir neçə üsulu var. Bunlardan biri avtomobildəki başqa qurğularda olan yaddaşa baxmaqdır: "Bununla yanaşı, "Kia", "Hyundai" "BMW" və digər marka avtomobillərdə yürüşün geri çəkildiyini bilmək çətindir. Səbəbi həmin avtomobillərin əlavə yaddaş qutularının olmamasıdır. Onu da deyim ki, kilometrajın çəkildiyini avtomobilin digər xüsusiyyətlərindən də bilmək mümkündür. Avtomobilin görünüşü, texniki vəziyyəti, müxtəlif texniki sistemlərinin durumu və xarici görünüşdəki bəzi detallar onun nə qədər istifadə edildiyi haqqında məlumat verir. Bunun üçün maşını qaldıraraq onun alt hissəsini, sürət qutusu, mühərrik və sükanın vəziyyətini öyrənmək kifayətdir".
Günel CƏLİLOVA
