24/10/2019 09:29
728 x 90

MQ həmsədrləri ənənəvi ziyanlı yanaşmalarını yenə təkrarladı - atəşkəs pozuntusuna görə tərəflərin məsuliyyəti eyniləşdirildi...

img

ATƏT-in Minsk Qrupunun həmsədrləri iyunun 20-də Vaşinqtonda Azərbaycan və Ermənistanın xarici işlər nazirləri Elmar Məmmədyarov və Zöhrab Mnatsakanyanla keçirdikləri görüşlə bağlı birgə bəyanat yayıblar.

Bəyanatda həmsədrlərin nazirlərlə əvvəlcə ayrılıqda, sonra isə birgə görüşdükləri bildirilir. Qeyd olunur ki, onlar ABŞ dövlət katibinin Avropa və Avrasiya məsələləri üzrə köməkçisi səlahiyyətlərinin icraçısı Filipp Rikeri Dağlıq Qarabağ münaqişəsinin nizamlanması üzrə danışıqların statusu və bölgədəki hazırkı vəziyyət barədə məlumatlandırıblar. Bildirilir ki, ATƏT-in fəaliyyətdə olan sədrinin şəxsi nümayəndəsi Anjey Kaspşik də bu görüşlərdə iştirak edib: "Müzakirələr zamanı tərəflər bölgədə baş verən son hadisələr və nizamlanma prosesinin əsas məsələləri barədə fikir mübadiləsi aparıblar. XİN rəhbərləri vasitəçilərin regiona son səfərləri zamanı təklif etdikləri humanitar və təhlükəsizlik tədbirlərinin həyata keçirilməsi ilə bağlı gözlənti və mövqelərini ifadə ediblər".

Vasitəçilər bəyanatlarında cəbhə zonasında baş verən insan itkisi ilə bağlı təəssüfləndiklərini bildirərək, tərəfləri təkidlə əsaslı danışıqlar üçün sülhə uyğun əlverişli mühitin bərpasından ötrü təcili tədbirlər görməyə çağırıblar. Son vaxtlar cəbhədə insan itkisi ilə nəticələnən insidentlərdən təəssüfləndiklərini bildirən həmsədrlər, tərəfləri substantiv danışıqlara yardım edən sülh mühitinin bərpası üçün təxirəsalınmaz tədbirlər görmək, həmçinin, atəşkəs rejiminə ciddi şəkildə riayət etməyə bağlılıqlarını təsdiq etmək və təmas xətti, beynəlxalq sərhədlər boyunca snayperlərdən istifadə və mühəndis qurğularının quraşdırılması kimi əməllərdən çəkinməyə çağırıblar.

Göründüyü kimi, həmsədrlərin son bəyanatı da əvvəlkilərdən heç nəyi ilə fərqlənmir. Çünki konkretlik yoxdur. Həmsədrlər yenə ümumi sözlərdən istifadə etməklə problemin məsuliyyətini hər iki tərəfin üzərinə qoymağa çağırırlar. Bəyanatda son vaxtlar təmas xəttində baş verən insan tələfatlarından, atəşkəsin mütəmadi pozulmasından narahatlıq ifadə olunsa da, buna səbəb olan amil barədə konkret nəsə danışılmır. Dəqiq olaraq atəşkəsin Ermənistan tərəfindən pozulduğu, ilk olaraq ordumuzun mayorunun onlar tərəfindən açılan atəşlə öldürüldüyü məlum olsa da, bu barədə bəyanatda nəsə qeyd edilmir. Həmsədrlərin son bəyanatı yarımçıq sayıla bilərmi?

  • Akif  Nağı: “Həmsədrlərin birgə bəyanatı həmin laqeydliyi təsdiq edən möhürdür”

Qarabağ Azadlıq Təşkilatının sədri Akif  Nağı “Bakı-Xəbər”ə açıqlamasında bildirdi ki, həmsədrlərin təmsil etdikləri heç bir ölkə bu problemin tezliklə həll edilməsində maraqlı deyil: “Mən bunu yalnız indi deyil, əvvəllər də dəfələrlə bildirmişəm. Eyni zamanda, Vaşinqton görüşündən əvvəl bildirdim ki, ciddi nəticə gözləmirəm. Çünki bu, “qonşudan geri qalma” prinsipi ilə həyata keçirilən görüşlərdir. Yəni həmsədrlər təşəbbüsü əldən verməmək üçün belə fəallığı göstərirlər. Fikir verirsinizsə, Rusiya bir qədər fəallaşan kimi ABŞ-dan tərəflərə görüş təklifi gəlir. Məhz bu, “mən də varam” mövqeyinə görə münaqişənin həllində irəliləyiş nəzərə çarpmır. Həmsədrlərin birgə bəyanatı isə həmin laqeydliyi təsdiq edən möhürdür. Boş söz yığınından ibarət bir sənəddir. Əslində, özləri üçün əhəmiyyətlidir. Çünki atəşkəsin pozulmasından narahatlıq ifadə olunur. Diqqət edin, münaqişənin həllinin göydən asılı vəziyyətdə qalmasından deyil, məhz atəşkəsin pozulmasından. Bu da o anlama gəlir ki, həmsədrləri status-kvonun qorunub saxlanması narahat edir. Belə olmasaydı, onlar atəşkəsi pozanın konkret adını çəkərdilər. Bundan əvvəl də humanitar xarakterli təkliflər veriblər. İstəyirdilər ki, onlara əməl edilsin. Elmar Məmmədyarovun açıqlamasındakı bir məqamı da anlaya bilmədim. Deyir ki, əsgərlər kazarmalara qayıtsa, sülhə nail olmaq mümkündür. Hazırda bu mövqe bizə sərf etmir. Ermənilər də bunu istəyirlər ki, müharibə olmasın. Onlar hər an bilməlidirlər ki, torpaqları qaytarmasalar müharibə olacaq. Müdafiə naziri Zakir Həsənov dedi ki, beynəlxalq şərait müharibəyə başlamağa imkan vermir. Bəli, beynəlxalq təşkilatlara və həmsədrlərə müharibə sərf etmir. Amma bunun üçün alternativ də təklif etmirlər. Nə torpaqları qaytarmağa kömək edirlər, nə də müharibənin başlanmasını istəyirlər. Hesab edirəm ki,  Azərbaycan hakimiyyəti düzgün qərar kimi müharibə yolunu seçməlidir. Başa düşürük ki, çətindir, təzyiqlər çoxdur, amma bunu etməyə məcburuq. Əks halda, həmsədrlərin bu cür passiv fəaliyyəti və məsuliyyətsiz bəyanatları ilə üz-üzə qalacağıq”.

Məhəmmədəli QƏRİBLİ

Son xəbərlər