Ünvanlı sosial yardım alan aztəminatlı ailələr arasında hansısa səbəbdən bundan məhrum edilənlər var.
Son dövrlər həm müxtəlif vətəndaşların bizə etdikləri müraciətlərdən, həm də mediada əks olunan konkret şikayətlərdən aydın olur ki, ünvanlı sosial yardımdan məhrum edilən aztəminatlı vətəndaşlarımız az deyil. Ekspertlərin fikrincə, ünvanlı sosial yardım o ailələrə verilməlidir ki, onların həqiqətən də buna ehtiyacları var və bu halda yardımın kəsilməsi doğru deyil.
Mətbuatda yayılan məlumata görə, Şəki sakini üç aydır ki, sosial yardım ala bilmir.
Şəki şəhər Yeni Çələbixan qəsəbəsində 316 nömrəli evdə müvəqqəti məskunlaşan İsmayılov Murad Kamal oğlunun iddiasına görə, aztəminatlı ailə olduğu üçün üç aydır ki, ünvanlı sosial yardım ala bilmir.
"2022-ci ilin yanvar ayının 14-dən dövlətimizin ayrdığı ünvanlı sosyal yardım almaq üçün aidiyyatı qurumlara müraciət etmişəm. Artıq bu ayın 14-də 3 ay olacaq ki, hələ də ünvanlı sosial yardım ala bilmirəm. Sosial Müdafiə Nazirliyinin əməkdaşları tərəfindən yoxlamalar aparılmır. Səbəb də odur ki, üç ay bitəndən sonra yenidən sənəd toplanılması üçün vaxt uzadırlar. Dövlətimizin vətəndaşı üçün ayırdığı sosial yardım aztəminatlı ailəyə verilməsi üçündür, yoxsa xalqa zülm etmək üçün?... Xahiş edirəm ki, aidiyyəti qurumlara müraciətimizi araşdırsınlar"- deyə mətbuata ünvanladığı şikayətdə vətəndaş bildirib.
DSMF: “... Yenidən elektron qaydada müraciət etmələri tövsiyə olunub”
Vətəndaşın probleminə münasibət bildirən Əmək və Əhalinin Sosial Müdafiəsi Nazirliyinin (ƏƏSMN) tabeliyində olan Dövlət Sosial Müdafiə Fondundan bildirdilər ki, Şəki şəhər Cəfərabad kənd sakini İsmayılov Murad Kamal oğlunun ünvanlı sosial yardım ala bilməməsi ilə bağlı şikayəti araşdırılıb:"Şəki şəhər Cəfərabad kənd sakini İsmayılov Murad Kamal oğlunun ünvanlı sosial yardım ala bilməməsi ilə bağlı şikayəti araşdırılıb. Vətəndaş ünvanlı dövlət sosial yardımı ilə bağlı 03.03.2022-ci il tarixdə elektron qaydada müraciət edib. Lakin maddi-məişət şəraitinin müayinəsi zamanı ailənin Ərizə-bəyannamədə qeyd edilən ünvanda yaşamadığı müəyyən olunub və bu səbəbdən imtina verilib. Təmsilçi ilə telefon əlaqəsi yaradılıb, Murad İsmayılov Cəfərabad kəndində deyil, Yeni Çələbixan qəsəbəsində yaşadıqlarını deyib. Vətəndaşa Ərizə-bəyannamədə yaşadıqları ünvanı səhv qeyd etdiklərini, bu səbəbdən ünvanlı dövlət sosial yardımla bağlı yenidən elektron qaydada müraciət etmələri tövsiyə olunub".
Ekspertlər hesab edir ki, bütün rayonlarda həssas qruplara aid olan ailələri rəsmi qurumlar tanıyır.
Akif Nəsirli: “Bir ailənin, vətəndaşın yaşayış ünvanını dəyişdirməsi ünvanlı sosial yardımın dayandırılmasına səbəb ola bilməz"
İqtisadçı ekspert Akif Nəsirli isə bizimlə söhbətində bildirdi ki, vətəndaşın yaşayış ünvanını dəyişməsi onun ünvanlı sosial yardım almaqdan məhrum edilməsinə əsas yaratmır. "Əslində, vətəndaşların ünvanlı sosial yardımlarımın kəsilməsinə yeganə səbəb onların gəlirlərindəki dəyişikliklər olmalıdır. Gəlirlərində müəyyən dəyişiklik varsa, gəlirləri artırsa, aztəminatlı ailə kateqoriyasından çıxırlarsa o halda ünvanlı sosial yardım dayandırıla bilər. Amma digər bütün səbəblərdən, ünvan dəyişməsi, hansısa inzibati hərəkətlərin olunması kimi məsələlər ünvanlı sosial yardımın dayandırılmasına, kəsilməsinə səbəb olmamalıdır. Bilirsiz ki, ünvanlı sosial yardımın əldə edilməsi də vətəndaşa asan başa gəlmir. Burada çox ciddi, çətin keçilən baryerlər var. Adamın ünvanı dəyişdiyinə görə ünvanlı sosial yardımın kəsilməsi ağlagəlməz bir şeydir. Bu vətəndaş ünvanlı sosial yardım kateqoriyasına düşmək üçün min bir əziyyətdən keçib. Yenidən o bir də müraciət üçün sənəd yığmağa başlamalıdır. Nəyə görə? Əgər bu doğrudan da aztəminatlı ailə kateqoriyasına aiddirsə, onun bu və yaxud başqa bir ünvanda yaşamasının nə mənası var. Bunlar hamısı Azərbaycan hökumətinin, o cümlədən də Əmək və Əhalinin Sosial Müdafiəsi Nazirliyinin, Dövlət Sosial Müdafi Fondunun bəhanələrlə büdcəyə qənaət etməsidir. Bir ailənin, vətəndaşın yaşayış ünvanını dəyişdirməsi ünvanlı sosial yardımının dayandırılmasına səbəb ola bilməz. Çünki ünvanın dəyişməsi gəlirin dəyişməsi deyil".
A.Nəsirlinin sözlərinə görə, qərar belə verilib ki, bu ailə aztəminatlıdır, sosial yardıma ehtiyacı olan ailədir və onun harada yaşaması artıq ünvanlı sosial yardımın kəsilməsi üçün əsas ola bilməz. O hesab edir ki, bu səbəbdən də vətəndaşın ünvanlı sosial yardımının bərpa edilməsi daha düzgün olardı, nəinki ona əlavə sənəd yığdlrıb elektron qaydada təkrar müraciət etdirmək.
Əli TURABOV
