Beynəlxalq tədbirləri olduqca yüksək səviyyədə keçirən Azərbaycan növbəti beynəlxalq tədbirə evsahibliyi edir. Məlum olduğu kimi, iyunun 24-də Heydər Əliyev Mərkəzində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Birləşmiş Millətlər Təşkilatı ilə birgə keçirdiyi BMT-nin Dövlət Xidmətləri Forumu öz işinə başlayıb.
Qeyd edək ki, forum 2003-cü ildən etibarən 23 iyun – BMT-nin Dövlət Xidmətləri Günü ərəfəsində hər il təşkil olunur. Bu forumun keçirilməsində məqsəd dövlət idarəçiliyi, dövlət xidmətlərinin göstərilməsinin qabaqcıl modelləri, innovasiyalar və bu sahədə aktual olan məsələlər üzrə müzakirələrin aparılması, habelə dövlətlərin bu istiqamətlərdə qabaqcıl təcrübələrinin mübadiləsidir. Həmçinin, forum çərçivəsində dövlət xidmətləri sahəsində dünya üzrə ən qabaqcıl və innovativ modellər mükafatlandırılır.
Paytaxtımızda öz işinə başlayan forumda dünyanın 190-dan çox ölkəsindən 500-dən artıq nümayəndə iştirak edir. Builki forumda BMT baş katibinin müavini cənab Lui Zenmin, o cümlədən, müxtəlif ölkələrin dövlət idarəçiliyi və dövlət xidmətləri üzrə nazirləri, yerli idarəetmə orqanlarının, akademik dairələrin və özəl sektorun rəhbər şəxsləri iştirak edirlər.
Məlumatlara görə, forumun Azərbaycan Respublikasında keçirilməsinə zəmin yaradan ən önəmli amillər ölkəmizdə dövlət xidmətləri sahəsində qazanılmış nailiyyətlər, “ASAN xidmət”in uğurlu fəaliyyəti və 2015-ci ildə BMT-nin Dövlət Xidmətləri mükafatına layiq görülməsidir.
Belə nüfuzlu forumun Azərbaycanın evsahibliyi ilə keçirilməsinə əsas verən amillər nədir?
- Vüqar Rəhimzadə: “BMT-nin Dövlət Xidmətləri Forumu kimi bir tədbirin Azərbaycanda reallaşdırılması dünya birliyinin ölkəmizə inamının, münasibətinin göstəricisidir”
“İki sahil” qəzetinin baş redaktoru, politoloq Vüqar Rəhimzadə “Bakı-Xəbər”ə bildirdi ki, belə nüfuzlu bir forumun Azərbaycanda keçirilməsi və bura olduqca nüfuzlu şəxslərin qatılması təsadüfi deyil. V.Rəhimzadə hesab edir ki, bu, ölkəmizin beynəlxalq aləmdə qazandığı müsbət imicin göstəricisidir. “Hesab edirəm ki, Azərbaycan həm iqtisadi qüdrətinə, həm siyasi nüfuzuna görə yalnız regional deyil, eyni zamanda da beynəlxalq tədbirlərin keçirilməsi üçün əlverişli məkandır. Ölkəmizdə çox sistemli şəkildə dünyanın nüfuzlu beynəlxalq təşkilatlarının beynəlxalq tədbirləri keçirilir. İyunun 24-də açılış mərasimi olan BMT-nin Dövlət Xidmətləri Forumu kimi bir tədbirin Azərbaycanda reallaşdırılması dünya birliyinin ölkəmizə inamının, münasibətinin göstəricisidir. Azərbaycan təkcə bu foruma deyil, eyni zamanda, böyük humanitar, iqtisadi forumlara, idman yarışlarına, musiqi yarışmalarına uğurla evsahibliyi edib. Bütün bu layihələrə ölkəmiz yüksək səviyyədə evsahibliyi edib. Düşünürəm ki, Azərbaycan dünya üçün nümunə ola biləcək bir model kimi dünyada belə layihələrin reallaşdırılmasının nə qədər əhəmiyyətli olmasını özünün yüksək evsahibliyi qabiliyyətilə təsdiqləyib. Azərbaycan ən böyük beynəlxalq layihələrin həyata keçirilməsində dünyanın ən uğurlu ünvanlarından biridir” - deyə V.Rəhimzadə vurğuladı.
- Bəhruz Quliyev: “Azərbaycanın imici yüksəldikcə, ölkəmiz beynəlxalq tədbirlərə, forumlara, yarışlara evsahibliyi etmək hüququ qazanır”
“Səs” qəzetinin baş redaktoru, politoloq Bəhruz Quliyev də hesab edir ki, Azərbaycanın bütün beynəlxalq tədbirlərə uğurla evsahibliyi etməsi belə bir nüfuzlu tədbirin ölkəmizdə keçirilməsinə əsas verib. “Qeyd edim ki, ölkəmizdə keçirilən forumun özü də təsdiq edir ki, Azərbaycan bu gün beynəlxalq tədbirləri uğurla keçirir. Bu da onu göstərir ki, Azərbaycanın artıq beynəlxalq münasibətlər sistemində öz yeri müəyyənləşib. Düzgün aparılan xarici siyasətin kökündə bir Azərbaycan marağı var. Cənab Prezident qeyd edir ki, bizim apardığımız xarici siyasət milli maraqlara söykənən siyasətdir. Onların hər biri beynəlxalq münasibətlər sistemində Azərbaycanın öz yerinin real müəyyənləşməsinə imkan verir. Ölkəmizin regionda güclü bir dövlət kimi söz sahibinə çevrilməsi kimi amillər də burada rol oynayır. Dövlətin söz sahibinə çevrilməsi üçün ilk növbədə o müstəqil siyasət aparmağı bacarmalıdır, digər tərəfdən, regionda böyük layihələrə təşəbbüskarlıq göstərməli və təşkilatçılıq etməlidir. Azərbaycan bunu bacarır. Ölkəmiz regiondakı bir sıra layihələrin təşəbbüskarıdır və eyni zamanda, təşkilatçıdır. Həmçinin, daxili sabitlik, iqtidar və xalq birliyi, dövlət daxilində aparılan düzgün siyasət və s. Azərbaycanın imicinin formalaşmasına xidmət edir. Belə hesab edirəm ki, Azərbaycanın imici yüksəldikcə, ölkəmiz beynəlxalq tədbirlərə, forumlara, yarışlara evsahibliyi etmək hüququ qazanır. Bu da kiminsə istəməyindən və istəməməyindən asılı deyil, Azərbaycanın gücünün göstəricisi kimi xarakterizə oluna bilər” - deyə B.Quliyev qeyd etdi.
İradə SARIYEVA
.jpg)
.jpg)
