Məlum olduğu kimi, yeni növ koronavirus (COVID-19) infeksiyasının yayılması ilə bağlı ölkə üzrə xüsusi karantin rejiminin 31 avqust saat 00:00-dək tətbiq olunması qərara alınıb. Hazırda 13 şəhər və rayonda (Bakı, Cəlilabad, Gəncə, Masallı, Mingəçevir, Sumqayıt, Yevlax, Abşeron, Bərdə, Goranboy, Göygöl, Xaçmaz, Salyan) tətbiq olunan sərtləşdirilmiş xüsusi karantin rejimi davam edir. Məlum olduğu kimi, avqustun 5-i saat 06:00-dan etibarən sərtləşdirilmiş xüsusi karantin zonasına daxil olan şəhər və rayonlarda şəxslərin yaşayış yerini və olduğu yeri SMS icazə, xidməti vəsiqə, icaze.e-gov.az portalı vasitəsiilə tərk etmək sistemi ləğv olunub.
Nazirlər Kabinetinin qərarı ilə xüsusi karantin rejimi tətbiq olunan ərazilərdə açıq havada olan kafe və restoranların fəaliyyəti də bərpa olunub. Son vaxtlar koronavirusa yoluxma sayı və ölüm hadisələrində azalma müşahidə olunurdu. Ancaq son günlər virusa yoluxma sayı yenidən 3 rəqəmli həddə qalxıb. Avqustun 17-də Azərbaycanda koronavirus (COVID-19) infeksiyasına 124 yeni yoluxma faktı qeydə alınıb, 167 nəfər müalicə olunaraq sağalıb və evə buraxılıb. Avqustun 16-da 112 yoluxma qeydə alınıb.
Koronavirusa yoluxma sayının yenidən artması sərt karantin rejiminin tətbiq olunmasına səbəb ola bilərmi?
“Yoluxma sayının artması davranışlara bağlıdır”
Professor, tibbi ekspert Adil Qeybulla bildirdi ki, son günlər ölkəmizdə koronavirusa yoluxmada artım müşahidə olunması karantinin yenidən sərtləşməsinə səbəb ola bilər: “Avqust ayında bununla bağlı mənzərə tam aydınlaşacaq. Yoluxma sayının artması davranışlara bağlıdır. İnsanlar qapalı məkanlarda maskadan istifadə etməməyə davam edirlər.
Maskası olanlar da ya burundan aşağıda, ya da əllərində saxlayırlar. Xəstəliyin indi subklinik formasında gəzənlər çoxdur. Çünki virus xeyli zəifləyib. Lakin maksimum dərəcədə diqqətli olmaq lazımdır”.
Həmsöhbətimiz onu da əlavə etdi ki, insanlar məsələyə bir qədər laqeyd yanaşırlar. Ciddi karantin tədbirləri görülməsə, itkilərimiz çox ola bilər. O baxımdan bəzi sərt tədbirlər görülməlidir. İnsanların rayonlarda, başqa yerlərdə respirator çatışmazlığı, tənəffüs yolları çatışmazlığından ölüm halları hər il olur: “Məsələn, biz bir neçə ildə bu cür faktlara da rast gəlirdik. Müxtəlif klinikalarda, ev şəraitində dünyasını dəyişənlər olurdu. Qripin özündən hər il xeyli dünyasını dəyişən insan olub. Bəzən indiki koronavirusdan daha çox ölüm halı qeydə alınıb. Bu epidemiya bir panika şəklində başladı, elə panika şəklində də davam edir”.
Müsahibimizin dediyindən belə aydın oldu ki, yoluxma sayında müşahidə edilən artım davam edərsə, sərt karantin rejimi yenidən tətbiq edilə bilər.
Günel CƏLİLOVA
