Orta və ali məktəblərdə rus bölməsi üzrə müəllim çatışmazlığı var. Araşdırmalara görə, son 7 ildə rus bölməsində təhsil alanlar xeyli çoxalıb. Ancaq bu artım müəllim sayında özünü göstərməyib. Yəni rus bölməsi üzrə yeni siniflərin artması ilə paralel olaraq fənn müəllimlərinin qıtlığı yaranır. Kadr çatışmazğına səbəb olan amillərdən biri də ali təhsil müəssisələrində bu istiqamətlərdə plan yerlərinin az ayrılmasıdır.
Ekspertlərin fikrincə, müəllim çatışmazlığı problemi rus bölməsində təhsil alanların bilik səviyyəsinin aşağı düşməsinə səbəb olur. Bunu son illərin nəticələrindən də görmək mümkündür.
“Rus bölməsi üzrə məktəblərdə ibtidai siniflərin sayı çox olsa da, yuxarı siniflərə qalxdıqca…”
Rus bölməsində müəllim çatışmazlığı ilə bağlı fikir bildirən təhsil eksperti Nizami Hüseynov qeyd etdi ki, rus bölməsi üzrə məktəblərdə ibtidai siniflərin sayı çox olsa da, yuxarı siniflərə qalxdıqca tədris proqramı ağırlaşır və şagirdlər rus bölməsindən Azərbaycan bölməsinə keçirlər: “Bu, əsasən rus bölməsinin yuxarı siniflərində müəllim çatışmazlığı və müəllimlərin bilik və bacarıqlarının yüksək səviyyədə olmaması ilə əlaqədardır. Bu gün ölkədə ali təhsil müəssisələrinin 80 faizində bütün ixtisaslar üzrə kadr hazırlığı həyata keçirilir. Bakı Dövlət Universiteti, Azərbaycan Dövlət Pedaqoji Universiteti, Dillər Universiteti, Bakı Slavyan Universitetində orta məktəblərdə ehtiyac olan bütün ixtisaslar üzrə tələbə qəbulu həyata keçirilir və onlar əmək bazarına daxil olurlar. Azərbaycan bölməsində müəllimlərin işə qəbulu imtahanında iştirak edənlər üçün istər ixtisas, istərsə də məntiq üzrə kifayət qədər test bankları, vəsaitlər olmasına baxmayaraq, rus bölməsində bu yoxdur. Bundan başqa, Təhsil Nazirliyi tərəfindən müəllimlərin işə qəbulu üzrə ixtisas və digər sahələrdə proqramın olmaması nəticələrin aşağı olmasına səbəb olur. Nəzərə alsaq ki, Azərbaycan bölməsindən fərqli olaraq, rus bölməsi üzrə müəllim kimi imtahan verənlər abituriyent olan zamanı az balla ali məktəblərə qəbul olublar. Bu da onların Azərbaycan bölməsi ilə müqayisədə bir az bilik və bacarıqlarının aşağı olmasına səbəb olur. Az bal toplayıb rus bölməsi üzrə ali məktəblərə qəbul olan abituriyentlərə universitetlərdə keyfiyyətli təhsil verilmir. Onların tədris proqramları əmək bazarının peşəkar tələblərinə və müasir standartlara cavab vermir. Nəticədə əmək bazarına aşağı səviyyədə kadrlar daxil olur. İstər ali məktəblərə qəbul imtahanlarında, istərsə də müəllimlərin işə qəbulu imtahanlarında Azərbaycan və rus bölməsi üzrə iştirakçılara təqdim olunmuş test tapşırıqları fərqli olmur. Eyni test tapşırığı təqdim olunur. Sadəcə olaraq, Azərbaycan bölməsində olan testlər rus dilinə tərcümə olunur. Düzdür, bəzi hallarda rus bölməsinə tərcümə zamanı müəyyən qüsurlar olur, amma bu da nəticəyə ciddi təsir göstərmir. Aparılan təhlillər göstərir ki, rus bölməsi üzrə imtahanda iştirak edənlərin hazırlıq və bilik səviyyələri aşağıdır”.
Həmsöhbətimiz onu da əlavə etdi ki, kadr çatışmazlığına səbəb olan amillərdən biri də rus bölməsini bitirən abituriyentlərin pedaqoji ixtisaslara maraq göstərməməsidir.
Günel CƏLİLOVA
