“Biz müharibə şəraitində yaşayırıq. Müharibə hələ bitməyib və biz hər an hazır olmalıyıq ki, doğma torpaqlarımızı işğalçılardan azad edək. Əminəm ki, bu gün gələcək və Azərbaycan ərazi bütövlüyünü bərpa edəcək”.
Bunu Prezident, Ali Baş Komandan İlham Əliyev 26 iyun – Silahlı Qüvvələr Günü münasibətilə Cəmşid Naxçıvanski adına Hərbi Liseyin kursantları və müəllimləri ilə görüşündə deyib. Ölkə başçısı bildirib ki, ordu quruculuğu prosesi uğurla, sürətlə gedir: “Müasir səviyyədə işlər görülür, hərbi texnika alınır, döyüş qabiliyyəti artır. Bir sözlə, bu gün Azərbaycan Ordusu öz gücünü göstərir və göstərməlidir. Bizim ordumuzun gücü, döyüş qabiliyyəti, peşəkarlığı artır. Bu gün ordumuz ən yüksək səviyyədədir”.
Prezident onu da bildirib ki, imkanlarımız artır, maddi vəziyyətimiz yaxşılaşır, orduya lazım olan texnika, silah-sursat alınır, gətirilir: “Bir sözlə, biz bütün bu işləri ona görə edirik ki, daha güclü orduya malik olaq və öz ərazi bütövlüyümüzü bərpa edək”.
Bu arada o da məlum olub ki, erməni tərəfi Prezident İlham Əliyevin “müharibə hələ bitməyib” fikrindən bərk narahat olmağa başlayıb. Ölkə başçısının sözügedən fikirləri erməni mediasında narahatlıqla qarşılanaraq müxtəlif müzakirələrə səbəb olub.
Maraqlıdır, erməni tərəfi bundan niyə bu qədər narahatdır? Ekspertlər bunu necə dəyərləndirirlər?
İbrahim Rüstəmli: “Onlar bilirlər ki, gec-tez, Azərbaycan öz ərazilərini azad edəcək”
Məsələyə münasibət bildirən ehtiyatda olan polkovnik-leytenant İbrahim Rüstəmli ermənilərin bu yöndə narahatlıq keçirmələrinə bir neçə kontekstdən yanaşdı: “Əvvəla bu fikirləri ölkə Prezidenti, Ali Baş Komandan İlham Əliyevin prinsipial mövqeyi kimi dəyərləndirirəm. Azərbaycanda böyükdən-kiçiyə hamı birmənalı olaraq belə düşünür ki, Azərbaycan öz torpaqlarını mütləq işğaldan azad etməlidir. Prezident İlham Əliyev də öz dövlətinin hərbi, siyasi, ictimai maraqlarını ifadə edir. Ermənilərin ölkə başçısının “müharibə hələ bitməyib” fikrindən narahat olmaları təbiidir. Çünki bu gün Ermənistanda Qarabağla bağlı düşüncələrdə bəzi deformasiyalar, transformasiyalar müşahidə edilir. Bu transformasiyalar ondan ibarətdir ki, sadə erməni vətəndaşları üçün müharibə acı bir həqiqətdir. Sadə erməni vətəndaşlarına Qarabağ lazım deyil. Bu dəqiqə Ermənistan rəhbərliyi onların çiyninə bu ağır yükü qoymaqla, cəmiyyətdə kütləvi psixoz yaradır. Reallıq ondan ibarətdir ki, sadə erməni vətəndaşı Qarabağda döyüşmək istəmir. Onlar bilirlər ki, gec-tez, Azərbaycan öz ərazilərini azad edəcək. Bu ictimai rəyin formalaşmasında Azərbaycan dövlətinin, ölkə başçısının prinsipial mövqeyi xüsusi rol oynayıb. Bu gün də biz öz hədəflərimizdən əl çəkməmişik. Azərbaycan bununla bağlı öz prinsipial mövqeyindən əl çəkməyib. Azərbaycanın bir dövlət olaraq ən əsas məqsədi torpaqları azad etməkdir. Ona görə də hesab edirəm ki, biz daim bu döyüşə hazır olmalıyıq. Çünki bu həlledici bir döyüş olacaq. Sadəcə, onun yetişmə məqamı, baş verməsi və bu mexanizmin hərəkətə keçməsi üçün müəyyən zəmin yaranmalıdır. Ona görə də hər birimiz buna hazır olmalıyıq”.
Vidadi ORDAHALLI
