22/10/2019 08:43
728 x 90

Prezidentin 26 iyun - Ordu günü klipi - hərb sənətimizin yığcam tarixi...

“Bu videoçarx Azərbaycan Ordusunun 101 illik zaman ərzində keçdiyi böyük və şərəfli tarixi yolu əks etdirir”

img

Azərbaycan Respublikasının Prezidenti İlham Əliyevin 26 iyun - Azərbaycan Respublikası Silahlı Qüvvələri Günü münasibətilə “Facebook” və “Instagram” səhifəsində paylaşdığı, əsgər və zabitlərə həsr olunan videoçarx günün trendinə çevrilib.

Kiçik bir filmi xatırladan sözügedən videoçarx ölkənin ictimai-siyasi həyatında müsbət mənada böyük rezonans yaradıb. 101 yaşlı ordumuzun yığcam tarixini əks etdirən videoçarxda Azərbaycan Xalq Cümhuriyyəti dönəmindən başlamış indiyə qədər Azərbaycan Ordusunda əsgər və zabitlərin istifadə etdiyi geyim formaları nümayiş etdirilib.

  • Şair Ramaldanov: “Bu videoçarx Azərbaycan Ordusunun inkişafını göstərməklə yanaşı, həm də Azərbaycan Ordusunun gücünün də göstəricisidir”

Tanınmış hərbi ekspert, iki dəfə “Azərbaycan bayrağı” ordeninə layiq görülmüş Şair Ramaldanov “Bakı-Xəbər”ə Prezidentin paylaşdığı videoçarxla bağlı maraqlı şərh verdi. Ş.Ramaldanovun sözlərinə görə, klipdə 101 yaşlı Azərbaycan Ordusunun tarixi öz əksini tapıb. O qeyd etdi ki, Azərbaycan Silahlı Qüvvələri 101 il ərzində böyük tarixi yol keçib. “Azərbaycan Respublikası Prezidentinin “Facebook” və “Instagram” səhifəsində yayılan videoklipi cənab Prezidentin Azərbaycan Ordusuna bəslədiyi münasibət kimi də qəbul etmək olar. Bunu, həmçinin, Azərbaycan Silahlı Qüvvələrinə ölkə başçısının verdiyi yüksək dəyər olaraq da qiymətləndirmək mümkündür. Bu videoçarx Azərbaycan Ordusunun 101 illik zaman ərzində keçdiyi böyük və şərəfli tarixi yolu əks etdirir. 101 il ərzində Azərbaycan Ordusu böyük bir təkamül yolu keçib. Görürsünüz ki, Cümhuriyyət dövründən indiyə qədər əsgər və zabitlərimizin geyim tərzi necə dəyişib, necə təkmilləşib. Yəni 101 il ərzində Silahlı Qüvvələrimizdə xidmət edən hərbçilərin yalnız geyimi dəyişməyib, həm də ordumuz güclənib, qüdrətlənib. Biz o videoklipdə Azərbaycan Ordusunun inkişafını görürük. Azərbaycan əsgəri, Azərbaycan oğlu həmişə ölkəmizin müstəqilliyi, suverenliyi uğrunda mübarizə aparıb, Azərbaycanın ərazi bütövlüyünü, xalqımızı qoruyub və qorumağa da davam edir. Əlbəttə, ilk baxışdan o videoklipdə daha çox dəyişən və müasirliyə doğru gedən geyim formasının nümayişini görürük, lakin bu görüntülərin arxasında böyük bir məna, şanlı bir tarix göz önünə gəlir. Biz burada əsgər və zabitlərimizin dəyişən və müasirləşən geyimləri ilə yanaşı, Azərbaycanın qüdrətli dövlət olaraq yenilməz, əzəmətli orduya malik olduğunu da görürük. Bu gün Azərbaycan Silahlı Qüvvələri dünyanın 50 güclü silahlı qüvvələri sırasında özünəməxsus yer tutubsa, bu, ilk növbədə, onun inkişafının əyani göstəricisidir. Azərbaycan Ordusunun ulu öndərin Vətənə qayıdışından sonra qısa bir zamanda formalaşdığı məlumdur. Qısa bir zamanda Azərbaycan Ordusunun vahid mərkəzdən idarə olunması ordumuzu həm bölgədə, həm də dünyada güclülər sırasına gətirib çıxarıb. Bu gün Ali Baş Komandanımızın orduya xüsusi münasibəti var və o, ordumuza böyük inam, etimad bəsləyir.

Biz həmin videoklipin arxa kadrlarında Azərbaycan Ordusunun hazırda müasir silahlarla silahlanmasını, eyni zamanda, Vətənə fədakarlıqla xidmət edən hərbçilərimizi gördük. Azərbaycan hərbçiləri harada olurlarsa olsunlar, daim seçilirlər. Bu gün Azərbaycan Ordusu müasir silahlarla silahlanıbsa, bu, ilk növbədə, ölkəmizdə hərbçi kadrların, mütəxəssislərin intellektual potensialının inkişaf etdiyinin göstəricisidir. Çünki bugünkü silahlar müasir silahlardır və intellektual cəhətdən böyük bilik tələb edir. Hansı silah olursa-olsun, əlbəttə, onu insan idarə edir və həmin o videoklipdə də Azərbaycan hərbçilərinin bütün sahələrdə inkişaf etdiyi göstərilir. Deyərdim ki, o videoklipə baxdıqda orada yer alan Azərbaycan hərbçilərinin mimika və üz cizgilərini təhlil etdikdə biz onların orada vətənpərvərlik xüsusiyyətlərinin ən yüksək formasını görürük. Azərbaycan əsgəri, zabiti həmişə vətənpərvər olub və vətənpərvərliklə də bərabər öz milliliyini saxlayıb. Bizim ordumuz hər zaman milli dəyərlərimizi yüksək tutub”.

Ş.Ramaldanov qeyd etdi ki, bu vətənpərvərlik hissi əsgərlərimizin, zabitlərimizin öz Vətənlərini, xalqını qoruması ilə müşayiət edilib. O vurğuladı ki, Prezidentin paylaşdığı videoklipdə güclü milli kolorit də öz əksini tapıb. “Bu çox təsirli videoklipdir. Belə bir videoklipin ölkənin birinci şəxsinin “Facebook” və “Instagram” səhifəsində paylaşılması, əlbəttə, o klipin əhəmiyyətini daha da artırıb. Bu həm maraqlı klipdir, həm də Ali Baş Komandanın Silahlı Qüvvələrə bağlılığının göstəricisidir. Hesab edirəm ki, bu videoçarx ictimaiyyət tərəfindən böyük maraqla qarşılanıb və onu öz “Facebook”, “Instagram” səhifələrində çoxlu sayda insan paylaşıb, statusa çevirib. Bu videoklip olduqca böyük populyarlıq qazandı. Bu da, ilk növbədə, onu deməyə əsas verir ki, Azərbaycan xalqı, Azərbaycan cəmiyyəti ordu quruculuğu məsələsində Azərbaycan Prezidentini dəstəkləyir və onunla həmrəydir. Düşünürəm ki, bu videoçarx Azərbaycan Ordusunun inkişafını göstərməklə yanaşı, həm də Azərbaycan Ordusunun gücünün də göstəricisidir”.

Ş.Ramaldanov qeyd etdi ki, 101 yaşlı Azərbaycan Ordusu Azərbaycan xalqının qürur mənbəyidir və ordumuz bundan sonra da böyük nailiyyətlərə nail olacaq.

İradə SARIYEVA

Son xəbərlər