18/07/2019 09:21
728 x 90

Türkiyədə, İranda və Gürcüstanda vəziyyət, Rusiyanın regional qoşunları hazır vəziyyətə gətirildi, Paşinyan Təhlükəsizlik Şurasını topladı...

img

Ermənistan KİV-i xüsusi sevinclə Rusiyanın hərbi qüvvələrinin hazırlıq vəziyyətinə gətirildiyi barədə məlumatlar tirajlayır. Qeyd edilir ki, hazırlıq vəziyyətinə gətirilən silahlı qüvvələr sırasında Ermənistanda dislokasiya olunan Rusiya bazaları da var. Bunu İran və Gürcüstan ətrafında gərginləşən vəziyyət, hətta Türkiyədəki son seçkilərin nəticələri ilə əlaqələndirilər də az deyil.

Maraqlıdır ki, məhz bu hadisələrin fonunda Ermənistanın Baş naziri ölkəsinin Təhlükəsizlik Şurasının iclasını çağırıb. Paşinyan bildirib ki, Ermənistan və qondarma qurumun təhlükəsizliyi hökumət üçün olduqca ciddi prioritetdir: “Qeyd etmək lazımdır ki, bizim əvvəlki iclasımızdan sonra, çox təəssüf, Ermənistan ətrafındakı təhlükəsizlik mühiti nəinki tükənməyib, əksinə, müəyyən proseslər baş verir. Bu proseslər təhlükəsizlik çağırışları məsələsində bizi daha diqqətli olmağa məcbur edir.

Bugünkü iclasımızın gündəmində regional vəziyyətlə əlaqəli olan müvafiq məsələlər də var. Əlbəttə, Ermənistan və Qarabağın (qondarma qurum - red.) təhlükəsizliyi hökumətimiz üçün olduqca ciddi prioritetdir. Və bizim bu istiqamətdə təkcə cari, ortamüddətli yox, eləcə də strateji, uzunmüddətli problemlərin həll edilməsi və müzakirə edilməsi üzrə məsələlərimiz var. Əlbəttə, bu müzakirələr təkcə Təhlükəsizlik Şurası formatında yox, eləcə də siyasi mühitdə, hökumətin müxtəlif iş müzakirələri və məsləhətləşmələri formatlarında baş verir. Lakin Təhlükəsizlik Şurası elə bir orqandır ki, burada bütün müzakirələrin nəticələri əldə olunmalı və konkret praktiki nəticələrə, qərarlara çevrilməlidir”.

Ermənistan Təhlükəsizlik Şurasının iclasında təhlükəsizlik sahəsinə aid olan məsələlərin geniş müzakirə olunduğu qeyd olunur.

Ermənistanın regionda baş verən proseslərdən aşırı əndişə keçirməsi, hətta Təhlükəsizlik Şurasının iclasını çağırması nə ilə bağlıdır?

  • Əhəd Məmmədli: “Söz-söhbət gəzir ki, ABŞ şimaldan İrana hücumda plasdarm kimi Ermənistandan istifadə edəcək”

Politoloq Əhəd Məmmədli “Bakı-Xəbər”ə açıqlamasında bildirdi ki, Rusiya regionumuzu öz maraq dairəsində saxlayır: “Ona görə burada baş verən hadisələri diqqətlə izləyir. Gürcüstan, İran, hətta Türkiyədə baş verən hadisələrə Rusiya öz mənafelərinin əleyhinə cərəyan edən proseslər kimi baxa bilər. Zatən, Gürcüstandakı hadisələri Putin anti-Rusiya provokasiyaları adlandırdı. İranla bağlı olanları da Rusiya ciddi izləyir. Düzdür, müharibə olan təqdirdə İrana görə ruslar amerikalılarla vuruşan deyillər, bunu açıq bəyan da ediblər, amma yaxınlarında ola biləcək müharibəyə də hazırlıqlı olmaq istəyirlər. Türkiyəyə gəldikdə, tərəfdaşları AK Partiya iqtidarının İstanbul Baş Bələdiyyə seçkilərində qərbyönümlü müxalifətə uduzması Moskvanı narahat etməyə bilməz. Ortada Türkiyə ilə skandallı S-400 razılaşması var. Digər sahələrdə böyük həcmli razılaşmalar var. S-500 birgə layihəsi ehtimalı durur. Bu dönəmdə Türkiyədə vəziyyətin qarışması Rusiyaya lazım deyil. Erməni mətbuatı rus qoşunlarının o cümlədən Ermənistanda hazırlıq vəziyyətinə gətirilməsini yuxarıda qeyd etdiklərimlə əlaqələndirirlər. Rusiya Gürcüstan, İran, Türkiyədə baş verənləri maraqlarına zidd qiymətləndirib buna cavab olaraq adekvat addımlar haqqında fikirləşə bilər. İlk görünüşdə İran və Türkiyəyə Gürcüstanla müqayisədə Rusiyanın daha az təsiri ola bilər, lakin bu ölkələrlə də Moskvanın tarixi münasibətləri var və təsir rıçaqlarını saxlayır”.

Politoloqun sözlərinə görə, Ermənistanın narahatlıq keçirməsi səbəbsiz deyil: “Çünki Ermənistanın İranla böyük sərhədi var. İranda ola biləcək müharibə Ermənistanı çox ciddi narahat edir. Ermənistan müharibə alovunun öz ərazisinə keçəcəyindən qorxur. Söz-söhbət gəzir ki, ABŞ şimaldan İrana hücumda plasdarm kimi Ermənistandan istifadə edəcək. Düzdür, Ermənistanın buna gedəcəyi mənə inandırıcı gəlmir. Bu, İrəvan üçün böyük risqdir. Ermənistan fikirləşir ki, bununla Rusiya və İranın arasında qala bilər. İstənilən halda, bölgədə gərginləşən vəziyyətin Rusiyanı narahat etməsi fonunda, Ermənistan da ciddi əndişələnir. Çünki Ermənistan, faktiki olaraq, Rusiya üçün vassal ölkədir”.

Məhəmmədəli QƏRİBLİ

Son xəbərlər