Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov Gəncədə ötən il baş vermiş terror aktlarının ildönümü ilə bağlı açıqlama verib.
Açıqlamada bildirilir ki, Azərbaycan dövlətçiliyinə qarşı qəsd aktı kimi dəyərləndirilən Gəncə hadisələrindən bir il ötür: “Keçən müddətdə aparılmış istintaq tədbirləri nəticəsində ortaya çıxan faktlar bir daha təsdiqlədi ki, Gəncə hadisələri bəzi dövlətlərin radikal klerikal dairələrinin, separatçıların və ölkə daxilində siyasi fəaliyyət pərdəsi altında şəxsi ambisiyalarını həyata keçirmək istəyən qrupların dövlət və milli maraqlarımıza qarşı birgə məkrli təxribatı idi. Mediada, xüsusən sosial mediada geniş yayılmış məlumatlardan görünür ki, həmin qüvvələrin ötən il reallaşdırmağa çalışdıqları ssenarinin puç edildiyi, vətəndaşlarımızın dövlətçiliyin keşiyində durduğunu nümayiş etdirdiyi Gəncə hadisələrinin ildönümü ilə əlaqədar üzvlərinin əksəriyyətini Azərbaycanın keçmiş vətəndaşları təşkil edən, radikal islamçı qruplaşmalardan biri yenidən fəallaşıb.
Qruplaşmanın sosial şəbəkələrdəki səhifə və profillərində, habelə bəzi dövlətlərin klerikal dairələri tərəfindən idarə olunan saytlarda fəallaşması birmənalı olaraq ifrat dini radikallığın, fundamentalizmin dəstəklənməsi kimi dəyərləndirilə bilər.
Dini şüarlarla pərdələnən, təxribatçı, niyyəti dövlətlə xalq arasında inamsızlıq, mümkün olarsa düşmənçilik toxumları səpmək olan bəzi internet resurslarında Gəncədə törədilmiş terror aktının əsas personajı, Rusiya vətəndaşı Yunis Səfərovun Suriyada döyüşlərdə iştirakını təsdiqləyən kadrlar nümayiş etdirilir və onu əsl “qəhrəman” kimi populyarlaşdırmağa cəhdlər olunur, xanımının hadisədən dərhal sonra etdiyi müraciət təkrar-təkrar yayımlanır.
Təəssüf doğuran odur ki, özlərinin demokrat və dünyəvi dövlət tərəfdarı olduqlarını iddia edən bəzi müxalifət liderləri və fəalları da terroru təşviq edən belə bir kampaniyaya dəstək verir, ifrat ekstremizmi özünə ideologiya seçmiş xarici qruplaşmaların istifadə etdiyi şüarları təkrarlayır, bu səpkidə çağırışlar səsləndirir, ölkəmizin çoxəsrlik dini dözümlülük mühitini, tolerant imicini şübhə altına alırlar”.
Əli Həsənov bildirir ki, demokratiya dəyərlərinə sadiq olduğunu iddia edən bu tip müxalifətin, əslində, həmin dəyərlərə qənim kəsilənləri, radikalizmi, ifrat dini fundamentalizmi dəstəklədiyi göz önündədir: “Belədirsə, həmin müxalifətə, görəsən, hansı Azərbaycan gərəkdir? Dünyanın inkişaf etmiş ölkələri sırasında yer alan, sabit, qüdrətli və demokratik Azərbaycan, yoxsa Sudan, Somali, Liviya, Suriya və s. ölkələr kimi amansız daxili savaşın, qanlı xaosun, faciəvi vətəndaş qarşıdurmasının və terror qruplaşmalarının tüğyan etdiyi poliqon? Bəlkə onlar Azərbaycanı orta əsrlərin qaranlıq dövrünə qaytarmaq, ölkəmizi şəriət qanunları ilə idarə olunan məkana çevirmək istəyirlər?”
