Çirkin oyunların və saxtakarlığın mahir oyunçuları olan ermənilər təxribatçı əməllərini davam etdirirlər. Qəribədir ki, ermənilərin bu oyunlarını beynəlxalq qurumlar sükutla qarşılayırlar. Uzun illərdir Azərbaycan torpaqlarını işğal altında saxlayan ermənilər bizim ərazilərimizdə ağılasığmaz işlər həyata keçirirlər. Onların bu əməlləri bütün beynəlxalq tələblərə, konvensiyalara, hətta bəşəriyyəti ciddi qayğılandıran humanizm prinsiplərinə ziddir.
Qondarma “Dağlıq Qarabağ Respublikası”nın saxta rəhbəri Bako Saakyan erməni mətbuatına bildirib ki, avqust ayında “Artsax”da VII ümumerməni yay oyunları keçiriləcək. Oyunların keçirilməsinə böyük hazırlıq getdiyini deyən B.Saakyanın sözlərinə görə, yarışda dünyanın bir sıra ölkələrindən idmançılar iştirak edəcəklər.
Avqust ayında erməni işğalında olan Azərbaycan torpaqlarında keçiriləcək 7-ci üzdəniraq ümumerməni oyunlarının məşəllərinin artıq yandırılması Azərbaycanda böyük narazılıqla qarşılanır. Qeyd edək ki, işğalçılar oyunun 3-cü məşəlini işğal altındakı Ağdam rayonunun Şahbulaq yüksəkliyində, Qarabağ xanı Pənahəli xanın tikdirdiyi qədim qalada yandırıblar.
Separatçı erməni mətbuatının yaydığı məlumata görə, qondarma rejimin başçısı B.Saakyan və digər “məmur”ların qatıldığı tədbirdə oyunların məşəlini aprel döyüşlərinin “qəhrəmanı”, işğalçı baş leytenant Artur Aqasyan yandırıb...
Onu da vurğulayaq ki, qondarma ümumerməni oyunlarının birinci məşəli Türkiyənin Hatay vilayətindəki Musadağın ətəyində yerləşən erməni kilsəsində, ikinci məşəli isə Ermənistanın Türkiyə ilə sərhədi yaxınlığında, Ağrıdağın ətəyindəki Xor Virap kilsəsində yandırılıb.
Akif Nağı: “Göründüyü kimi, artıq bu yarışın saxta və qondarma olduğunu dərk edən respublikalar var”
Qarabağ Azadlıq Təşkilatının (QAT) sədri, politoloq Akif Nağı “Bakı-Xəbər”ə açıqlamasında separatçı qurumun keçirdiyi saxta oyunların böyük narazılıq və hiddət hissilə qarşılandığını bildirdi. A.Nağının sözlərinə görə, Azərbaycan ictimaiyyəti, vətəndaş institutları və dövlətimiz birləşərək erməni saxtakarlığını bütün dünyada ifşa etməlidirlər. A.Nağının bildirdiyinə görə, ermənilərin bu təxribatçı hərəkətləri sülh danışıqlarına ağır zərbə vurmaqla yanaşı, həm də qondarma rejimi tanıtmağa xidmət edir. O qeyd etdi ki, bütün gücümüzü səfərbər edərək bu oyunların baş tutmamasına çalışmalıyıq: “Biz bunu böyük hiddət və narazılıqla qarşılayırıq. Ermənilərin işğal altında saxladıqları Azərbaycan torpaqlarında belə bir qondarma oyunlar keçirməsi və xarici idmançıları da bu oyunlara cəlb etməsi yolverilməzdir. Bu məsələ ilə bağlı həm xalqımız, həm dövlətimiz bir araya gələrək ciddi şəkildə tədbir görməlidir. Bu oyunların Azərbaycanın tarixi ərazisi Xankəndidə təşkil ediləcəyi ilə bağlı məlumat bizi çox ciddi narahat etməlidir. Hesab edirəm ki, Azərbaycan Xarici İşlər Nazirliyi ölkəmizdə fəaliyyət göstərən xarici ölkə səfirliklərinə müraciət etməli və onların qarşısında tələb qoymalıdır ki, öz idmançılarının işğal altında olan Azərbaycan torpaqlarında keçirilməsi nəzərdə tutulan qondarma oyunlara getməsinin qarşısını alsınlar. Eləcə də xaricdə fəaliyyət göstərən Azərbaycan səfirlikləri, diplomatik korpusları da yerləşdikləri ölkələrə müraciət etməlidirlər. Bu olduqca ciddi bir məsələdir və ermənilərin növbəti təxribatının qarşısının alınması üçün mütəşəkkil işlər görməliyik. Sözün açığı, qondarma “respublika”da ermənilərin keçirmək istədiyi yay oyunlarının qarşısının alınması üçün çıxışlar edirik, etirazımızı bildiririk”.
Ermənilərin qondarma ümumerməni yay oyunlarının məşəllərindən birini Vanda yandırdığını və orada üzdəniraq “DQR”in “bayrağı”nı qaldırdıqlarını narazılıqla qarşılayan A.Nağı hesab edir ki, onların saxta yarışın məşəllərindən birini Pənah xanın inşa etdirdiyi tarixi Şahbulaq qalasında yandırması böyük hiddət doğurur.
“Biz ermənilərin bu təxribatının qarşısının alınması üçün ciddi işlər görməliyik. Onlar mümkün qədər bu yarışda daha çox ölkədən idmançı iştirak etməsinə çalışırlar. Bildiyim qədər, artıq Gürcüstan və Türkiyə xarici işlər nazirlikləri öz idmançılarının bu üzdəniraq yarışda iştirak etməsinə qadağa qoyublar. Bu barədə erməni mətbuatı yazıb. Göründüyü kimi, artıq bu yarışın saxta və qondarma olduğunu dərk edən respublikalar var və biz də saxta ümumerməni oyunlarının baş tutmaması üçün öz təbliğatımızı bütün səviyyələrdə davam etdirməliyik” - deyə A.Nağı bildirdi.
İradə SARIYEVA
