24/07/2019 01:15
728 x 90

İƏT-in Məkkə zirvəsinin məşhur qərarının mürəkkəbi hələ qurumayıb, Birləşmiş Əmirliklər Ermənistanla ticarəti 250 milyona çatdırıb...

“Ermənistanla BƏƏ arasında iqtisadi dövriyyənin durmadan artması sözügedən müsəlman ölkəsinin işğalçı dövlətə dəstəyindən irəli gəlir”

img

Birləşmiş Ərəb Əmirliklərinin Ermənistandakı fövqəladə və səlahiyyətli səfiri Məhəmməd əl Zaabi erməni mətbuatına verdiyi müsahibəsində bildirib ki, iki ölkə arasında ikitərəfli münasibətlər unikal səviyyədədir. O qeyd edib ki, son illər bu əlaqələrin bütün sahələrdə inkişafını görməkdəyik.

Səfir iki ölkə arasında ticarət əlaqələrinin artmasına dair bir sıra statistik rəqəmlər səsləndirib: “Ermənistanda BƏƏ-nin səfirliyi açılandan sonra müxtəlif sahələrdə, xüsusən də iqtisadiyyatda aktivləşmə hiss olunur. Bunu ticarət  dövriyyəsinin göstəriciləri də təsdiq edir. Səfirliyin açılışından əvvəl, yəni 2014-cü ildə iki ölkə arasında ticarət dövriyyəsi cəmi 80 milyon dollar idisə, 2017-ci ildə bu rəqəm 250 milyon dollara çatıb”.

O da məlum olub ki, iki ölkə arasında kənd təsərrüfatı sahəsində ciddi əməkdaşlıq mövcuddur. Tərəflər bu sahədə əlaqələrin daha da inkişafında qərarlıdırlar.  

Bəzi ərəb ölkələri ilə Ermənistan arasında belə sıx yaxınlaşma anlaşılan deyil. Məsələ ondadır ki, BƏƏ İslam Əməkdaşlıq Təşkilatında təmsil olunsa da, bu qurumun qərarlarına əməl etmir. Bu il mayın 31-də Səudiyyə Ərəbistanı Krallığının Məkkə şəhərində İƏT dövlət və hökumət başçılarının 14-cü Zirvə toplantısı keçirilib. Toplantı nəticəsində yekun kommünike sənədi qəbul edilib. Yekun sənəddə Qarabağla bağlı bir sıra maraqlı məqamlar yer alıb. Ən maraqlı məqam ondan ibarətdir ki, sənəddə işğala xidmət edəcək hər hansı fəaliyyətin qanunvericiliklə qarşısının alınması tələbi öz əksini tapıb. İƏT-ə üzv ölkələrdən effektiv tədbirlərin həyata keçirilməsi, o cümlədən, işğalçıya öz ərazilərindən və ya əraziləri vasitəsilə silah ötürülməsinin, fiziki və hüquqi şəxslərin Azərbaycanın suverenliyi və ərazi bütövlüyünə qarşı hər hansı fəaliyyətinin və işğalın saxlanmasına xidmət edəcək hər hansı fəaliyyətin milli qanunvericilikləri vasitəsilə qarşısının alınması tələb olunur.

Göründüyü kimi, BƏƏ-nin Ermənistanla sıxlaşan əlaqələri İƏT toplantısında qəbul olunan qərarların əksinədir. Faktiki olaraq BƏƏ bu qərarları nəzərə almır.

O baxımdan, yaranan belə xoşagəlməz vəziyyəti ekspertlər necə dəyərləndirirlər?

  • Məhəmməd Əsədullazadə: “Görünür, Ermənistanda qadın bazarlığı ərəb şeyxlərini bu ölkəyə cəlb edir”

Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, Ermənistanla müsəlman ölkələri arasında siyasi və iqtisadi əməkdaşlıq predmetləri əsasən İƏT-ın ötən ay qəbul etdiyi Qarabağla bağlı qətnaməsinə əsaslanmalıdır: “Təəssüflər olsun ki, BƏƏ ilə Ermənistan arasında əlaqələrin genişlənməsi bu qərarları pozur. Hesab edirəm ki, rəsmi Bakı bu istiqamətdə işlər aparmalı və müsəlman ölkələrinin Ermənistana qarşı siyasi, iqtisadi sanksiyalar tətbiq etməsinə çalışmalıdır. Ermənistanla BƏƏ arasında iqtisadi dövriyyənin durmadan artması sözügedən müsəlman ölkəsinin işğalçı dövlətə dəstəyindən irəli gəlir. Qeyd edim ki, Ərəb Əmirliklərində erməni lobbisi bu istiqamətdə geniş iş aparır. Fikrimcə, rəsmi Bakı bununla əlaqədar BƏƏ ilə diplomatik kanallarla danışıqlar aparmalıdır. İƏT-in qəbul etdiyi qərarlar onlara xatırladılmalıdır. Müsəlman ölkələrində birliyin olmaması səbəbindən, təşkilat çərçivəsində yekdilliklə qəbul edilən qərarlara hörmətlə yanaşmırlar. Ona görə də ərəb dövlətləri bu gün işğal və xaosla üz-üzədirlər. BƏƏ-də Azərbaycan səfirliyi kifayət qədər bu işlərin qarşısnı alır. Orada Azərbaycanın təbliği yüksək səviyyədə həll edilir. Görünür, Ermənistanda qadın bazarlığı ərəb şeyxlərini bu ölkəyə cəlb edir. BƏƏ-nin bu siyasəti müvəqqəti olacaq və tezliklə qazanc əldə etmədən buradan uzaqlaşacaqlar. Diqqət etmək lazımdır ki, Ermənistan BƏƏ-ni işğal olunmuş ərazilərimizə investiya qoymağa cəlb etməsin. Rəsmi Bakı buna diqqət etməli və tez bir zamanda bunun qarşısı alınmalıdır. Azərbaycanın Körfəz ölkələri ilə əməkdaşlığı genişlənməlidir. Səudiyyə Ərəbistanı vasitəsilə BƏƏ-nin Ermənistanla iqtisadi əlaqələrinin qarşısı alınmalıdır”.

Vidadi ORDAHALLI 

Son xəbərlər