ABŞ və Rusiya prezidentləri Donald Trampla Vladimir Putin Yaponiyanın Osaka şəhərində keçirilən “G20” sammiti çərçivəsində görüşüblər. Tramp Rusiya Prezidenti ilə nüvə silahsızlanması, ticari və siyasi mövzularda aparılan danışıqların müsbət nəticələnəcəyinə ümid etdiyini bildirib: “Düşünürəm ki, bu görüşün nəticələri əla olacaq”.
V.Putin, öz növbəsində, bildirib: “Bütün mövzular qeyd olunur, Helsinkidə keçirilən görüşdən sonra bir-birimizi uzun müddət görməmişik. Əməkdaşlarımız işlədilər və bizə Helsinkidəki razılığımızı davam etdirmək üçün yaxşı fürsət verildi”.
Danışıqlarda Rusiya tərəfindən xarici işlər naziri Sergey Lavrov, maliyyə naziri Anton Siluanov, Prezidentin köməkçisi Yuri Uşakov, Prezidentin mətbuat katibi Dmitri Peskov, Amerika tərəfindən isə dövlət katibi Mayk Pompeo, maliyyə naziri Stiv Mnuçin, Ağ Ev aparatının rəhbəri İk Malveyni, Prezidentin milli təhlükəsizlik üzrə köməkçisi Con Bolton, Ağ Evin mətbuat katibi Stefani Qrişem iştirak ediblər.
Təxminən 90 dəqiqə davam edən görüşdə dünya liderləri İran, Suriya, Venesuela və Ukraynadakı vəziyyəti müzakirə ediblər. Qeyd edilir ki, tərəflər görüşdən razı ayrılıblar. Əksər poilitoloqlar hesab edir ki, Yaponiyada keçirilən görüşdə tərəflər aralarındakı ziddiyyətləri bir qədər yumşalda bilib.
Yaponiyada Putinlə Tramp arasında görüşdə aranın bir az düzəlməsi, ABŞ-Rusiya münasibətlərinin yaxşılaşması Qarabağ probleminin həlli baxımından hansı yeni perspektiv açır, ya dəyişiklik vəd edir?
Qabil Hüseynli: “Həmin konkret nəticələr olacağı halda, biz Qarabağ probleminin həlli ilə bağlı optimist düşünə bilərik”
Politoloq Qabil Hüseynli “Bakı-Xəbər”ə bildirdi ki, həmin danışıqlarda Cənubi Qafqaz və Qarabağ münaqişəsi müzakirə mövzusu olmayıb: “Rusiya ilə ABŞ arasında olan gərginliyin aradan qaldırılması, münasibətlərin yaxşılaşdırılması barədə məlumat yayılıb. Əlbəttə, iki dövlət arasındakı gərginliyin azaldılması bizim üçün də əhəmiyyətlidir. Çünki bu münasibətlər postsovet məkanında olan dondurulmuş münaqişələr və Dağlıq Qarabağ probleminin həllinə də təsir edə bilər. Bu məsələdə həddindən artıq optimist olmağa da dəyməz. Çünki Tramp Şimali Koreya lideri ilə danışdıqları ilə bağlı necə mühakimə yürüdürsə, Putinlə bağlı da eynilə edir. Münasibətlərin yaxşı olacağına inanmaq üçün tərəflər ciddi addımlar atmalıdır. ABŞ sanksiyaları aradan qaldırmalıdır, Rusiya isə işğal etdiyi və ya işğalına yardımçı olduğu ərazilərdən geri çəkilməlidir. Bura Ukrayna, Gürcüstan və Azərbaycanın da ərazi bütövlüyünün bərpası aiddir. Hələlik bu istiqamətlər üzrə tərəflər arasında ciddi razılıq əldə olunmayıb. Hesab edirəm ki, bu məsələdə tələsik rəylər vermək lazım deyil. Çünki Putin görüşə gedərkən yeni silahlarla bağlı bir çarx təqdim etdi. Bunun özü ABŞ-a əzələ nümayişi idi. Görünən budur ki, silahlanma Rusiya tərəfindən tam gücü ilə aparılır. Sülh əldə olunursa, bu nəyə lazımdır? Danışıqların nəticəsi ilə bağlı dünyada təhlükəsizliyin təmin olunmasının vacibliyinə dair ritorik ifadələrdən istifadə edilib. 90 dəqiqə ərzində hansısa ciddi nəticənin əldə olunduğuna inanmıram. Danışıqların xoş əhval-ruhiyyədə keçməsi gələcək danışıqlarda fundamental məsələlərlə bağlı razılığın əldə olunmasına köməklik edəcək. Həmin konkret nəticələr olacağı halda, biz Qarabağ probleminin həlli ilə bağlı optimist düşünə bilərik”.
Məhəmmədəli QƏRİBLİ
