Aprelin 21-də “KOB-un alternativ maliyyəyə çıxışı problemləri” mövzusunda aparılan araşdırmanın nəticələrinin ictimaiyyətə çatdırılması ilə bağlı təqdimat keçirilib. Bu barədə baki-xeber.com-a təşkilatdan məlumat verilib.
Təqdimat Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə İqtisadi Resursların Öyrənilməsi İctimai Birliyi tərəfindən icra olunan “Kiçik və Orta Sahibkarlıq subyektlərinin alternativ maliyyə mənbələrinə çıxışının genişləndirilməsi” adlı layihə çərçivəsində reallaşıb
Həmçinin, tədbirə Kiçik və Orta Biznesin İnkişafı Agentliyi (KOBİA) və Birgə İnvest MMC də tərəfdaşlıq edib.
Tədbiri giriş sözü ilə açan KOBİA-nın KOB-ların maliyyə mənbələrinə çıxışına dəstək şöbəsinin müdiri İlkin Əliyev dünyada baş verən proseslər çərçivəsində ölkəmizin beynəlxalq aləmdə rəqabətqabiliyyətliyinin artırılması, KOB-ların Azərbaycan iqtisadiyyatına töhfəsi və onların maliyyə mənbələrinə çıxışlarının təmini üzrə dövlətin apardığı tədbilər barəsində söhbət açıb.
Daha sonra İqtisadi Resursların Öyrənilməsi mərkəzinin tədqiqatçısı, həmçinin layihənin rəhbəri Ruslan Atakişiyev “KOB-un Alternativ maliyyəyə çıxışı problemləri” mövzusundakı araşdırmanı iştirakçılara təqdim edib. O bildirib ki, sahibkarların əksəriyyəti yüksək faiz dərəcələrindən, ağır girov şərtlərindən şikayət edir. Bununla yanaşı alternativ maliyyə mənbələrindən sayılan Vençur kapitalı, Kraudfandinq və payda iştirak kimi vəsait cəlb etmə yollarından biznes camiyyəsinin məlumatlılığının da çox aşağı olması faktını iştirakçıların diqqətinə çatdırıb.
Sonda Birgə İnvest MMC-nin layihələr üzrə baş meneceri Elnur Quliyev “Dövlətin yeni maliyyə dəstəyi mexanizmi” mövzusunda çıxış edib. Onun Azərbaycan bazarına yeni daixil olmuş, dövlət tərəfindən maliyyləşən Birgə İnvestin sahibkarlara ortaqlıq şərtləri ilə Faizsiz kredit verməsi və hətta sərmayənin 30%-i miqdarında heç bir qarşılıq güdmədən pul yatırması ilə bağlı təqdimatı iştirakçıların böyük marağına səbəb olub.
Tədbirdə KOBİA-nın, Sahibkarlığın İnkişafı Fondunun, Dövlət Vergi Xidmətinin, AZPROMO-nun, İqtisadi İslahatlar Elmi Tədqiqat İnstitutunun, İnnovasiyalar Agentliyinin, Aqrar Tədqiqatlar Mərkəzinin, UNEC KOB Tədqiqat mərkəzinin nümayəndələri, tədqiqatçılar, doktorantlar, müəllimlər, sahibkarlar və tələbələrdən ibarət 50-dən şəxs çox şəxs iştirak edib.
