Suraxanı rayonunun Hövsan qəsəbəsində qeydiyyatda olan və hazırda Xəzər rayonu Türkan üzümçülük sovxozunda yaşayan Bayramov Adil Rüstəm oğlu redaksiyamızla əlaqə saxlayaraq, 1 il 9 aydır ki, yeganə oğul övladı Bayramov Rüstəmin müəmmalı şəkildə qətlə yetirildiyini, lakin indiyə qədər qatillərin azadlıqda gəzdiyini bildirdi.
Qeyd edək ki, təxminən bir il bundan əvvəl R.Bayramovun atası A.Rüstəmovun müraciəti əsasında bu barədə yazı hazırlamışdıq. A.Rüstəmovun sözlərinə görə, oğlu 1 il 7 ay imiş ki, “Araz İnşaatçı” MMC-də fəhlə işləyirmiş, eyni zamanda da orada gecə gözətçi qalırmış. “10 oktyabr 2020-ci il tarixində saat 5-də onu aparıb işə qoymuşam, gecə saat 20:54-də oğlum mənə “axran” yoldaşı olan Kərəm adlı şəxsin telefonu ilə zəng edərək “ata, gəlib məni apara bilərsən?” deyib. Mən də ona demişəm ki, oğlum, komendant saatıdır, necə gəlim? Sonra Kərəmlə danışdım, dedim ki, komendant saatıdır, gəlsəm məni saxlayarlar. O da mənə dedi ki, siz gəlməyin, narahat olmayın, oğlunuz mənim yanımdadır. O mənə oğlumdan muğayat olacağına dair söz versə də, sözünə əməl etməyib”.
“Cənab nazir, mənim ümid yerim təkcə sizsiniz, xahiş edirəm canilərin tez bir zamanda tapılmasına göstəriş verəsiniz”
A.Bayramovun dediyinə görə, sözügedən gecə oğlu müəmmalı şəkildə qətlə yetirilib, meyiti iş yerindən kənara atılıb. A.Bayramov onu da qeyd etdi ki, baş verən olayla bağlı Xətai Rayon Prokurorluğunda cinayət işi qaldırılsa da, cinayət işinə burada baxılsa da, sonra oradan alınaraq Baş Prokurorluğa göndərilib: “Xətai rayon Prokurorluğunda işə obyektiv baxılmadı. Baxmayaraq ki, şübhəlilər vardı, mən onların adlarını bir-bir vermişdim, kameraya düşənlər haqda da onların məlumatları vardı. Lakin işə ədalətlə baxılmadığı və cinayətkarın müəyyən edilib tutulması üçün heç bir tədbir görülmədiyinə görə narazılıq etdim. Bu məsələ ilə bağlı cənab Prezidentə rəsmi müraciət etdim. Prezidentə müraciətimdən sonra iş Xətai Rayon Prokurorluğundan alınıb Baş Prokurorluğuna verildi. Hazırda Baş Prokurorluqda araşdırma aparılır. Polis də cinayətkarı axtarır. Mən qəzetiniz vasitəsilə bu işi nəzarətə götürməsi ilə bağlı yenidən daxili işlər naziri Vilayət Eyvazova müraciət etmək istəyirəm. Cənab nazir, mənim ümid yerim təkcə sizsiniz, xahiş edirəm, canilərin tez bir zamanda tapılmasına göstəriş verəsiniz. İnanıram ki, cənab nazir, gözümün ağı-qarası bircə oğlumun qatillərinin tezliklə aşkarlanıb həbs edilməsi barədə göstəriş verəcək, bu məsələni şəxsən nəzarətə götürəcək. Mənim yeganə oğul övladım müəmmalı şəkildə qətlə yetirilib, amma 1 il 9 aydır ki, qatil hələ də azadlıqdadır. Təsəvvür edin ki, nə gecəm, nə gündüzüm var. Bütün günü cinayətkarın tutulması xəbərini gözləyirəm. Evdə də rahatlığım yoxdur. Bircə dərdim odur ki, cinayətkar tapılsın. Polislərimizə güvənirəm, inanıram ki, qatili tapacaqlar. Yoldaşım xəstədir, özüm də yaşamıram, sadəcə nəfəsim gedib-gəlir. Mənim oğlumun günahı nə idi ki, onu o cür qəddarlıqla qətlə yetiriblər? Şübhələndiklərim çoxdur, amma heç biri məsuliyyətə cəlb edilməyib. Amma ona inanıram ki, heç kəs haqq-ədalət məhkəməsindən qaça bilməz, cəzasını mütləq alır”.
Oğlunun qatilləri tutulduqdan və layiq olduqları cəzanı aldıqdan sonra rahat nəfəs ala biləcəyini deyən A.Bayramovun sözlərinə görə, tezliklə qatili barmaqlıqlar arasında görmək istəyir və inanır ki, Azərbaycan polisi, nəhayət, cinayətkarların izinə düşəcək.
Leyla QARAXANLI
