İyulun 8-də ABŞ Nümayəndələr Palatası konqresmen Cudi Çunun Dağlıq Qarabağla bağlı təklif etdiyi düzəlişləri müzakirə edəcək. Müzakirə edilməsi gözlənilən sənəd Dağlıq Qarabağdakı qoşunların təmas xəttində müşahidə mexanizmləri və ATƏT missiyasının müşahidəçilərinin artırılması, snayper və ağır texnikaların geri çəkilməsi ilə bağlı təklifləri nəzərdə tutur.
Məlumatı Ermənistan KİV-i yayıb. Onlar qeyd edirlər ki, bu layihə qəbul ediləcəyi təqdirdə sülh danışıqları istiqamətindəki səylər intensivləşər və tərəflər arasındakı kommunikasiya imkanlarını daha da yaxşılaşdırar.
Çox maraqlıdır ki, ABŞ-dan irəli sürülən bu təkliflər atəşkəsin saxlanması və sülhdə irəliləyişin əldə edilməsi üçün nəzərdə tutulsa da, bizim maraqlarımıza birbaşa ziddir. Bu layihənin reallaşması mümkündürmü və ABŞ-dan niyə belə cəhdlər olunur?
Akif Nağı: “Məqsəd də status-kvonu qoruyub saxlamağa xidmət edir”
Qarabağ Azadlıq Təşkilatının sədri Akif Nağı “Bakı-Xəbər”ə bildirdi ki, Nümayəndələr Palatasında irəli sürülən bu təklif birbaşa Ermənistan maraqlarına uyğundur: “Ermənilər bütün danışıqlarda bu tələbləri irəli sürürlər. Məqsəd də status-kvonu qoruyub saxlamağa xidmət edir. Ermənistan bununla addım-addım işğal faktorunu unutdurmağa çalışır. Bilirik ki, ABŞ-da ermənipərəst konqresmenlər çoxdur. Onlar tez-tez ermənilərin xeyrinə olan belə layihələri müzakirəyə çıxarmağa cəhd edirlər. Bu da onların növbəti cəhdidir. Təklif olunan düzəlişlərin keçib-keçməyəcəyi barədə nəsə deyə bilmərəm. Hər halda, ABŞ-ın özündəki qüvvələr də məsələyə ayıq başla yanaşmalıdırlar. Oradakı konqresmenlərin arasında Azərbaycanın dostları da var. Onlar da çox fəal fəaliyyət göstərirlər. Ola bilsin ki, sayları ermənilər qədər deyil, amma ortada fəaliyyət mövcuddur. Onlar da bu zərərli düzəlişlərin keçməməsi istiqamətində səylərini göstərməlidirlər. Azərbaycan hətta rəsmi səviyyədə, oradakı səfirliyimizin əli ilə bu məsələyə kəskin etirazını bildirməlidir. Bir faktı da qeyd edim ki, hətta orada hər hansı düzəliş qəbul edilsə belə, onun tətbiqi mümkün deyil. Çünki münaqişənin həlli ilə bağlı səlahiyyətli mandat ABŞ-dakı konqresmenlərin və ya hansısa palatanın əlində deyil. Azərbaycan tərəfi dəfələrlə bəyan edib ki, həmin təkliflərlə razı deyil. Biz bildiririk ki, Ermənistan işğalçı siyasətindən əl çəksə, bütün problemlər öz həllini tapacaq. Azərbaycan rəsmiləri snayperlərin geri çəkilməsi ilə bağlı təklifin kökündən araşdırılmasını tələb edir. “Ermənistan snayperi Azərbaycan torpağında nə edir ki, indi də ona təhlükə yaransın” kimi sualı onlara veririk. Bunun qarşısında aciz qalırlar. ABŞ bir həmsədr ölkə kimi problemin həllinə kökündən yanaşmalıdır. Bu baxımdan da ermənipərəst konqresmenin təkliflərinin heç bir hüquqi təsir mexanizmi olmayacaq. Sadəcə, bu cür təklifləri gündəmə gətirməklə erməni lobbisindən aldıqları pulları silirlər. Guya hansısa bir işi gördüklərinə dair rəy formalaşdırırlar. Bu daha çox informasiya savaşı üçün nəzərdə tutulmuş addımdır”.
Məhəmmədəli QƏRİBLİ
