Prezident İlham Əliyevin sərəncamı ilə daxili işlər naziri Ramil Usubov Prezident yanında Təhlükəsizlik Şurasının katibi, Dövlət Təhlükəsizlik Xidmətinin rəisi Mədət Quliyev isə vəzifəsindən azad edilərək müdafiə sənayesi naziri təyin edildi. Prezidentin başqa sərəncamı ilə daxili işlər nazirinin birinci müavini Vilayət Eyvazov daxili işlər naziri, Korrupsiyaya Qarşı Mübarizə Baş İdarəsinin rəis müavini Əli Nağıyev isə Dövlət Təhlükəsizliyi Xidmətinin rəisi təyin edildi. Aparılan bu kadr islahatı maraqlı dönəmə təsadüf edir.
Yeni təyinatlardan cəmi bir gün əvvəl ölkə başçısı sosial inqilab kimi qəbul edilən 17 sərəncama imza atdı. Beləliklə, Prezident sosial islahatlarla yanaşı, kadr və struktur islahatlarını da genişləndirir. Bəllidir ki, bunlar bir-birilə əlaqəlidir. Yeni prezident seçkisindən sonra bu proses daha dinamik hal almağa başlayıb. Məhz həmin seçkidən sonra bir qrup gənc kadra yüksək vəzifələr etibar edildi. Elə həmin dönəmdə bir sıra dövlət qurumlarının ləğvi və ya birləşdirilməsi prosesi həyata keçirildi. Bu prosesin davam etdirilməsi zəruridir. Maaş və pensiyaların artımı və bu prosesin gələcəkdə də davam etdirilməsi hakimiyyətin bütün resurslarının səfərbərliyini diqtə edir. Çünki yalnız neftin qiymətləri üzərində iqtisadi problemləri həll etmək çətindir, çevik və müasir çağırışlara cavab verən idarəçilik sistemi qurulmalıdır. Bu mənada bir sıra dövlət strukturlarında yeni yanaşmaların tətbiqinə ehtiyac var. Bu baxımdan, paralel şəkildə aparılan və müxtəlif sahələri əhatə edən islahatlar müsbət nəticə verirmi? Birmənalı şəkildə buna “hə” cavabı vermək olar. Çünki ilin əvvəlindən start götürən struktur dəyişikliklərində əsas məqsəd idarəçilikdə illərdən bəri davam edən sosial-iqtisadi inkişaf proseslərinin ortaya çıxardığı boşluqları daha optimal variantla doldurmaq olub. Dinamik inkişafı təmin etmək üçün iqtisadi və sosial sferada əsaslı müsbət dəyişikliklərin həyata keçirilməsi, dövlət idarəçiliyi sisteminin təkmilləşdirilməsi, səmərəliliyin yüksəldilməsi, çevik və məqsədyönlü fəaliyyət göstərən yeni idarəetmə strukturunun formalaşdırılması artıq zərurətə çevrilib.
Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev də bu məsələyə toxunaraq struktur islahatının gözlənildiyini vurğulamışdı. Dövlət başçısının yanvarın 14-də imzaladığı fərmanlar isə artıq struktur islahatları istiqamətində mühüm qərarların verildiyini özündə əks etdirir.
Prezident İlham Əliyevin rəhbərliyi altında son 16 ildə aparılan kompleks islahatlar Azərbaycana "dünyada ən islahatçı ölkə” imici qazandırmaqla yanaşı, həm də dövlətimizin davamlı və tarazlaşdırılmış iqtisadi inkişafını təmin edib. Dövlət başçısı tərəfindən aparılan struktur islahatlarının əsas məqsədi isə idarəetmədə çevikliyi və səmərəliliyi artırmaq, cəmiyyətdə formalaşan yeni çağırışlara və iqtisadiyyatda baş verən struktur dəyişikliklərinə adekvat uyğunlaşmanı təmin etməkdir. Struktur islahatları ilə yanaşı aparılan kadr islahatları da öz bəhrəsini verir və əhali tərəfindən müsbət qarşılanır. Sosial şəbəkələrdə aparılan müzakirələrdən aydın görünür ki, cəmiyyətin böyük hissəsi ölkə başçısının apardığı kadr siyasəti və islahatından məmnunluq ifadə edir.
Dövr, zaman dəyişir. Heç şübhəsiz, idarəçiliyə münasibət də dəyişir. İdarəçilik nəinki çevik və institusional, eyni zamanda, gələcək üçün hesablanmış da olmalıdır. Cəmiyyətdə həm də bu islahatların bundan sonra da aparılması ilə bağlı sifarişin olduğu hiss edilir. Hakimiyyətin də davranışlarından hiss edilir ki, bütün sahələrdəki islahatların davamı gələcək. Bütün bunların əhalinin sosial vəziyyətinin yaxşılaşdırılması ilə bağlı imzalanan inqilabi sərəncamların fonunda baş verməsi cəmiyyətə əlavə müsbət stimul vermiş olur.
Məhəmmədəli QƏRİBLİ
