Ermənistanın xüsusi xidmət orqanları Baş nazir Nikol Paşinyanın sosial şəbəkələrdə yayılmış məktubunun müəllifini axtarırlar. NATO-nun baş katibi Yens Stoltenberqə ünvanlanmış məktubda Ermənistan hökumətinin başçısı Şimali Atlantika Alyansı ilə daha sıx əməkdaşlığa hazır olduğunu və Dağlıq Qarabağ münaqişəsinin bunun qarşısında ən böyük əngəl təşkil etdiyini bildirir.
O, bu kontekstdə guya ilin sonunadək “erməni qoşunlarını Dağlıq Qarabağdan çıxaracağını” vəd edib. Məktubda Ermənistan qoşunlarının münaqişə zonasından çıxarılacağı və Dağlıq Qarabağın Azərbaycanın nəzarətinə veriləcəyinə dair ümumxalq referendumu keçiriləcəyi barədə fikirlər də yer alıb.
Erməni tərəfi bildirir ki, bu məktubu ilk dəfə informasiya təhlükəsizliyi üzrə ekspert Samvel Martirosyan aşkar edib. O bildirib ki, yüksək ehtimalla məktubun mətni Ermənistanın hüdudlarından kənarda hazırlanıb. Ermənistan milli təhlükəsizlik xidmətinin mətbuat katibi Samson Qalstyan isə bu vəziyyəti şərh etməkdən imtina edib.
Ermənistan Xarici İşlər Nazirliyinin rəsmisi məktubun feyk olduğunu təsdiq edib, lakin onu şərh etmək istəməyib.
Kibertəhlükəsizlik üzrə ekspert Martirosyan qeyd edib ki, məktub çox savadlı hazırlanıb. Paşinyanın mətbuat katibi də bu məsələ ilə bağlı jurnalistlərin suallarını cavablandırmayıb. Ermənistan tərəfi məktubun feyk olması ilə bağlı iddialarını çox gec irəli sürüb. Bu məlumat Rusiya KİV-ində tirajlanandan bir neçə gün sonra Ermənistanın mövzunu rəsmən təkzib etməsi nəbzi yoxlamasıdır, yoxsa…
Hatəm Cabbarlı: “Məzmunda olduqca radikal addımlardan söz açılır ki, bunu da Paşinyan etmək gücündə deyil”
Siyasi elmlər doktoru Hatəm Cabbarlı “Bakı-Xəbər”ə bildirdi ki, bu məsələ bir neçə gündür sosial şəbəkələrdə və siyasi dairələrdə geniş müzakirə edilir: “Əslində, məktubun Nikol Paşinyan tərəfindən göndərilmə ehtimalı olduqca az idi. Artıq bunun saxta sənəd olduğu müxtəlif mənbələr tərəfindən təsdiq olunub. Ermənistan və bölgədəki vəziyyətin gərginliyi fonunda bu məzmunda məktubun niyə məhz indi dövriyyəyə buraxılması maraqlı görünür. Ermənistan Nikol Paşinyan hakimiyyətə gələndən sonra Rusiya ilə daha məsafəli davranmağa çalışır. İstqamətini daha çox Qərb institutlarına doğru götürür. Məktubun məzmununa diqqət yetirdikdə görürük ki, Paşinyanın NATO-ya üzv olmaq istəyi xüsusi vurğulanır. Eyni zamanda, bunun qarşısındakı əsas maneənin Dağlıq Qarabağ konflikti olduğu bildirilir. Məktubda həm də cari ilin sonuna qədər Ermənistanın Dağlıq Qarabağdan ordusunu çəkmək istəyi də yazılır. Ermənistanın real mövqeyi ilə məktubda yazılanları tutuşduranda, yazılanların həyata keçməsinin mümkünsüzlüyünə şübhə qalmır. Ermənistan rəsmilərinin məktubun saxta olduğunu dərhal deyil, iki gün sonra təkzib etməsi isə bir başqa mövzunun söhbətidir. Onda isə bu saxta məktubun kim tərəfindən yazılması çox maraqlıdır. Böyük ehtimalla demək olar ki, bunu Nikol Paşinyanın hakimiyyətdə qalmasını istəməyən qüvvələr təşkil edə bilər. Hesab edirəm ki, məktub daha çox Ermənistan-Rusiya münasibətlərini gərginləşdirməyə hesablanıb. Həm də Nikol Paşinyanın Ermənistan daxilindəki nüfuzuna xələl gətirmək məqsədi üçün ortaya atılıb. Məktubun saxta olduğu qeyd edilsə də, onun ətrafında düşündürücü məqamlar çoxdur. Bölgədə, xüsusilə də Gürcüstanda anti-Rusiya çıxışlarının aktivləşdiyi dönəmə təsadüf etməsi də olduqca maraqlıdır. Böyük ehtimalla burada məqsəd Ermənistanın daxili ictimai-siyasi həyatını gərginləşdirmək olub. Məzmunda olduqca radikal addımlardan söz açılır ki, bunu da Paşinyan etmək gücündə deyil. Amma bununla Ermənistan vətəndaşlarının qəlbində Paşinyana qarşı mənfi mənada bir iz sala bildilər”.
Məhəmmədəli QƏRİBLİ
