Ermənistanın Rusiyaya qarşı yeni kampaniyası - səfir Konstitusiya Məhkəməsini ələ almaqda suçlanır
Ermənistanda anti-Rusiya ovqatını qızışdırmağa cəhdlər davam edir. Rusiyanın həmin ölkədəki fəaliyyəti üzərində rəsmi Moskvaya ittihamlar yağdırılır. Bir neçə gün əvvəl Rusiyanın Ermənistandakı səfiri Sergey Kopırkinin Robert Köçəryanla ikincinin ofisində görüşməsi üzərində Ermənistanın ictimai-siyasi dairələri böyük ajiotaj yaratdılar. Hətta həmin hərəkətinə görə səfiri XİN-ə çağırıb ona xəbərdarlıq da etdilər.
İndi də səfirin Konstitusiya Məhkəməsində həmin qurumun sədri ilə görüşməsi faktını ölkənin daxili işinə qarışmaq kimi qəbul edirlər. Hətta bildirilir ki, Rusiya bununla Köçəryanın nəinki azadlıqda qalmasını, həmçinin, onunla bağlı olan cinayət təqibinə son verilməsinə nail olmaq istəyir. Erməni mətbuatı iddia edir ki, məhz həmin görüşdən sonra R.Köçəryanın iki ərizəsi icraata qəbul edilib. Hər iki şikayətin birləşdirilib bir yerdə baxılmasına qərar verilib. Bildirilir ki, Rusiya, faktiki olaraq, bu cür təzyiq rıçaqları ilə Ermənistanın daxilindəki vəziyyəti gərginləşdirir və yeni hakimiyyəti siyasi səhnədən sıxışdırmağa çalışır. Bu ittihamdan həm də belə nəticə hasil olur ki, hətta Ermənistanın ali vəzifəli şəxsləri belə Paşinyanın əleyhinə Rusiya ilə açıq əməkdaşlığa gedirlər. Ermənistanda Rusiyaya qarşı başladılan bu kampaniya bir nəticə verə bilərmi?
- Elşən Mustafayev: “Rusiyanın bu gedişləri, bəzi məmurların açıq şəkildə Paşinyandan üz çevirməsi Ermənistanda yeni dönəmin başlandığına işarədir”
Siyasi məsələlər üzrə ekspert Elşən Mustafayev “Bakı-Xəbər”ə açıqlamasında bildirdi ki, bu cür məsələlərdə Rusiyanı günahlandırmaq həm də vəziyyətdən çıxış yolu kimi dəyərləndirilir: “Baş verən hadisə bir daha sübut edir ki, Paşinyan hakimiyyətin digər qolları üzrə üstünlüyünü təmin edə bilməyib. Müdafiə, təhlükəsizlik və ədliyyə qurumlarında da olan yüksək rütbəli zabitlər, işçilər Paşinyanın hakimiyyətilə barışmaq istəmirlər. Paşinyanın prosesin qarşısını ala biləcək siyasi gücü yoxdur. Köçəryanın həbsdə saxlanması “Qarabağ klanı”nı olduqca narahat edən məsələlərdən biri idi. Paşinyan dəfələrlə Qarabağa səfər edib, oradakı mövqeyini gücləndirməyə çalışsa da, son hadisə göstərdi ki, o, belə dəstəkdən məhrumdur. Məhkəmə sistemi, demək olar ki, Paşinyana qarşı çıxdı. Onun yeganə ümidi xalqın məhkəmələri boykot etməsinə qaldı, o da bir nəticə vermədi. Bununla sübut olunur ki, köhnə klan yavaş-yavaş təşəbbüsü ələ alır və Paşinyan üzərində ilk qələbəsini əldə etmiş oldu. Serj Sarkisyan, Robert Köçəryan, Bako Saakyan və Arkadi Qukasyanın bir cəbhədə birləşərək Paşinyana qarşı olmaları bəllidir. Bu prosesin sürətləndiyi özünü Köçəryanın azadlığa çıxmasından sonra daha qabarıq göstərir. Təbii ki, həmin klanın arxasında hər zaman Rusiya durub. Məhz Rusiyanın dəstəyilə köhnə hakimiyyət Qarabağı və ətraf rayonları işğal edə bildi. İnqilabın ilk anında açıq hərəkət etməyən Rusiya birillik fasilədən sonra uyğun zaman bilib, bu cür addımların atılmasına icazə verir. Əslində, Rusiyanın səfirinin davranışlarında qanunsuz nəsə yoxdur, amma alt məna var. Bununla deyirlər ki, istənilən vaxt Köçəryanı prezident edə bilərik. Rusiyanın bu gedişləri, bəzi məmurların açıq şəkildə Paşinyandan üz çevirməsi Ermənistanda yeni dönəmin başlandığına işarədir. Rusiyaya yağdırılan ittihamlar fayda verməyəcək. Çünki Moskva oranı öz təsir dairəsinə aid edib. Ona görə də səfir ölkəsinin nə etmək istədiyinə dair mesajı öz açıq davranışları ilə izah edir”.
Məhəmmədəli QƏRİBLİ
