Ermənistan hakimiyyəti atdığı konkret addımları ilə özünün ifrat irqçi mahiyyətini dir daha təqdim etmiş olur. Xüsusilə yeni hakimiyyətin yürütdüyü kadr siyasətində bu özünü aydın şəkildə göstərir.
İfrat irqçi kimi tanınan Kaliforniyada emənilərin kütləvi şəkildə yaşadıqları Qlendeyl şəhərinin keçmiş meri Zareh Sinanyan Ermənistanın baş naziri tərəfindən bu ölkənin diaspora işləri üzrə müvəkkili təyin edilib. Xatırladaq ki, bu vəzifə bir ay bundan əvvəl Ermənistanın diaspora üzrə nazirliyinin ləğvindən sonra yaradılıb.
1988-ci ildə Ermənistanı tərk etmiş və Kaliforniyada yerləşmiş Zareh Sinanyan 2013-cü ildə Qlendeyl şəhər Şurasının üzvlüyünə namizəd olarkən özünün “YouTube” səhifəsində ifrat irqçi, bir sıra etnik qrupları və xalqları təhqir edən, islamofob və cinsi qruplara qarşı mənfi şərhlər yerləşdirib. Qlendey şəhərinin yerli mətbuatı tərəfindən bu şərhlər ictimaiyyətə açıqlandıqdan sonra, Sinanyan onu dəstəkləyən bir çox mühüm tərəfdaşını itirdi. Onların sırasında Los-Anceles şəhərinin meri postu uğrunda mübarizə aparan iki namizəd Vendi Qreyel və Erik Qarsetti, o cümlədən Şəhər şurasının üzvü Pol Krekoryan və respublikaçı Adam Şiff də olub. Bütün bunlara baxmayaraq, Sinanyan Qlendeyl şəhərinin erməni icmasının dəstəyi ilə gözlənilməz qaydada seçildikdən sonra, o, həmin şərhlərin müəllifi olduğunu etiraf etməli olub.
Bir müddət əvvəl Z.Sinanyanın Ermənistanın Los-Anceles şəhərində baş konsulu vəzifəsinə təyin olunmaq məsələsi ortaya çıxsa da, erməni diasporasının ABŞ-dakı aparıcı mətbu orqanı tərəfindən tənqidedici məqalədən sonra erməni rəhbərliyi bu fikirdən vaz geçdi.
Qeyd olunmalıdır ki, Z.Sinanyan dəfələrlə Azərbaycanın işğal olunmuş torpaqlarına səfər etmiş və qondarma “DQR”dən olan nümayəndələri Kaliforniyada qəbul edib. O, eyni zamanda anti-gürcü ritorikası ilə məşhurdur və Gürcüstanın Cavaxetiya bölgəsində ermənilərin separatizm meyllərini dəstəkləyənlərdən biridir.
Bəzi tənqidçilər bildirir ki, ABŞ vətəndaşı olan Z.Sinanyan erməni diasporasının iki ən nüfuzlu icmasından – İran və Rusiya ermənilərinin dəstəyindən məhrum ola bilər.
Paşinyanın bu cür qaranlıq keçmişə malik olan adamları yüksək dövlət postlarına gətirməsinə hansı qiyməti vermək olar?
Əhəd Məmmədli: “Qoy Ermənistan hakimiyyətində kimlərin təmsil olunduğu dünyaya bəlli olsun”
Politoloq Əhəd Məmmədli baki-xeber.com-a bildirdi ki, Paşinyan baş nazir seçiləndən erməni gəncliyinə xoş gəlsin deyə müasir, qərbyönümlü görünmək istəyir: “Onun Sinanyan kimi şəxsləri vəzifəyə təyin etməsi isə artıq mahiyyəti tam dəyişir. Çünki Sinanyanın necə odioz fiqur olduğu hamıya bəllidir. Ömrünün ən vacib anlarını ABŞ-da keçirsə də, onun bütün fəaliyyəti Ermənistan və qondarma qurumun təbliği ilə bağlıdır. Aprel döyüşlərində Ermənistanın qazandığı məğlubiyyəti Sinanyandan kəskin tənqid olmamışdı. Həmin vaxt o az qalırdı Sarkisyanı açıq mətnlə söysün. Həmin zamandan onun Ermənistanın daxilindəki müxalif qüvvələrlə sıx təması və əqidə birliyi yaranıb. Bu adam ABŞ-da rəsmi post tusa da, dəfələrlə qondarma qurumun ərazisində olub. ABŞ-dakı erməni diasporunun işini aktiv koordinasiya edib”.
Ekspert hesab edir ki, Paşinyanın bu cür təyinatları həyata keçirməkdə başqa məqsədi xaricdəki güclü erməni lobbisinin xoşuna gəlməkdir: “Xaricdə yaşayan, oxuyan, fəaliyyət göstərən erməniləri dəvət edib müxtəlif postlara təyin edir. İslamafob, ultra-millətçi, irqçi Sinanyana vəzifə verilməsi bu qəbildəndir. Amerikada mənfi imicli Sinanyanın Ermənistanda Paşinyan tərəfindən vəzifəyə təyin edilməsini rəsmi Bakı ifşa etməyi bacarmalıdır. Bundan ötrü rəsmi Bakıya dost olan Amerikadakı yahudi lobbisinin dəstəyini almaq olar. ABŞ-dakı səfirliyimiz bu işin ciddi şəkildə üstünə düşməlidir. Paşinyan iqtidarının iç üzü göstərilməlidir. Ümid edirəm Azərbaycan tərəfi bu yöndə lazımi işlər aparacaq.
ABŞ-dakı səfirliyimiz bu istiqamətdə oradakı Azərbaycan və Türkiyə diasporları ilə də işləməlidir. Sinanyanın irqçiliyini, islamofobluğunu irəli çəkərək Amerikada fəaliyyət göstərən müsəlman icmaları, təşkilatları, gənclər birliklərini də işə qoşmalıyıq. Qoy Ermənistan hakimiyyətində kimlərin təmsil olunduğu dünyaya bəlli olsun”.
Məhəmmədəli QƏRİBLİ
