Ermənistanda “Qarabağ klanı” ilə mövcud hakimiyyət arasında gərginləşən münasibətlər fonunda Kreml Nikol Paşinyan iqtidarına qarşı daha açıq gedişlərə start verir. Belə görünür ki, Rusiya ona bağlı “Qarabağ klanı”nın Paşinyan tərəfindən hüquqi müstəvidə tam sıradan çıxarılmasını istəmir. Elə buna görə də Moskva indidən hərəkətə keçib.
Elə bu günlərdə Ermənistanın “Baqramyan 26” kanalı belə bir məlumat yayıb ki, Rusiyanın Ermənistandakı səfiri Ermənistan Konstitusiya Məhkəməsinin rəhbərinə sabiq prezident Robert Köçəryanı müdafiə etmək qarşılığında zəmanət verib: “Rusiyanın Ermənistandakı səfiri Sergey Kopırkin Ermənistanın Kontitusiya Məhkəsinin rəhbəri Qrayr Tovmasyanla görüşüb. Tovmasyan Serj Sarkisyanın təyin etdiyi adamdır. Öz karyerasında irəliləməsinə görə o, Serj Sarkisyana borcludur. Səfir Köçəryanla görüşdən sonra Tovmasyanla görüşür, halbuki, məhz Köçəryanla görüşə görə onu Ermənistan Xarici İşlər Nazirliyinə çağırıb, ölkənin daxili işlərinə müdaxilə etməməsi istənilmişdi.
Kopırkinlə görüşə qədər isə Tovmasyan Qarabağda olub. Burada onunla eyni zamanda Serj Sarkisyan da olub və o, Tovmasyana gələcək fəaliyyəti ilə bağlı məsləhət verib. Aydındır ki, səfirlə Tovmasyanın görüşündə Rusiya-Ermənistan əməkdaşlığı müzakirə edilməyib. Səfir, sadəcə, Robert Köçəryanın ittiham olunduğu 1 mart işinin gələcəyi ilə maraqlanıb. İş artıq Konstitusiya Məhkəməsinə göndərilib. Burada Köçəryana qarşı cinayət işinin davam etdirilib-etdirilməməyəcəyinə qərar verilməlidir. Yəqin ki, səfir Tovmasyana Rusiya tərəfinin Köçəryan işi ilə bağlı arzularını çatdırıb və Konstitusiya Məhkəməsinin hakiminə Moskvanın ona kömək və dəstək verəcəyi ilə bağlı zəmanət verib. Səfir Kopırkin çox təhlükəli oyuna daxil olub və əvvəl yazdığımız kimi, Rusiyanın Belarusdakı eks-səfiri Babiçin taleyini təkrarlaya bilər”.
Xatırladaq ki, bu günlərdə Sergey Kopırkinin sabiq prezidentlərlə görüşünün olduğunu keçmiş iqtidar partiyası olan Respublika Partiyasının mətbuat katibi Eduard Şarmazanov da təsdiq etmişdi. O bu xüsusda bildirirdi: “Hakimiyyətin deputatlarından biri bəyan edib ki, Rusiya səfiri Ermənistanın daxili işlərinə qarışmaması kontekstində Ermənistan Xarici İşlər Nazirliyinə söhbətə dəvət edilib. Bəs Bolton birbaşa Ermənistanın daxili işlərinə müdaxilə və erməni xalqını tarixi ideologiyasından imtina etməyə dəvət edərkən, bir adam yoxdur ki, desin siz və sizin şefiniz hardaydı?”. O qeyd edib ki, dövlətin idarə edilməsi və dövlətlərarası münasibətləri partiyadaxili və qruplaşmadaxili münasibətlərlə qarışdırmaq olmaz: “Kopırkinin isə Köçəryandan savayı Serj Sarksiyanla da bir neçə görüşü olub. Bu görüşlər Rusiya səfirliyində və Respublika Partiyasının ofislərində baş tutub. Əsəbiləşmək və çaşmaq əvəzinə Nikol və onun tərəfdaşları rəsmi və parlament diplomatiyasının alfa ve omeqasını mənimsəsələr, daha yaxşı olar”.
