"Moody's" reytinq agentliyinin MDB-də islahatlara və onun nəticələrinə həsr edilmiş hesabatında deyilir ki, Azərbaycanda dövlət idarəçiliyi səmərəliliyi neft qiymətlərinin aşağı düşməsi nəticəsində ticarət şərtlərinin sürətlə pisləşməsi fonunda yüksəlib. Dövlət idarəçiliyinin səmərəliliyi məsələsində MDB məkanında Azərbaycanın daha öndə olduğu qeyd edilir.
Agentliyin MDB-də islahatlara və onun nəticələrinə həsr edilmiş hesabatında deyilir: “Enerji daşıyıcılarının dünya qiymətlərinin aşağı düşməsi ona gətirib çıxarıb ki, Azərbaycan milli valyutanın dollara olan bağlılığını aradan qaldırıb, bu da xarici şokları bir qədər yumşaltmağa imkan verib. Azərbaycan Mərkəzi Bankı da hazırda uçot dərəcəsinin köməkliyi ilə inflyasiyanın tarqetinq siyasətinin reallaşdırılması prosesindədir. Eyni mexanizmdən istifadə edən Qazaxıstan inflyasiyanın yüksək templə azalmasına və inflyasiya gözləntilərinin daha səmərəli möhkəmlənməsinə nail olur”.
"Moody's" analitiklərinin fikrincə, 2015-2016-cı illərdə Azərbaycan manatının devalvasiyaya məruz qalması ona gətirib çıxardı ki, ölkə yüksək səviyyədə dollarlaşan bank sistemində artan təzyiqlə üzləşdi: “Bu təzyiq bank sektorunda islahatlara, yeni makroprudensial tədbirlərə və qanunverici təşəbbüslərə səbəb oldu. Hökumət neft gəlirlərinin dayanıqlı olmasını nəzərə alaraq iqtisadiyyatın şaxələndirilməsi üzrə səyləri bərpa edib. Biz gözləyirik ki, 2019-cu il yanvarın 1-dən Azərbaycanda tətbiq edilən vergi qanunvericiliyi büdcənin qeyri-neft kəsirini tədricən azaldacaq”.
Görünən odur ki, Azərbaycanda dövlət idarəçiliyi səmərəliliyi əhəmiyyətli dərəcədə artaraq MDB məkanında ən üstün səviyyəyə çatıb. O baxımdan ümumən bu göstəricinin əhəmiyyətini ekspertlər necə dəyərləndirir?
Fikrət Yusifov: “Beynəlxalq qurumlar müqayisə aparırlar və görürlər ki, Azərbaycanda idarəçilik daha yaxşı qurulub”
Məsələyə münasibət bildirən iqtisad elmləri doktoru Fikrət Yusifovun sözlərinə görə, MDB məkanında Azərbaycanda dövlət idarəçiliyi səmərəliliyinin artması aparılan uğurlu islahatlarla bağlıdır: “Məsələ ondadır ki, neftin kəskin ucuzlaşmasından sonra ölkədə qeyri-neft sektorunun inkişafı ilə bağlı islahatlara start verildi. İslahatlar çərçivəsində atılan addımlar, hazırlanan yol xəritələri, qəbul edilən qərarlar qeyri-neft sektorunun inkişafına stimul verdi. Eyni zamanda, dövlət idarəçiliyində səmərəliliyi yüksəltdi. Yəni bu qərarların qəbul edilməsi, ona müvafiq addımların atılması beynəlxalq ictimaiyyətin gözü qarşısında baş verirdi. Beynəlxalq qurumlar müqayisə aparırlar və görürlər ki, Azərbaycanda idarəçilik daha yaxşı qurulub. Ona görə də MDB məkanında bu sahədə ən üstün yer Azərbaycana verilir. Nəzərə almaq lazımdır ki, islahatlar nəticəsində biznes sahəsində fəaliyyətin qeydə alınması xeyli asanlaşıb və bununla bağlı prosedurlar sadələşdirilib. Bir sıra qurumların fəaliyyətinin “ASAN Xidmət”də təmərküzləşməsi bu baxımdan mühüm əhəmiyyət kəsb edir. Dövlətlə hüquqi və fiziki şəxs arasında münasibətlərin həlli, prosedurların nəzərə çarpacaq dərəcədə qısaldılması Azərbaycanın üstün yerdə qərarlaşmasını təmin edən faktorlardan biridir. Hesab edirəm ki, bu bizim uğurumuzdur”.
Vidadi ORDAHALLI
