Rusiya Təhlükəsizlik Şurasının sədr müavini Rəşid Nurqəliyev NATO-nu Kollektiv Təhlükəsizlik Müqaviləsi ölkələrində “rəngli inqilab”lar hazırlamaqda ittiham edib.
Onun sözlərinə görə, NATO-nun bu planı Rusiyaya məlumdur: "Bizim üçün sirr deyil ki, NATO-çular Qərbin nəzarətində olan rejimlərin hakimiyyətə gətirilməsinə hazırlaşır".
TŞ rəsmisinin sözlərinə görə, bu zaman qüvvədə olan planlardan biri də “rəngli inqilab”lardır.
Xatırladaq ki, 1992-ci ildə Kollektiv Təhlükəsizlik Müqaviləsini Ermənistan, Qazaxıstan, Qırğızıstan, Rusiya, Tacikistan, Belarus və Özbəkistan imzalayıb.
Rusiyanın kifayət qədər yüksək rütbəli və məlumatlı şəxsi tərəfindən verilən bu informasiya düşünmək üçün ciddi əsaslar yaradır. NATO daha çox bu cür “rəngli inqilab”ları hansı KTMT ölkələrində keçirməkdə maraqlı olar?
Qabil Hüseynli: “Nə qədər ki, Tramp hakimiyyətdədir, biz dünyanın heç bir ölkəsində “rəngli inqilab”ın həyata keçdiyinin şahidi olmayacağıq”
Politoloq Qabil Hüseynli “Bakı-Xəbər”ə bildirdi ki, deyilənlər o qədər də inandırıcı görünmür: “Burada Rusiya rəsmisi başqa məqsədi güdüb. “Rəngli inqilab”lar ideyasını NATO ilə əlaqələndirmək qəribə səslənir. Çünki biz bilirik ki, bu tip ideyaların müəllifi hər zaman ABŞ olub. Bütün plan oradan hazırlanıb, maliyyəni də ora ayırıb. ABŞ, bir çox hallarda, bu istəklərinə nail də ola bilib. Tramp hakimiyyətə gələndən sonra isə bu ənənəni tamamilə məhv etdi. Demək olar ki, onun prezidentliyində biz dünyada ABŞ-ın dirijorluğu ilə belə bir hadisənin baş verdiyinin şahidi olmamışıq. Bu gündən sonra bənzər hadisənin baş verə biləcəyini ehtimal etmirəm. ABŞ Prezidenti açıq etiraf edib ki, bu cür layihələr çox böyük pullar aparır. Əsaslandırıb ki, həmin pulların xərclənməsi ABŞ xalqının maddi durumuna mənfi təsir edir. Ən maraqlısı isə budur ki, ABŞ-ın daxilində Trampın bu çağırışları müsbət qarşılanır. NATO qısa zaman intervalında belə layihələri həyata keçirmək gücündə deyil. Çünki qurumun bu sahədə təcrübəsi, demək olar ki, yoxdur. Hesab edirəm ki, Rusiya rəsmisi bu açıqlaması ilə KTMT-nin əhəmiyyətini artırmaq istəyib. Ora üzv olan ölkə başçılarına Rusiyanın ətrafında daha sıx birləşməyin zəruriliyinə dair mesaj verib. Çünki son vaxtlar Ermənistan və bəzi ölkələrin davranışında mərkəzdənqaçma meylləri nəzərə çarpır. Artıq Putin və Rusiyanın digər liderləri də KTMT-ni dünyanın ən güclü hərbi qurumu kimi təqdim edirlər. Sübut etməyə çalışırlar ki, dünyanın idarə olunmasında bir qütb yoxdur. Buna görə də hesab edirəm ki, Nurqəliyevin açıqlaması daha çox siyasi maraqlara hesablanıb və ciddi materiallara söykənməyib. Nə qədər ki Tramp hakimiyyətdədir, biz dünyanın heç bir ölkəsində “rəngli inqilab”ın həyata keçdiyinin şahidi olmayacağıq. Çünki bunların həyata keçməsi üçün külli miqdarda pul lazımdır. Tramp da həmin pulu xərcləmək istəmir”.
Məhəmmədəli QƏRİBLİ
