Ermənilər hesab edir ki, Fransa məhkəmələrinin bələdiyyələrlə bağlı məlum qərarından sonra ABŞ-ın timsalında onların xeyrinə bir sıra proseslər gedir. Bunu onunla əsaslandırırlar ki, məhz Fransa məhkəmələrinin qərarlarından sonra ABŞ-da qondarma "DQR"lə bağlı ard-arda təkliflər irəli sürüldü.
Məsələn, ABŞ-ın məşhur ermənipərəst konqresmeni Frank Pallone təklif edib ki, Amerika rəsmilərinin Dağlıq Qarabağa birbaşa səfərlərinə mane olan qadağa aradan qaldırılsın. Bununla belə, ABŞ Konqresi Azərbaycanın işğal altındakı torpaqlarındakı qondarma rejimə 1,5 milyon dollar vəsaitin ayrılmasını təsdiqləyib. Digər tərəfdən, ABŞ Nümayəndələr Palatasının xarici əlaqələr komitəsinin baş üzvü, ermənipərəst konqresmen Bred Şerman Azərbaycanın hücum imkanlarını gücləndirməsinə mane ola biləcək bir dəyişiklik təqdim edib. Sözügedən dəyişikliklərdə ABŞ-ın Azərbaycana hava hücumundan müdafiə sistemini gücləndirə biləcək silah satışının əngəllənməsindən söhbət gedir.
Bütün bunlardan sonra erməni mətbuatı belə qənaətə gəlir ki, guya ABŞ-ın Azərbaycan və Ermənistanla paritet əməkdaşlığı, Ermənistanın xeyrinə dəyişib. Yəni Ermənistan ABŞ üçün Azərbaycanla müqayisədə daha əlverişli tərəfdaşdır. Onların bu yanaşması nə dərəcədə əsaslıdır?
Arzuxan Əlizadə: “Ermənistan hərbi və iqtisadi baxımdan Rusiyanın orbitindədir və bu sahədə dəyişən bir şey yoxdur”
Məsələyə münasibət bildirən AMİP-in baş katibi Arzuxan Əlizadənin fikrincə, bütün bunlar o demək deyil ki, Ermənistan ABŞ üçün Azərbaycanla müqayisədə daha vacib tərəfdaşdır: “Bu sadəcə ermənilərin növbəti uydurmasıdır. Zatən Birləşmiş Ştatlar illərdir müxtəlif proqramlar çərçivəsində Ermənistana, həmçinin separatçı quruma müəyyən maliyyə yardımları edir. Burada yeni bir şey yoxdur. Hər kəsə məlumdur ki, Ermənistan dilənir. Başqa bir tərəfdən, Ermənistanda bir il əvvəl hakimiyyət dəyişsə də ölkənin xarici siyasət kursunda ciddi hansısa yeniliklər baş verməyib. Ermənistan hərbi və iqtisadi baxımdan Rusiyanın orbitindədir və bu sahədə dəyişən bir şey yoxdur. O baxımdan Birləşmiş Ştatlar Ermənistanın öz xarici siyasət mövqeyini Rusiyadan Qərbə doğru dəyişəcəyini gözləmir. Məsələ ondadır ki, ABŞ Gürcüstan və Azərbaycanı strateji tərəfdaş ölkə hesab etdiyi halda, Ermənistanı strateji həmsöhbət hesab edir. Ermənistanın xarici siyasətindəki mövqeyi, KTMT-yə və Avrasiya İqtisadi İttifaqına üzvlüyü mövcud mənzərəni aydın şəkildə ortaya qoyur. Ermənistanın Rusiyadan asılılığı elə bir nöqtəyə gəlib çatıb ki, rəsmi İrəvanın ABŞ üçün vacib tərəfdaş olması mümkün deyil. Azərbaycana gəldikdə isə, vəziyyət fərqlidir. Rusiyadan yan keçən bir sıra enerji və nəqliyyat layihələri Azərbaycandan keçir. Azərbaycan Rusiyanın hərbi və iqtisadi təşkilatlarında təmsil olunmur. Azərbaycan Qərbin böyük neft şirkətləri ilə 30 ilə yaxındır əməkdaşlıq edir. Azərbaycanın bölgədə geosiyasi, strateji mövqeyi daha əlverişlidir. Ona görə, də erməni mətbuatının bununla bağlı iddiaları əsaslı deyil”.
Vidadi ORDAHALLI
