“Xankəndi hava limanına uçan istənilən təyyarəyə Azərbaycan tərəfi icazə verməlidir”
ABŞ Nümayəndələr Palatasının komitə üzvü, ermənipərəst konqresmen Bred Şerman iyunun 25-də Azərbaycanın hücum imkanlarını gücləndirməsinə mane ola biləcək bir dəyişiklik təqdim edib. Şerman Amerika istehsalı olan silahın hesabına Azərbaycanın hərbi hava qüvvələrinin zərbəendirici imkanlarını təkmilləşdirmək perspektivinin qarşısının alınmasını istəyir.
Bu barədə ABŞ-dakı Ermənistanın Milli Komitəsi (ANCA) məlumat yayıb. Sözügedən məlumata görə, təşəbbüs Bakının Xankəndidə yerləşən hava limanına uçacaq mülki aviasiya vasitələrinə daim təhlükə törətməsinin qarşısını almağı hədəfləyir. Yəni bu dəyişiklik ABŞ-ın Azərbaycana hava hücumundan müdafiə sistemini gücləndirə biləcək silah satışını əngəlləyə bilər.
“Həmin dəyişiklik Azərbaycana tutarlı bir mesaj olacaq ki, bu ölkə mülki təyyarələri vurmaqla təhdid edə bilməz. Azərbaycana öz qonşularını qorxutmağa icazə verilməməlidir" - deyən Demokrat Partiyasından olan konqresmen bildirib ki, biz Azərbaycanın hava müdafiə sisteminin gücləndirilməsinə kömək edə bilmərik.
O da qeyd edilir ki, Nümayəndələr Palatasının Xarici əlaqələr komitəsi həmin məsələnin müzakirəsi üçün müstəqillik günündən, yəni iyulun 4-dən sonra toplanacaq.
Məlumdur ki, Birləşmiş Ştatlar Dağlıq Qarabağ münaqişəsi ilə əlaqədar Azərbaycana silah satmır. İki ölkə arasında bir sıra sahələrdə geniş əməkdaşlıq olsa da, silah ticarəti yoxdur. Ancaq zaman-zaman Konqresdə erməni lobbisinin maraqlarından çıxış edən konqresmenlər çalışırlar ki, Azərbaycana qarşı hansısa qərarlar qəbul edilsin. Bu yöndə müəyyən səylər göstərirlər.
Bu baxımdan, Bred Şermanın Azərbaycanla bağlı bu ədalətsiz təklifini ekspertlər necə dəyərləndirirlər?
- Mübariz Əhmədoğlu: “Fikrimcə, erməni lobbisinin maraqlarına işləyən bu təklif Konqresdən keçməyəcək”
Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlu ermənipərəst konqresmenlərin bu yöndə fəallaşmasını müəyyən səbəblərlə əlaqələndirdi: “Azərbaycan ABŞ-dan hava hücumu ilə bağlı sistemlər almır. Biz Rusiyadan, İsraildən, dünyanın digər dövlətlərindən müxtəlif silahlar alırıq. Bizim istənilən təyyarəni vura biləcək silahlarımız var. Xankəndinə mülki təyyarələrin uçmasına gəldikdə isə, Beynəlxalq Mülki Aviasiya Təşkilatı buna qadağa qoyub. Çünki ora Azərbaycan ərazisidir. Bunu konqresmen Bred Şerman da yaxşı bilir. Xankəndi hava limanına uçan istənilən təyyarəyə Azərbaycan tərəfi icazə verməlidir. İndi ermənilər buyurub danışıq aparsın və Azərbaycandan icazə alsınlar. Yəni görünən odur ki, ermənilər zəifləyiblər. İndi bilmirlər ki, nə hoqqa çıxarsınlar. Ona görə də Konqresdəki ermənipərəst qüvvələr müxtəlif məsələləri gündəmə gətirirlər. Ya da görürsən ki, ermənilər zəif gücü olan məlumatları şişirdərək yayırlar. Bununla belə rəy yaradırlar ki, iş başındadırlar. Guya ABŞ-da kimsə bunlara dəstək verir. ABŞ Konqresində qarşıdan gələn maliyyə ilinin büdcəsinin müzakirəsi gözlənir. Bu səbəbdən ermənipərəst konqresmenlər aktivləşiblər və müxtəlif təkliflər verirlər. Hava hücumundan müdafiə sistemini gücləndirə biləcək silahlarla bağlı təklif də bunlardan biridir. Hesab edirəm ki, bu təklif ədalətsiz olsa da, ciddi təsiri olmayan prosesin tərkib hissəsidir. Fikrimcə, erməni lobbisinin maraqlarına işləyən bu təklif Konqresdən keçməyəcək. Konqres Azərbaycana qarşı 1992-ci ildə “907-ci düzəliş”i qəbul etdi. Ancaq 2002-ci ildən bəri ABŞ prezidentləri bu düzəlişin həyata keçməsini dayandırırlar. Ona görə də son məsələlərdən elə də narahat olmaq lazım deyil”.
Vidadi ORDAHALLI
