Ermənistan girov saxladığı mülki azərbaycanlıları qaytarmağa məcbur edildi – Dilqəmlə Şahbazın da yolu açılırmı?
Məlum olduğu kimi, iyunun 28-də Beynəlxalq Qızıl Xaç Komitəsinin (BQXK) himayəsi altında keçirilən əməliyyat zamanı bir Azərbaycan və bir Ermənistan vətəndaşı geri qaytarılıb.
Komitədən mətbuata verilən məlumata görə, təhvilvermə sərhəddə - Ermənistanın İcevan və Azərbaycanın Qazax şəhərləri arasındakı yolda baş tutub.
Qeyd edək ki, Azərbaycan vətəndaşı bu il martın 16-da sərhəddən Ermənistana, Ermənistan vətəndaşı isə 2017-ci il iyunun 20-də sərhəddən Azərbaycana keçib.
Məlumatlara görə, BQXK saxlandığı dövr ərzində və eləcə də öz ölkələrinə təhvil verilməzdən əvvəl həmin şəxslərə mütəmadi olaraq baş çəkərək, onların saxlanma şəraitini və onlarla necə davranıldığını qiymətləndirib.
Xatırladaq ki, Qazax rayonunun Yuxarı Salahlı kənd sakini, 1986-cı il təvəllüdlü İbrahimov Elvin Arif oğlu cari il mart ayının 15-dən 16-na keçən gecə Qazax rayonunun Ermənistanın Noyemberyan rayonu ilə sərhəd xəttində yolu azaraq qarşı tərəfə keçib. E.İbrahimov sərhədi keçərkən Ermənistan hərbçiləri tərəfindən açılmış atəş nəticəsində yaralanıb. Aidiyyəti beynəlxalq təşkilatlar E.İbrahimovun yaralanması və Ermənistan hərbçiləri tərəfindən saxlanması faktını təsdiq edərək həyatı üçün təhlükənin olmadığını bildiriblər.
Erməni girovluğunda olan Azərbaycan vətəndaşının geri qaytarılması hazırda erməni girovluğunda olan azərbaycanlı mülki şəxslər Dilqəm Əsgərov və Şahbaz Quliyevin geri qaytarılması üçün nə kimi perspekivlər açır?
- Rufiz Qonaqov: “Bizim erməni girovluğunda olan kifayət qədər vətəndaşımız var və onların da əsirlikdən, girovluqdan azad edilməsini gözləyirik”
Politoloq Rufiz Qonaqov “Bakı-Xəbər”ə bildirdi ki, Azərbaycan vətəndaşları Dilqəm Əsgərov və Şahbaz Quliyevin işğal olunmuş Kəlbəcər rayonunda qohumlarının qəbirlərini ziyarət edərkən girov götürülməsi bütün beynəlxalq konvesiyalara, qaydalara ziddir. O qeyd etdi ki, onlar bir neçə ildir erməni girovluğunda dəhşətli işgəncələrə məruz qalırlar.
R.Qonaqov hesab edir ki Beynəlxalq Qızıl Xaç Komitəsinin azərbaycanlı girovu erməni əsarətindən azad edərək vətənə qaytarması müsbət haldır. Politoloq hesab edir ki, bu amil Şahbaz Quliyev və Dilqəm Əsgərovun da girovluqdan azad ediləcəyinə ümid bəsləməyə əsas verir. “İstənilən halda, dinc vətəndaşların həbs olunması, eyni zamanda, əsir və girov götürülməsi beynəlxalq hüquq qaydalarına, beynəlxalq konvensiyalara, eləcə də Beynəlxalq Qızıl Xaç Komitəsinin qaydalarına görə yolverilməzdir. Əlbəttə, bir vətəndaşımızın komitə tərəfindən geri qaytarılması onu deməyə əsas verir ki, əslində, müharibəni aparan hərbçilərdir və işğalçı tərəf də Ermənistandır, Azərbaycan öz torpaqlarını qoruyur. Dinc vətəndaşların öz dədə-baba yurdlarına gedərkən girov və əsir götürülməsi, öldürülməsi, itkin düşməsi beynəlxalq təşkilatlar tərəfindən pislənilməlidir. ATƏT, BMT və digər beynəlxalq qurumlar bu fakta kəskin reaksiya verməlidirlər. Çox təəssüflər olsun ki, BMT-nin münaqişənin həlli ilə bağlı qəbul etdiyi 4 qətnamə icra olunmur. Acınacaqlı haldır ki, dünyada hələ də ikili standartlar var, beynəlxalq hüquq işləmir. Əgər işləsəydi və ikili standartlar olmasaydı, Azərbaycan torpaqları çoxdan işğaldan azad edilərdi. Ümumiyyətlə, Qızıl Xaç Komitəsi tərəfindən bir vətəndaşımızın girovluqdan azad edilərək vətənə qaytarılması Dilqəm Əsgərov və Şahbaz Quliyevin, eləcə də erməni əsirliyində olan digər vətəndaşlarımızın da girovluqdan azad edilməsi üçün ümid yarada bilər. Biz buna görə komitəyə təşəkkür edirik, ancaq bir girovun azad edilməsi çox azdır. Çünki bizim erməni girovluğunda olan kifayət qədər vətəndaşımız var və onların da əsirlikdən, girovluqdan azad edilməsini gözləyirik”.
R.Qonaqov, həmçinin, qeyd etdi ki, istənilən halda, Azərbaycan qısa zamanda öz torpaqlarını geri qaytarmaq əzmindədir, Azərbaycan xalqı və dövləti bununla bağlı prinsipial mövqe ortaya qoyub. Onun sözlərinə görə, erməni əsirliyində, girovluğunda olan vətəndaşlarımızın azad olunması üçün Azərbaycan beynəlxalq qurumlardan, o cümlədən, Qızıl Xaç Komitəsindən dəstək gözləyir.
İradə SARIYEVA
