Mətləb Salahov: "Azad olunmuş ərazilərin təhlükəsizlik zonalarına çevrilməsində Azərbaycan polisinin müstəsna rolu var"
İşğaldan azad edilmiş ərazilərin təhlükəsiz zonalarına çevrilməsi ən vacib amillərdən biri kimi qarşımızda durur. Bilirik ki, müharibədən "miras" qalan mina, separatçıların ərazilərimizdə, müxtəlif obyektlərdə gizlətdikləri silah-sursat, partlamamış mərmilər problemi hələ də tam olaraq öz həllini tapmayıb.
O da məlumdur ki, Azərbaycan polisinin azad olunmuş ərazilərdə həyata keçirdiyi tədbirlər nəticəsində külli miqdarda silah-sursat, partlamamış mərmilər zərərsizləşdirilir, ərazini partlayıcı maddələrdən təmizləyir. Mübağiləsiz deyə bilərik ki, polis işğaldan azad olunan bölgələrin təhlükəsiz əraziyə çevrilməsi üçün əlindən gələni edir.
Müharibə bitəndən polis, demək olar ki, hər gün döyüş sursatları, silahlar, patronlar, partlamamış mərmilər, partlayıcı maddələr tapıb onları zərərdizləşdirir.
Azad olunmuş ərazilərin təhlükəsizlik zonalarına çevrilməsində polisin rolu necə dəyərləndirilə bilər?
"...Təhlükəsizliyin etibarlı təmin edilməsi məqsədilə Azərbaycan polisinin qarşıya qoyulan tapşırıqları peşəkarlıqla icra etməsi yüksək qiymətləndirilməlidir"
Jurnalist-ekspert Mətləb Salahov "Bakı-Xəbər"ə şərhində "Azərbaycanın 44 günlük müharibədə qazandığı tarixi qələbədən sonra erməni işğalından azad olunmuş ərazilərin təhlükəsizlik zonasına çevrilməsi bir nömrəli məsələ kimi gündəlikdədir. Bu gün dövlət rəhbərliyi tərəfindən azad olunmuş ərazilərə vətəndaşların mərhələli şəkildə köçürülməsi və məskunlaşması uğurla davam etdirilir. Əlbəttə, illərdir ki, doğma el-obasından uzaq düşmüş insanların ata-baba yurduna can atması, məskunlaşma işində fəallıq göstərməsi təbii haldır. Lakin unutmaq olmaz ki, hələ də mina terrorunun, qanunsuz silah qalıqlarının mövcud olduğu bu ərazilərdə təhlükəsizlik tədbirləri ən əsas məsələdir. Heç şübhəsiz, vətəndaşlarımızın bu ərazilərdəki təhlükəsizliyi Azərbaycan polisinin bu istiqamətdəki fəaliyətindən çox asılıdır"-deyə bildirdi.
M.Salahov işğaldan azad olunan bölgələrin təhlükəsiz əraziyə çevrilməsi məsələsinə toxunarkən bildirdi ki, hazırda Azərbaycan polisi separatçı erməni terrorçularından azad olunan ərazilərimizdə qanunsuz silahların yığılması, işğaldan azad olunan bölgələrin təhlükəsiz əraziyə çevrilməsi məqsədilə olduqca mühüm missiya gerçəkləşdirir: "Diqqət edin, hər gün işğaldan azad olunmuş ərazilərdə aşkarlanan silah-sursat barədə rəsmi açıqlamalar mətbuatda dərc olunur. Separatçı erməni rejiminin zamanında bu ərazilər açıq şəkildə terror yuvası olub. Uzun illər qanunsuz silah bazarına çevrilmiş, ən müxtəlif yollarla əldə edilmiş silahlarla "zəngin" olan bu ərazilərdə bu gün təhlükəsiz həyat qurmaq üçün Daxili İşlər Nazirliyinin əməkdaşları ən yüksək təhlükəsizlik tədbirləri görürlər. Xüsusilə Vətən müharibəsi və antiterror tədbirlərindən sonra Böyük Qayıdış prosesinin sürətləndirilməsi və təhlükəsizliyin etibarlı təmin edilməsi məqsədilə Azərbaycan polisinin qarşıya qoyulan tapşırıqları yüksək peşəkarlıqla icra etməsi yüksək qiymətləndirilməlidir. Azad olunmuş ərazilərin təhlükəsizlik zonalarına çevrilməsində Azərbaycan polisinin müstəsna rolu var.
Bundan başqa, müharibə qalıqları, təhlükə mənbələrinin aşkarlanıb zərərsizləşdirilməsi prosesi ən çətin missiyadır. Ən əsası, bölgənin silah-sursatlardan, partlayıcı maddələrdən təmizlənməsi işində Azərbaycan polisinin bu gün gerçəkləşdirdiyi fədakar missiya alqışa layiqdir. Bu fakt, ilk növbədə, azad olunmuş ərazilərin təhlükəsiz yaşayış zonalarına çevrilməsi və vətəndaşlarımızın bu ərazilərdə təhlükəsiz yaşaması üçün həyati önəm daşıyır".
İradə SARIYEVA
