Kamran Əsədov: "Azərbaycanda riyaziyyatdan 0 bal toplayan riyaziyyat müəllimi olur"
Məlumdur ki, bir neçə gün əvvəl müəllimlərin sertifikasiya prosesi keçirilib. Sertifikasiya imtahanlarında kollec məzunlarının aşağı nəticə göstərməsi müzakirələrə səbəb oldu.
Xatırladaq ki, elm və təhsil naziri Emin Əmrullayev də mövzu ilə bağlı çıxışında qeyd etmişdi ki, vaxtilə orta ixtisas təhsili müəssisələrində də müəllimlər hazırlanıb: "Bu, müəllim çatışmazlığı dövründə sürətli müəllim hazırlanması üçün atılan addım olub. Hazırda isə ali təhsilin tələb edildiyi məktəblər var və bu, qanunvericilik çərçivəsində olan tələbdir. Artıq bilirsiniz ki, biz nazirlik olaraq nəinki ümumitəhsil, hətta məktəbəqədər təhsil səviyyəsində də müəllim hazırlığını orta ixtisas təhsili müəsisələrində saxlamışıq. Bundan sonra bunu etməyəcəyik". Nazir müəllimin yalnız ali təhsilli olmasını vacib şərt hesab edir.
"Azərbaycanda orta ixtisas təhsili müəssisələrinin hazırladığı kadrlar əmək bazarının tələblərinə və müasir standartlara cavab vermir"
Mövzu ilə bağlı fikir bildirən təhsil eksperti Kamran Əsədov "Bakı-Xəbər"ə şərhində bildirdi ki, Azərbaycanda orta ixtisas təhsili müəssisələrinin hazırladığı kadrlar əmək bazarının tələblərinə və müasir standartlara cavab vermir: "Dünyanın ən nüfuzlu ölkələrindən olan İngiltərə, Almaniya və Fransada çalışanların 34%-i kollec məzunlarıdır. Hətta qeyd edilən ölkələrin kollec məzunları arasında nazirlər, vitse-prezidentlər də var. Amma Azərbaycanda 1990-cı illərdə ölkədə təhsil sahəsində sabitliyin olmaması səbəbindən kolleclərə kütləvi qəbul və məzun olma, həmçinin saxta diplom əldə edilmə halları baş verdi. Sertifikasiya, müəllimlərin işə qəbulu imtahanlarının nəticələrində gördük ki, kollec məzunlarının çoxunun nəticələri yüksək deyil. Amma birmənalı şəkildə "kollec məzunları pisdir" demək də doğru deyil. Hesab edirəm ki. kolleclərin tədris proqamı dəyişdirilməlidir. Elə insan var ki, Xaçmazda yaşayır, Bakıya gələ bilmir və Qubada olan kollecdə təhsilini davam etdirir. İnsanlar öz bilik və bacarıqlarına, ali vəziyyətlərinə uyğun olaraq ixtisas seçimində iştirak edir, kollec seçirlər".
Ekspert bildirdi ki, müəllim ali təhsilli olmalıdır, amma Azərbaycan hələ o səviyyədə deyil. Finlandiyada müəllim olmaq üçün bakalavr təhsili yetərli deyil. Magistratura pilləsini bitirməli, 80-dən yuxarı göstərici əldə etməlisiniz. Amma Azərbaycanda riyaziyyatdan 0 bal toplayan riyaziyyat müəllimi olur: "Hesab edirəm ki, kollec təhsilini o qədər də pis təqdim etməməliyik. Hazırda orada 50 mindən çox insan təhsil alır. Ali təhsilli olmaq, təbii ki, yaxşıdır. Amma birdən-birə kollec təhsilini tənqid etsək, bu haqsızlıqdır. Çünki kolleclər yalnız pedoqoji kadrlar buraxmır. Azərbaycanda ali təhsil müəssisəsi məzunlarının 42 faizi çalışır, elə universitetlərimiz var ki, məzunlarının 1 faizi işləyir. O zaman bu universitləri bağlayaq? Ali təhsil müəssisələrinin məzunu olan pedaqoji kadrların hamısının nəticələri yüksəkdirmi? Elə dövlət universiteti var ki, məzunlarının yalnız 12 faizi MİQ imtahanından keçə bilir. Bu səbəbdən də təhsilin keyfiyyətini yüksəltməkdə maraqlı olmalıyıq".
Günel CƏLİLOVA
