Təzə tikilən binalarda yük liftindən istifadə etməyə icazə verilmir. Bu hal əksər çoxmərtəbəli binalarda müşahidə olunur. Bu günlərdə Nərimanov rayonu ərazisində “Çinar-Z” MTK-ya aid binanın sakinləri də bu problemlə bağlı narazılıqlarını bildirilib. Sakinlər qeyd edir ki, “lebyodka”ların hər reysi üçün əlavə 5-6 manat, yaxud da 3 otağa görə 1000 manat ödəniş edilməsini tələb edilir.
Qeyd etdiyimiz kimi, məlum problem demək olar ki, bütün yeni tikililərdə yaşanır. Məlumdur ki, təmir materiallarının mənzillərə qaldırılması üçün yalnız yük qaldırıcı “lebyodka”lardan istifadə olunmasına icazə verilir. Ancaq binaya nəzarət edən şəxslər həmin liftdən istifadə üçün sakinlərdən əlavə ödəniş tələb edir. Komendantlar, bina rəisləri, MTK rəhbərliyi hesab edir ki, evini təmir etdirməyə maddi imkanı çatırsa, “lebyodka” üçün də pulu ödətdirə biləcəklər. Ancaq MTK sahibi nəzərə almalıdır ki, bina sakini həmin liftdən ödənişsiz istifadə etməlidir, bu onun haqqıdır. Sakin pul verib mənzil alırsa, istənilən liftdən də istifadə edə bilər. Buna görə vətəndaşdan pul tələb edilməsi düzgün deyil. Təəssüf ki, aidiyyəti dövlət qurumları da bu problemə göz yumur.
Nüsrət İbrahimli: “MTK sahibləri sakinlərdən yük lifti üçün əlavə ödəniş tələb edir, bu isə qanunsuzdur”
Əmlak eksperti Nüsrət İbrahimli “Bakı-Xəbər”ə açıqlamasında qeyd etdi ki, çoxmərtəbəli binaların idarə olunması ilə bağlı Nazirlər Kabinetinin müvafiq sənədi var. Həmin qaydaya əsasən, mənzil sahibləri tərəfindən binanın idarə edilmə qurumu yaradılmalıdır: “İdarəedici qurum il ərzində binaya çəkilən xərclərin siyahısını tərtib etməlidir. Ümumi rəqəm müəyyən olunandan sonra mənzil mülkiyyətçiləri arasında adambaşına nə qədər düşməsi təyin olunmalıdır. Bura həm lift təmiri, işıqlandırma, binanın təmir xərcləri, mühafizə xidməti, işçilərin əmək haqqısı və digər məsələlər daxildir. Ancaq təəssüf ki, heç kim bu sənədi oxumaq istəmir ki, qaydalardan xəbərdar olsun. Nəticədə isə MTK sahibləri sakinlərdən yük lifti üçün əlavə ödəniş tələb edir. Bu isə qanunsuzdur”.
Elnur Fərzəliyev: “Evin təmiri üçün əlavə pul tələb olunması mülkiyyət hüququnun pozulmasıdır”
Əmlak eksperti Elnur Fərzəliyev bildirdi ki, inkişaf etmiş ölkələrə, Avropaya, hətta qonşu ölkə Türkiyəyə baxsaq, bu ölkələrdə binalarda mənzillər təmirsiz satılmır. Mənzil satılırsa, orada vətəndaşa yaşama şəraiti verilməlidir. Şirkətin özünün, yaxud vətəndaşın sifarişi ilə təmir olmalıdır. Bakı şəhərində liftlərin qırılma halları dəfələrlə baş verib. Yük lifti tikinti materiallarının daşınması üçün nəzərdə tutulmayıb. Çünki bir bina tikilib təhvil verilir. Uzun müddət təmirlər gedir. Orada işləyən usta və fəhlələr öz işini tez bitirmək üçün 1 ton yük götürə biləcək liftə 1,5-2 ton tikinti material yığır. Bu zaman liftin içərisi də zədələnir. Keyfiyyəti aşağı düşür, motorlar yanır. Yük lifti ilə vətəndaş evi üçün əşyalar apara bilər. Bizdə, bəzi dövlət tikinti şirkətləri xaric, mənzillər təmirsiz satılır. Şirkət təmirsiz satırsa, vətəndaş orada yaşaya bilmək üçün mənzili təmir etməlidir. Evin təmiri üçün əlavə pul tələb olunması mülkiyyət hüququnun pozulmasıdır. Bəzən kran olmayanda tikinti materialları fəhlələr tərəfindən daşınır. Yük liftlərində daşınmasına icazə verilmir. Dünya inkişaf edir, tikinti də inkişaf edir. Ev satılıb şirkət qazanc götürübsə, insanlara təmir üçün istənilən şərait yaradılmalıdır. Özümüzdə də bu halların yaşanmaması üçün mənzillər ilkin təmir edilməlidir”.
Günel CƏLİLOVA