Ermənistanda fəaliyyət göstərən “Məlumatli Vətəndaşlar Birliyi” ictimai təşkilatı da vəziyyətin kifayət qədər gərgin bir həddə çatdığını bəyan edir. Qurum Kremlin Ermənistanda vəziyyəti qarışdırmaq istiqamətində artıq müəyyən addımlar atdığını da bildirir və bununla ilgili yaydığı bəyanatında qeyd edir: “Başqa sözlə desək, yaranmış vəziyyət onu göstərir ki, Rusiyanın özü indiki mərhələdə erməni-rus müttəfiqlik münasibətlərini sınağa çəkir. Bununla da rəsmi Moskva İrəvandan səsləndirilən bəyanatları nəzərə almadan daha sərt addımlar ata bilər. Lakin bunun nəticələri bütün tərəflər üçün gözlənilməz ola bilər. Artıq bizə də məlumdur ki, Sergey Kopırkin Ermənistanın Konstitusiya Məhkəməsinin sədri Qrayr Tovmasyanla görüşüb. Bu görüş kifayət qədər maraqlı və mürəkkəb, daxili siyasi və xarici siyasi konteksdə baş verib və növbəti dəfə erməni-rus münasibətlərində Moskvanın konkret şəxslərin konkret maraqlarını müdafiə etməyə kökləndiyini göstərir. Hələ iyunun 13-də məlum olub ki, Rusiyanın Ermənistandakı səfiri “1 Mart” cinayət işi üzrə ittiham edilən Ermənistanın ikinci prezidenti Robert Köçəryanla görüşüb. Məlumdur ki, Rusiya Federasiyasının prezidenti Vladimir Putinin Köçəryanla sıx münasibəti var. Görüş erməni tərəfinin kəskin reaksiyasına səbəb oldu. Səfir və Tovmasyanın görüşü, faktiki olaraq, erməni tərəfinin kəskin reaksiyasından sonra baş verib və yeganə diqqətçəkən hal deyil. Məsələ burasındadır ki, Ermənistan Konstitusiya Məhkəməsinin sədri görüş məqamında Köçəryanın gələcək taleyində xüsusi rol oynayırdı. Çünki Köçəryan və digərlərinin işi Konstitusiya məhkəməsinə göndərilir. Bunlardan sonra, faktiki olaraq, Ermənistanın diplomatik heyəti ən sərt vasitələrdən birini seçməklə Köçəryana və Rusiya səfirinin görüşünə münasibət göstərərək, Moskvanın Ermənistanın daxili işlərinə qarışmasına mənfi yanaşdığını nümayiş etdirib. Bundan sonra rus tərəfi hər hansı bir bəyanat və ya diplomatik vasitə ilə vəziyyəti yumşaltmağa cəhd etmək əvəzinə, aşkarcasına erməni tərəfinin mövqeyinə əhəmiyyət verməyərək vəziyyəti daha da kəskinləşdirib. Başqa sözlə desək, yaranmış vəziyyət onu göstərir ki, Rusiyanın özü indiki mərhələdə erməni-rus müttəfiqlik münasibətlərini sınağa çəkir. Ermənistan bu gedişlə Rusiyanın timsalında mütəffiqini itirir. Kreml isə, yəqin ki, İrəvana qarşı daha sərt mövqeyə keçəcək”.
“İravnuk” qəzeti isə baş verənlər fonunda yazır ki, Moskva digər təsir rıçaqlarını da işə salır. Məsələn, qeyd olunur ki, Rusiyada işləyən erməni oliqarxlara ən yüksək səviyyədə xəbərdarlıq olunub ki, Ermənistana pul ayırmasınlar. Rusiyada yaşayan bir çox erməni biznesmen artıq Ermənistandakı fəaliyyətini dondurub. Digər təsir rıçaqlarının da işə salınması Ermənistan üçün artıq müsbət heç nə vəd etmir.
Qeyd edək ki, az əvvəl Apelyasiya məhkəməsi sabiq prezident Köçəryanı yenidən həbsə qaytarıb. Demək, Kremlin “iç Ermənistanda qəti hərəkətə keçməsi üçün” əsaslar kifayət qədərdi – Paşinyan Putini saymadı...
Nahid SALAYEV
