Xəbər verildiyi kimi, ötən gün Rusiya prezidenti Vladimir Putin Gürcüstanda baş verən son hadisələri Təhlükəsizlik Şurasının iclasında müzakirə edib. Müzakirələrin ardınca Putin Rusiya aviaşirkətlərinin Gürcüstana uçuşlarının iyulun 8-dən etibarən dayandırılması haqda sərəncam verib.
Bu qərar “Rusiyanın milli təhlükəsizliyinin təmin edilməsi, Rusiya vətəndaşlarının cinayətkar və digər qanunsuz hərəkətlərdən qorunması zərurəti” ilə əsaslandırılır. Habelə sərəncama əsasən turoperatorlara və turagentlərə tövsiyə edilir ki, Gürcüstan kurortlarına turpaketlərin satışından çəkinsinlər.
Habelə Rusiya XİN iyunun 21-də bəyanatla çıxış edərək ölkə vətəndaşlarına “şəxsi təhlükəsizlikləri baxımından” Gürcüstana səfərlərdən çəkinməyi tövsiyə edib. XİN Gürcüstanda yaranmış daxili siyasi vəziyyətdən ciddi narahatlığını bildirib.
Xatırladaq ki, pravoslav parlamentlərarası Assambleyasının Tiflisdə keçirilən iclası zamanı Rusiya nümayəndə heyətinin rəhbəri, Dövlət Dumasının deputatı Sergey Qavrilov Gürcüstan parlamentinin spikerinin kreslosunda oturub. Həmin məqamda spiker İrakli Kobaxidze Azərbaycanda səfərdə idi. Rusiyalı deputata hakimiyyət tərəfindən bu cür diqqətin göstərilməsi müxalifəti hiddətləndirib və iyunun 20-də axşam Gürcüstanda çoxminli etirazlar başlayıb. Təhlükəsizlik qüvvələri parlament binasına hücum edən kütləni dağıtmaq üçün güc tətbiq edib, yüzlərlə adam yaralanıb. Bir nəfərin xəstəxanada öldüyü bildirilir. Spiker Kobaxidze dünən istefa verməli olub. Aksiyalar ötən gün də davam edib və müxalifət tərəfdarları bir gün əvvəl tutulanların dərhal azadlığa buraxılmasını tələb ediblər.
Faktiki olaraq Azərbaycanla qonşu ölkədə stabillik pozulub, ölkə demək olar ki, inqilab ərəfəsindədir. Yaranmış vəziyyətdən istifadə edən erməni mediası maksimum dərəcədə bizim ziyanımıza olan təbliğata start verib. Onlar iddia edirlər ki, güya qonşu ölkədə baş verənlərdə Azərbaycan izi də müşahidə edilir. Və nəticə etibarilə erməni analitikləri gah Cavaxetiyada “Qarabağ ssenarisi”ni reallaşdırmağa çalışmaqla Gürcüstanla əlaqələrin kəskinləşməsinə oynayırlar, gah da ciddi cəhdlə Tiflis-Bakı əlaqələrinə zərbə vurmağa səy edirlər. Onlar hətta baş verənlərin fonunda Azərbaycanın iri investisiya layihələrinin taleyinin də pis olacağına dair rəylər verirlər. Gürcüstandakı proseslərin Azərbaycanın həmin ölkədəki maraqlarına, iri layhələrinə nə kimi təsiri ola bilər?
Hatəm Cabbarlı: “Həmin layihələrdən ən böyük dividenti elə Gürcüstanın özü götürürsə...”
Siyasi elmlər doktoru Hatəm Cabbarlı baki-xeber.com-a bildirdi ki, Gürcüstanda son iki gün ərzində baş verən hadisələr siyasi hakimiyyətin hələ tam oturuşmadığını göstərən ən önəmli sübutlardan biridir: “Rusiya nümayəndələrinə törədilən təxribat və provokasiya genişlənməyə başladı. Bu artıq kiçik bir hadisədən hökumətin istefası tələblərinə qədər yol aça bilib. Artıq parlament sədri istefa edib, daxili işlər naziri də istefa edəcəyini bəyan edib. Vəziyyətdən görünür ki, son illər Gürcüstanın mövcud hakimiyyətinin Rusiya ilə münasibətləri qaydaya salması siyasətinə görə, ölkədə böyük bir narazı kütlə yaranıb. Əlbəttə bizmlə qonşu olan ölkədə stabilliyin olması önəmlidir. Bununla yanaşı Azərbaycanın Gürcüstanda həm də iqtisadi maraqları əks olunur. Ora xeyli sərmayə qoymuş ölkəyik. Bunu istər enerji resurslarının nəqli, istərsə də digər sahələrə aid etmək olar. Son günlərdə baş verən hadisələr hələlik Azərbaycanın iqtisadi maraqlarına o qədər də təhlükə yaratmır. Amma hadisələrin böyüməsi və ümumi təlatümə çıxması Azərbaycanın sərmayəsi üçün problemlər yarada bilər. Praktikadan bəllidir ki, dövlətlərdə baş verən çaxnaşmalar zamanı hakimiyyətə gələn istənilən qüvvə beynəlxalq razılaşmaları qoruyub saxlamaqda maraqlı olur. Hesab edirəm ki, baş verə biləcək hər hansı bir hakimiyyət dəyişikliyi belə bizim iqtisadi maraqlarımıza ziyan verməyəcək. Çünki həmin layihələrdən ən böyük dividenti elə Gürcüstanın özü götürürsə, niyə bundan yan keçmək istəsinlər. Təbiidir ki, bu ətrafda erməni təbliğatı ciddi şayihələr yayır. Amma bunlara ciddi əhəmiyyət vermək lazım deyil. Hadisələr daha da böyük miqyas alacağı təqdirdə, Azərbaycan iqtisadi maraqlarının qorunması ilə bağlı qarşı tərəflə müzakirələr apara bilər. Hələlik elə bir ciddi təhlükə görünmür. Amma hadisələri diqqətlə izləməmiz lazımdır”.
Məhəmmədəli QƏRİBLİ
