Son vaxtlar Ermənistanda Paşinyan rejimi ilə qondarma “DQR” arasındakı münasibətlərdə yaranmış ziddiyyətin açıq müstəviyə qədəm qoyduğunun şahidi oluruq. Artıq qondarma qurumun rəhbəri Bako Saakyanın Köçəryanın işi üzrə istintaqa cəlb edildiyi, hətta ifadəsinin alındığı bildirilir.
Vəziyyət o yerə gəlib ki, Paşinyan artıq qondarma qurumun rəhbərliyini kimə həvalə edəcəyini də müəyyənləşdirib. Erməni KİV-inin yazdığına görə, hazırda Ermənistanın baş hərbi müfəttişi olan Akopyan həmin “seçkilərdə” şəxsən Paşinyanın və İrəvanın namizədi ola bilər.
Ermənistanın Baş naziri Nikol Paşinyan Azərbaycanın işğal altındakı Dağlıq Qarabağ bölgəsində gələn il keçiriləcək “prezident seçkilərində” general Movses Akopyanın namizədliyini dəstəkləməyə hazırlaşır. Paşinyanın birbaşa nəzarətində olan “Jamanax” qəzeti yazır:
“Paşinyan başa düşür ki, general Vitali Balasanyan və onun ətrafında cəmləşən qruplaşmaya ancaq həmin qrupa qarşı çıxmaqdan çəkinməyən, onların təhdidlərinə boyun əyməyən biri qalib gələ bilər”.
Qeyd edək ki, general Movses Akopyan Dağlıq Qarabağda “müdafiə naziri” olub, daha sonra Ermənistan Silahlı Qüvvələrinin Baş Qərargah rəisi təyin edilmişdi. 2016-cı ilin aprel müharibəsindən sonra Akopyan da Müdafiə Nazirliyinin rəhbərliyində yer alan bir sıra generallarla birlikdə vəzifəsini itirdi. O vaxtkı prezident Serj Sarkisyan onu Baş Qərargah rəisi vəzifəsindən uzaqlaşdırıb baş hərbi müfəttiş təyin etdi.
Paşinyanın bu istəyi reallaşa bilərmi?
Aqşin Əliyev: “Paşinyan həmin vaxta kimi hakimiyyətini qoruyub saxlaya biləcəksə…”
Ekspert Aqşin Əliyev qəzetimizə bildirdi ki, qondarma rejimin sabiq və indiki “prezidentləri” Qukasyan və Saakyanın Köçəryanın həbsdən çıxarılması ilə bağlı göstərdikləri çabalardan sonra vəziyyət çox dəyişdi: “Ermənistan hakimiyyəti ilə “Qarabağ klanı” arasındakı ziddiyyətlərin kəskin xarakter aldığı və münasibətləri bərpa etməyin mümkünsüzlüyü bir daha yəqinləşdi. Ermənistanın keçmiş prezidenti Robert Köçəryanın yenidən həbs edilməsi bunun bariz nümunəsidir. N.Paşinyan 2020-ci ildə Dağlıq Qarabağ separatçılarının başına özünə sadiq adamı “prezident” gətirmək planı üzərində işlədiyindən, klanın liderlərini neytrallaşdırmaqda israrlıdır. Paşinyan hakimiyyəti yaxşı bilir ki, onlarla mübarizə aparan klanın əsas qalası “DQR”dir. Çünki uzun müddətdir Ermənistanı da oradan çıxan, hətta “DQR”ə rəhbərlik etmiş şəxslər idarə edib. Paşinyan bilir ki, Köçəryanı həbs etdirməklə özünə qarşı olan müxalifəti tam zərərsizləşdirmiş olmur. Təsadüfi deyil ki, məhz bu qarşıdurmanın fonunda, Paşinyan və “DQR” rəhbərliyi bir-birini cəbhədə xəyanət edə biləcəyində ittiham etmişdilər. Paşinyan bundan çox ehtiyat edir. Bu səbəbdən də orada öz namizədi kimi hərbçini görür. Planı bundan ibarətdir ki, yalnız qondrama “DQR”də möhkəm nizam intizam yaratmaqla buna nail olmaq mümkündür. Ancaq oradakı rəhbərliyin dəyişməsi yalnız Paşinyanın istəyinə bağlı olan məsələ deyil. Hər zaman “DQR”ə rəhbərlik edəcək şəxslər Rusiya ilə razılaşdırılıb. Hələ ki, 2020-ci ilə çox var. Ermənistandakı hadisələrin bu axarla davamı Paşinyanın özünün o vaxta kimi hakimiyyətdə qalacağını şübhə altına salır. Bundan əlavə, Paşinyanın “DQR”dəki nüfuzu elə də yüksək deyil ki, istədiyi adamı orada rəhbər təyin etsin. Paşinyan həmin vaxta kimi hakimiyyətini qoruyub saxlaya biləcəksə, onda 2020-ci ildəki “DQR” rəhbərliyi uğrunda mübarizə əsl qarşudurmaya çevriləcək. Köhnə klan “son qalası” uğrunda vuruşacaq. Onu heç vəchlə Paşinyana asan təhvil verməyəcək. Paşinyan oradakı rəhbərliyi ələ keçirə bilsə, onda öz hakimiyyətinin ömrünü bir az da uzatmış olacaq”.
Məhəmmədəli QƏRİBLİ
