Rusiya Dövlət Dumasının deputatı, MDB ölkələri institutunun rəhbəri, “Lazarev klubu”nun koordinatoru Konstantin Zatulin erməni-rus əlaqələrini şərh edərkən deyib ki, iki ölkə münasibətləri Nikol Paşinyanın komandasının bacarıqsızlığından əziyyət çəkir: “Paşinyanın komandası Ermənistanda yeni siyasi qeyri-sabitlik təhlükəsi yaradır. Qeyd edilən hadisələrə görə tam qarşılıqlı anlaşma və əminlik haqqında danışmaq mümkün deyil”.
Onun sözlərinə görə, hazırda erməni-rus əlaqərinin bütün arxitekturası seysmiklik üzərində ifadə edilir: “Paşinyanın komandasının kifayət qədər olmayan yurisdiksiyası və siyasi yanaşması Ermənistanda yeni siyasi qeyri-sabitlik təhlükəsi yaradır. KTMT baş katibinin geri çağırılması məsələsi Rusiya və Ermənistan üçün vacib strateji birliyin nüfuzuna və konkret fəaliyyət proqramlarına zərbə vurdu. Yuxarıda qeyd edilən hadisələrə görə tam qarşılıqlı anlaşma və əminlik haqqında danışmaq mümkün deyil. Əlbəttə, bu, müxtəlif qaydada erməni-rus əlaqələrinin bütün arxitekturasının seysmikliyi üzərində ifadə edilir”.
Göründüyü kimi, Paşinyan Baş nazir olandan sonra Rusiya-Ermənistan münasibətlərində yaşanan soyuqlaşma, pisləşmə müxtəlif formada özünü göstərir. Vəziyyət o yerə gəlib çatıb ki, hətta “Lazarev klubu” da Paşinyana qarşı əks cəbhədə yer alır və bunu açıq formada bəyan etməkdən çəkinmir. Qeyd edək ki, sözügedən siyasi klubda Rusiyanın bir sıra ermənipərəst siyasiləri təmsil olunurlar. O baxımdan, “Lazarev klubu”nun da Paşinyana qarşı əks cəbhədə yer almasını ekspertlər necə dəyərləndirirlər?
Elşən Manafov: “Məsələnin kökündə Cənubi Qafqaz uğrunda getdikcə güclənməkdə olan rəqabət dayanır”
Məsələyə münasibət bildirən politoloq Elşən Manafovun sözlərinə görə, Zatulinin səsləndirdiyi tənqidi fikirlər təsadüfi deyil: “Məsələnin kökündə Cənubi Qafqaz uğrunda Rusiya və Qərb arasında getdikcə güclənməkdə olan rəqabət durur. Bir müddət əvvəl Gürcüstanda baş verən hadisələrin kökündə də bir sıra ekspertlər Kremlin barmağının olduğunu qeyd edirlər. Cənubi Qafqaz uğrunda mübarizə, bütövlükdə, Mərkəzi Asiya bazarlarına çıxmaq uğrunda mübarizə kimi qiymətləndirilir. Bu mübarizə həm də Ermənistanda daha çox Rusiyanın maraqlarını təmsil edən iqtidarın hakimiyyətdən kənarlaşdırılmasını nəzərdə tutur. Nəticə etibarilə Qərbin maliyyə və dolayısı olaraq siyasi dəstəyi şəraitində Ermənistanda Paşinyan hakimiyyət başına gəldi. Paşinyanı hakimiyyətə gətirən Qərb dairələri ondan növbəti addımların atılmasını gözləyirdilər. Ancaq bu baş vermədi. Bu səbəbdən Paşinyan hakimiyyətə gələndən sonra Qərb ona ciddi dəstək verməyib. Bu dəstək hələ ki, siyasi dəstəkdən o tərəfə keçmir. Ciddi maliyyə kreditlərinin ayrıldığını müşahidə etmirik. Səbəbi onunla bağlıdır ki, Paşinyan birmənalı Qərbpərəst siyasət yeritmir. Bu da Rusiyanın Ermənistanda olan təsir imkanları ilə bağlıdır. Ermənistan iqtisadi baxımdan Rusiyadan asılıdır, “Qarabağ klanı” Kremlə çox bağlıdır və s. “Qarabağ klanı” Ermənistan hakimiyyətinə qarşı Rusiyanın əlində ciddi təzyiq rıçaqıdır. Köçəryanın növbəti dəfə həbsi Paşinyandan Rusiyaya yönəlik həmlədir. “Lazarev klubu”nun təmsilçisi olan Zatulinin də bu mənada açıqlamaları hazırda Rusiyanın Ermənistandakı maraqları ilə bağlı amillərdən irəli gəlir. Rusiya Zatulinin dili ilə Paşinyan hakimiyyətinə, Qərbə mesaj verir ki, Kreml Ermənistanın itirilməsinə razı olmayacaq. Bu, Paşinyana xəbərdarlıqdır ki, cızıqdan kənara çıxma. Onu da etiraf etmək lazımdır ki, Ermənistandakı hazırkı vəziyyət çox kövrəkdir. Bu hər an ölkədə müəyyən qarşıdurmaya gətirib çıxara bilər”.
Vidadi ORDAHALLI
