Məlum olduğu kimi, Pravoslav Parlamentlərarası Assambleyasının Tiflisdə keçirilən iclası zamanı Rusiya nümayəndə heyətinin rəhbəri, Dövlət Dumasının deputatı Sergey Qavrilov Gürcüstan parlamentinin spikerinin kreslosunda oturub. Həmin məqamda spiker İrakli Kobaxidze Azərbaycanda səfərdə idi. Rusiyalı deputata hakimiyyət tərəfindən bu cür diqqətin göstərilməsi müxalifəti hiddətləndirib və iyunun 20-də axşam Gürcüstanda çoxminli etirazlar başlayıb.
Baş verən hadisələr Gürcüstanda anti-Rusiya ovqatını gücləndirib. Eyni zamanda, iki ölkə arasında onsuz da soyuq olan münasibətlərə öz təsirini göstərib. Rusiya Prezidenti Vladimir Putin Gürcüstanda baş verən son hadisələri Təhlükəsizlik Şurasının iclasında müzakirə edib. Müzakirələrin ardınca Putin Rusiya aviaşirkətlərinin Gürcüstana uçuşlarının iyulun 8-dən etibarən dayandırılması haqda sərəncam verib. Bu qərar “Rusiyanın milli təhlükəsizliyinin təmin edilməsi, Rusiya vətəndaşlarının ”cinayətkar və digər qanunsuz hərəkətlərdən qorunması zərurəti" ilə əsaslandırılır. Habelə sərəncama əsasən, turoperatorlara və turagentlərə tövsiyə edilir ki, Gürcüstan kurortlarına turpaketlərin satışından çəkinsinlər. Digər tərəfdən, Rusiya XİN-i bəyanatla çıxış edərək ölkə vətəndaşlarına “şəxsi təhlükəsizlikləri baxımından” Gürcüstana səfərlərdən çəkinməyi tövsiyə edib. Bütün bunlar iki ölkə arasında münasibətləri bir az da gərginləşdirib.
Ən maraqlı məqam ondan ibarətdir ki, Gürcüstanda müşahidə olunan ani-Rusiya ovqatı Ermənistan mediasında böyük məmnunluqla və maraqla izlənir. Açıq-aydın hiss olunur ki, erməni mediası bunu böyük şadyanaqlıqla izləyir. Sanki bütün bu proseslər, necə deyərlər, ermənilərin ürəyincədir. Ermənistan təcavüzkar siyasət apardığına görə Azərbaycan və Türkiyə bu ölkə ilə sərhədləri bağlayıb. Ermənistan Avropa və Rusiya ilə əlaqələri Gürcüstan üzərindən həyata keçirir. Bu kontekstdən yanaşsaq, erməni mediası, əslində, narahat olmalıdır. Ancaq tam əksinə olaraq, erməni mətbuatı Gürcüstandaki ant-Rusiya ovqatının güclənməsindən sevinir.
Maraqlıdır, bu nə ilə bağlıdır? Bunun arxasında hansı niyyət dayanır?
Məhəmməd Əsədullazadə: “Onlar çalışırlar ki, Rusiya bu ölkəyə müdaxilə etsin və nəticədə Cavaxetiyada yeni etirazlara səbəb olacaq proseslərə start versinlər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə kontekstdən yanaşdı: “Gürcüstanla Rusiya arasında davam edən siyasi qalmaqal iki ölkə arasında dərin siyasi problemdən qaynaqlanır. Ermənistan mediasının bundan istifadə edib məmnun olması bu xalqın xislətindən xəbər verir. Ermənistan daim Rusiyanın əlaltısı olub, qonşularına qarşı aqressiya həyata keçirib. Ermənistan cəmiyyəti hesab edir ki, Gürcüstanın Rusiya ilə əlaqələrini zəiflətməsi bu ölkədən turist axınının qarşısnı alacaq. Nəticədə həmin turistlər Ermənistana səfər edəcəklər. Bundan əlavə, hesab edirlər ki, Gürcüstanda vəziyyətin qarışması bu ölkəyə qarşı ərazi iddialarına zəmin yaradar. Nəzərə almaq lazımdır ki, Cavaxetiyada ermənilər separatizmə meyllidir və Ermənistanda müəyyən dairələr bu bölgənin müstəqilliyi məsələsini zaman-zaman qabardırlar. Hesab edirem ki, buradakı müəyən qüvvələr media vasitəsilə özlərini Rusiyaya yaxın göstərməklə, Cavaxetiyada növbəti münaqişə ocağı yaratmaq niyyətindədirlər. Məhz baş verənlər Gürcüstanın ərazi bütövlüyünə qarşı yönəlib və o üzdən, ermənilər ölkədə baş qaldıran anti-Rusiya ovqatından məmnundurlar. Ermənilər çalışırlar ki, Rusiya bu ölkəyə müdaxilə etsin və nəticədə Cavaxetiyada yeni etirazlara səbəb olacaq proseslərə start versinlər. Gürcüstanın demokratik imicinin qorunmasını qəbul etmirlər. Rusiya vasitəsilə bu ölkənin çökdürülməsində maraqlıdırlar”.
Vidadi ORDAHALLI