Prezidentin köməkçisi açıqlamasının sonunda bildirir ki, dövlətin təhlükəsizliyi və milli mənafelər heç bir zaman, heç bir vəchlə və ya şərtlə müzakirə mövzularına çevrilməməlidir: “Bəhs etdiyim dəyərlərə kiçik də olsa, təhdid yaranarsa, hər bir azərbaycanlı vətəndaş mövqeyi, milli iradə ortaya qoymalıdır. Mövcud həssas vəziyyətdə cəmiyyətimiz qətiyyət və sayıqlıq, vətəndaşlarımız milli dövlətçilik naminə sıx birlik nümayiş etdirməli, ictimai rəyə təsir imkanları olan ziyalılarımız daha düşünülmüş şəkildə və həssas davranaraq, konkret insanlara bəslənən münasibətlə Vətənin mənafeləri və dövlətin maraqlarını bir-birindən fərqləndirməlidirlər”.
Göründüyü kimi, Prezidentin köməkçisi bir il əvvəl baş verən Gəncə hadisələrinin ətraflı izahını verir. Həmin hadisələrin, əslində, ölkəmizə qarşı xarici dini-radikal qrupların təşkil etdiyi bir təxribat olduğunu bildirir. Burada bəzi siyasilərin, hətta media orqanlarının rolundan da danışır. Gəncə hadisələri ilə bağlı verilən bu izah Azərbaycana qarşı təşkil edilmiş dünya miqyaslı şəbəkənin təzyiqi barədə nə dərəcədə ətraflı rəy formalaşdırmış olur?
Qabil Hüseynli: “Əli müəllim çox doğru olaraq vətəndaşlarımıza bu cür həssas məsələlərdə ayıq olmağı tövsiyə edir”
Politoloq Qabil Hüseynli “Bakı-Xəbər”ə açıqlamasında bildirdi ki, Əli Həsənovun bu məsələ ilə bağlı verdiyi izah konkret faktlara və çox dərin, ümumiləşdirilmiş məlumatlara əsaslanır: “Əli Həsənov bu faktları əlinin altında olan məlumatlara əsaslanaraq sadalayıb. Burada söhbət həm də o məlumatları sadə xalqa lazım olan dildə çatdırmaqdan gedir. Bu baxımdan izahı mükəmməl sayıram. Həmin hadisələrdə əli olan şəxslərin istintaq zamanı verdiyi ifadələrdə də biz həmin yazıda sadalanan faktların təsdiq edildiyinin şahidi oluruq. Əli müəllim hadisələrin başvermə səbəbləri, bu məsələdə qızışdırıcı mövqe tutanlar, xarici qüvvələrin səylərindən ətraflı və konkret faktlar əsasında bəhs edib. Artıq tam sübuta yetdi ki, bəzi dairələrin “qəhrəman” kimi qələmə verməyə çalışdığı Yunus Səfərov İranda təlim keçib, hətta Suriyada vuruşub. Bu bir daha sübut edir ki. hadisənin qızışdırılmasında dini radikal elementlərin və onların xaricdəki ideoloqlarının ciddi işbirliyi olub. Mən Gəncənin keçmiş rəhbərliyinin fəaliyyətini də təqdir etməmişəm. Onun əhali ilə sərt rəftarı şəhərdə ciddi narazılıq yaratmışdı. Bundan da xarici xüsusi xidmət orqanları məharətlə istifadə edə bildilər. Amma hansısa narazılıq dövlətin təyin etdiyi məmurla belə sərt üsullarla haqq-hesab çəkilməsinə əsas vermir. Gördünüz ki, hadisələr yalnız icra başçısına atılan güllə ilə yekunlaşmadı. Sonra şəhər meriyasının qarşısına çıxan radikal kütlə iki polis zabitimizi qətlə yetirdi. Bütün bunlar göstərdi ki, ölkəmizə qarşı məkrli bir təxribat hazırlanmışdı. Çox şükürlər olsun ki, güclü dövlətimiz və onun fədakar vətəndaşlarının səyi nəticəsində onların praktiki hərəkət planlarının həyata keçməsinə imkan verilmədi. Əli müəllim çox doğru olaraq vətəndaşlarımıza bu cür həssas məsələlərdə ayıq olmağı tövsiyə edir, daim dövlətin yanında olmağı məsləhət görür. Doğru izahdır. Hesab edirəm ki, vətəndaşlarımız bundan ciddi nəticələr çıxaracaqlar”.
Məhəmmədəli QƏRİBLİ
