Bütün dünyanın gözləri Türkiyədən çəkildi. Çünki həmin ölkənin ən böyük şəhərinə rəhbərlik etmək uğrunda iki partiyanın apardığı mübarizəyə son qoyuldu. Budəfəki seçkinin nəticələrini hamı qəbul etdi. Hətta ölkə başçısı Ərdoğan da qalibi təbrik etdi.
İmamoğlunun opponenti olan Binəli Yıldırım da yeni bələdiyyə sədrini təbrik edib. Bu, eyni zamanda, bir etirafdır. Məğlubiyyəti qəbul etmək etirafı. AKP acı olsa da, bunu qəbul etmək zorunda qaldı. İmamoğlu bu qələbəni birinci turda da qazanmışdı. Onda fərqin az olması hakim partiyanı, nəyin bahasına olursa-olsun, nəticələrlə razılaşmayıb, onları ləğv etməyə vadar etdi. Onda namizədlərin topladığı səslər arasındakı fərq çox az idi, cəmi 13 min səslə ölçülürdü.
Təkrar səsvermənin keçirilməsi nəticəsində isə Əkrəm İmamoğlu 800 min fərqlə yenidən qalib gəldi. Türkiyənin daxilindəki siyasi ekspertlər hesab edirlər ki, seçkinin məhz bu sonuncla bitməsi Türkiyənin, AKP və CHP-nin gələcək talelərinə ciddi təsir edəcək.
Bildirilir ki, CHP-nin namizədi Əkrəm İmamoğlunun qələbə qazanmasının səbəblərindən biri kimi onun yumşaq davranışlarıyla yanaşı, son bir həftədə siyasi arenada gözlənilməyən hadisələrin baş verməsi də rol oynayıb. Çox açıq ifadə etmək lazımdır ki, terrorçuların başçısı Abdullah Öcalanın məktubunun yayılması, Ordu valisinin iqtidar tərəfindən müdafiəsi və bəzi xoşagəlməzliklər vəziyyəti dəyişdirdi. İki seçki arasındakı kəskin fərqin başqa bir izahı isə YSK-nın 31 mart seçkilərinin nəticələrini etirazla ləğv etməklə seçicinin iradəsi əleyhinə çıxması göstərilir. Bununla seçkidən qələbəylə çıxan tərəf zərərçəkmiş kimi xalqın gözündə ucaldı. Nəzərə alınmadı ki, xalq hər zaman çarəsiz vəziyyətdə qalanın tərəfində olur. İmamoğlu sadəcə İstanbulda deyil, 39 rayonun 28-də də yüksək nəticə əldə edib. Bu nəticələr Türkiyə üçün yeni səhifələr açacaqmı, iki seçkinin nəticələri arasındakı kəskin fərqi başqa hansı amillərlə izah etmək olar?
Qabil Hüseynli: “Bunu CHP-nin növbəti qələbələrinin əsasını qoyan bir hadisə kimi qeyd edə bilərik”
Politoloq Qabil Hüseynli “Bakı-Xəbər”ə açıqlamasında bildirdi ki, Türkiyədəki son seçki həmin ölkədəki demokratiyanın yüksək səviyyədə olduğunu bütün dünyaya nümayiş etdirdi: “Xalqın iradəsi qalan hər şeyi üstələdi. Seçkilər göstərdi ki, qapılar arxasında nə qədər çalışmalar olsa da, son nəticədə xalqın iradəsi öz rolunu oynadı. Bəlkə də tarixdə yeganə hadisədir ki, bir şəxs bələdiyyə seçkiləri uğrunda mübarizədə iki dəfə qələbə çalır. İmamoğlunun ikinci dəfə, həm də çox inamlı qələbə qazanması göstərdi ki, cəmiyyət yenilik və dəyişiklik istəyir. Bu, eyni zamanda, sübut etdi ki, CHP böyük şəhərlərdə çox dəbdədir. Yəni ölkənin mədəni elitası və bilim adamlarının cəmləşdiyi şəhərlərdə onlar AKP-ni üstələyirlər. AKP-nin nüfuzu əyalətlərdə qalıb. Orada da gedib bir tayfa başçısı ilə danışırlar, onunla da 200-300 nəfərin kimə səs verəcəyi ilə bağlı məsələni həll edirlər. Bu mənada, İstanbul seçkisini Türkiyənin siyasi həyatında bir dönüş saymaq olar. Çünki Türkiyədə deyirlər ki, “İstanbulu qazanan Türkiyəni qazanar”. Hesab edirəm ki, bu gedişlə, CHP-nin güclənməsi, AKP-nin isə zəifləməsi yaşanacaq. Yəqin ki, CHP növbəti addımında Türkiyədə növbədənkənar parlament seçkilərin keçirilməsini istəyəcək. Buna nail olub, qalib də gələcək. İmamoğlunun bu qələbəsi Türkiyə tarixinə qızıl hərflərlə qeyd edildi. Əsl Atatürkün adına layiq olan qələbəydi. İstanbulla dönüş başlaycaq. Bunu CHP-nin növbəti qələbələrinin əsasını qoyan bir hadisə kimi qeyd edə bilərik. Yəqin ki, bu fonda növbədənkənar prezident seçkiləri ilə bağlı tələb də güclənə bilər”.
Məhəmmədəli QƏRİBLİ
