Məlum olduğu kimi, Ermənistanın sabiq prezidenti Robert Köçəryan yenidən həsb edilib. Apelyasiya məhkəməsi İrəvan məhkəməsinin 18 mayda Köçəryanın zaminlə azadlığa buraxılması haqqında qərarını ləğv edib və onun yenidən həbs edilməsi barədə qərar çıxarıb.
Bu arada Ermənistanın baş prokuroru Artur Davityan Rusiyanın bu ölkədəki səfiri Sergey Kopırkinlə görüşüb. Erməni mətbuatının yaydığı məlumata görə, görüşdə Davityan və Kopırkin iki ölkə arasında hüquqi sahədə əlaqələrin, eləcə də Ermənistan və Rusiyanın prokurorluq orqanları arasında ikitərəfli və çoxtərəfli formatlar çərçivəsində əməkdaşlığın yüksək səviyyədə olduğunu qeyd ediblər. Burada diqqətçəkən məqam odur ki, görüşdə Davityan qanunsuz yolla əldə edilmiş əmlakın müsadirə edilməsi və Ermənistandan çıxarılan malların qaytarılması üçün institusional mexanizmlərin işlənməsinin vacibliyini vurğulayıb. Baş prokurorun fikrincə, bu, korrupsiya hallarının araşdırılması və qanunsuz zənginləşmənin qarşısının alınması üzrə cinayət işinin istintaqının effektivliyinin artırılmasına kömək edəcək. Davityan onu da qeyd edib ki, beynəlxalq əməkdaşlıq sahəsində Ermənistandan qanunsuz yolla çıxarılan əmlakın qaytarılması, Ermənistan və digər ölkələrin məhkəmə qərarlarının qarşılıqlı tanınması məsələlərini həll etmək üçün tədbirlər görüləcək.
Səfirin çox həssas bir məqamda Ermənistanın baş prokuroru ilə görüşməsi Köçəryanla bağlı olub. Baş prokuror isə dolayısı ilə Köçəryanın ölkədən çıxarılmış varidatının geri qaytarılması mexanizmini qabardır. Bu o deməkdir ki, Paşinyan hakimiyyəti həm də Köçəryan klanının qanunsuz olaraq Ermənistandan çıxarıb Rusiyaya yerləşdirdiyi əmlak geri qaytarmaq istəyir. Köçəryanın Ermənistandan oğurlayaraq Rusiyaya yerləşdirdiyi əmlakın geri qaytarılması mexanizmi mümkündürmü və bu, necə həyata keçirilə bilər?
- Mehman Muradlı: “Əldə olunan dəqiq faktlar əmlakın aşkar edildiyi ölkənin müvafiq qurumlarına təqdim edilməlidir”
Hüquqşünas Mehman Muradlı “Bakı-Xəbər”ə bildirdi ki, Köçəryanın işi daha çox siyasi mahiyyət daşıyır: “Yəni məsələnin hüquqi tərəflərindən çox, bu məsələni siyasi iradə həll edir. Prosesləri mən də yaxından izlədim. Əvvəl Rusiyanın səfiri Köçəryanın özü ilə görüşdü. Sonra həmin ölkənin Konstitusiya Məhkəməsinin sədrinin qəbulunda oldu. Ermənistanda bu addımlar təpki ilə qarşılandı və Paşinyanın təzyiqi ilə eks-prezident yenidən həbsə göndərildi. Budəfəki həbs baş prokurorun protesti əsasında olduğu üçün, Rusiya səfiri həmin qapını döyməli olub. Görünən budur ki, Rusiya Köçəryana “vəkillik” edir. Nəyin bahasına olursa-olsun, onu həbsdən azad etmək istəyir. Baş prokuror açıq şəkildə deyib ki, onun taladığı və Rusiyada yerləşdirdiyi əmlaklar, var-dövlət geri qaytarılmalıdır. Şərtlərdən biri budur. Bunu həm qanuni yolla, həm də başqa üsulla həll etmək olar. Yəni Köçəryan əmlakı satır, tələb olunan vəsaiti ödəyir deyilən hesaba, onunla bağlı hökm yumşalır. Qanuni mexanizmi isə belədir. Məhkəmə əmlakın oğurluq olması və harada yerləşməsi ilə bağlı qərar çıxarmalıdır. Yəni tam sübut olunmalıdır ki, Köçəryan oğurladığı pulları harada gizlədir. İki ölkə arasında bu yöndə razılaşma varsa, həmin əmlakın müsadirəsi baş tuta bilər. Yəni burada söhbət tərəflər arasında məhkəmə hökmlərinin qarşılıqlı tanınmasından gedir. Belə bir mexanizm mövcuddursa, ola bilər”.
Hüquqşünasın sözlərinə görə, bu prosedurdan sonra əldə olunan dəqiq faktlar əmlakın aşkar edildiyi ölkənin müvafiq qurumlarına təqdim edilməlidir: “İşi aparan istintaq orqanı və ya məhkəmə müvafiq sənədləri həmin ölkənin əlaqədar qurumlarına təqdim edib, əmlaka və bank hesablarına həbs qoyulmasını tələb etməlidir. Həmin tələbin çərçivəsində, eyni zamanda, mənşəyi şübhəli olan əmlakı satılaraq Ermənistan dövlətinin büdcəsinə keçirilməsi də öz əksini tapmalıdır. Ancaq inanmıram ki, Rusiya buna razı ola. Onlar Köçəryanı azadlığa buraxdırmaq üçün digər təzyiq üsullarından Paşinyana qarşı istifadə edəcəklər”.
Məhəmmədəli QƏRİBLİ
.jpg)
.jpg)
