16/07/2019 12:55
728 x 90

Vaşinqton görüşünə bir neçə saat qalmış Qarabağ prosesinə təxribatı Paşinyan şəxsən törətdi…

“Regionda barıt qoxusunu hiss edən Paşinyan qeyri-adekvat davranışlar nümayiş etdirir”

img

Ermənistanın Baş naziri Nikol Paşinyan Azərbaycan və Ermənistan xarici işlər nazirlərinin  Vaşinqtonda planlaşdırılmış görüşünə bir neçə saat qalmış sülh prosesini “baltalayan” bir açıqlama verib. Onun açıqlamasından məlum olur ki, Baş nazir Qarabağda müharibə istəyir.

N.Paşinyan bəyan edib ki, Qarabağda döyüş istənilən vaxt başlana bilər. O, Azərbaycanı guya nizamlama prosesini konstruktiv danışıqlar məcrasından çıxarmağa çalışmaqda ittiham edib və bildirib ki, Ermənistan bu cəhdlərin qarşısını almalıdır. Qeyd edib ki, Ermənistan silahlı qüvvələri hazırlıq səviyyəsini daim artırmalıdır: "Nə Ermənistan, nə də Dağlıq Qarabağ müharibə istəmir, amma heç kim onları müharibə təhlükəsi ilə qorxuda bilməz və bunu başa düşmək vacibdir”.

Qeyd edək ki, Azərbaycan və Ermənistan xarici işlər nazirlərinin Vaşinqtonda Trampın milli təhlükəsizlik məsələləri üzrə müşaviri Con Boltonun vasitəçiliyi ilə danışıqlarının gündəliyi Azərbaycan və Ermənistan rəhbərlərinin görüşünün hazırlanmasıdır.

Vacib danışıqlar ərəfəsində Nikol Paşinyanın sərt ritorikalı çıxışı göstərir ki, o bunda maraqlı deyil və sülh prosesini pozmaq istəyir. N.Paşinyanın hərəkətləri Azərbaycanın tərəfdar olduğu qarşılıqlı etimadın bərpası üzrə səyləri heçə endirir. Paşinyan bu cür davranışı ilə daha nələrə nail olmaq istəyir?

  • Elşən Həsənov: “Paşinyanın dediklərinin “tərcüməsi” budur ki, onlardan nəsə gözləməyə dəyməz”

Azərbaycan Sosialist Partiyasının sədri Elşən Həsənov qəzetimizə bildirdi ki, Ermənistan Baş naziri Nikol Paşinyanın nazirlərin görüşü ərəfəsində yenidən müharibə bəyanatları ilə çıxış etməsi həmin ölkənin qeyri-konstruktivliyindən xəbər verir: “Çox maraqlıdır ki, o özlərinin əməllərini Azərbaycanın üzərinə yıxmaq istəyib. Bizi danışıqları konstruktiv məcradan çıxarmaq cəhdində ittiham edərək Qarabağda hər an hərbi əməliyyatların başlaya biləcəyini bəyan edib. Görüş ərəfəsində Ermənistan hökumətinin rəhbərinin belə bir bəyanatla çıxış etməsi onların psixoloji üstünlük qazanmaq istəməsinə dəlalət edir. Ermənistan rəhbərinin bu ritorikası münaqişənin nizamlanması prosesinə dair danışıqlarda hansısa nəticənin əldə olunacağı şansını daha da azaldır. Görüşün məhz Boltonun vasitəçiliyi ilə keçiriməsinə ümidli yanaşanlar da var.  Ancaq bunu ciddi arqument olaraq qəbul etmirəm. Çünki ötən ilin sonlarında Boltonun Cənubi Qafqaz regionu ölkələrinə, xüsusilə Ermənistanda hakimiyyət dəyişikliyindən sonra səfərindən sonra səsləndirdiyi bəyanatlar Dağlıq Qarabağ münaqişəsinin həllində ən azı irəliləyişin baş verəcəyinə ümid yaratsa da, keçən müddət ərzində münaqişənin həllində heç bir dəyişiklik olmadı. Paşinyanın məhz müharibə ilə bizi hədələməsi də təsadüfi deyil. Çünki bilir ki, artıq vəziyyət ona doğru gedir. Nəticəsiz danışıqlar sona qədər davam edə bilməz. Azərbaycanın haqqı var ki, hərbi əməliyyatlarla torpaqlarını işğaldan azad etsin. Artıq regionda barıt qoxusunu  hiss edən Paşinyan qeyri-adekvat davranışlar nümayiş etdirir, öz psixoloji durumuna uyğun şəkildə açıqlamalar verir. Paşinyanın dediklərinin “tərcüməsi” budur ki, onlardan nəsə gözləməyə dəyməz. Hesab edirəm ki, Azərbaycan Paşinyanın nazı ilə çox oynamamalıdır. Bu cür adamı yalnız güc yolu ilə başa salmaq mümkündür. Ölkəmiz təcili şəkildə ərazilərinin işğaldan azad edilməsi üçün antiterror əməliyyatına başlamalıdır”.

Məhəmmədəli QƏRİBLİ

Son xəbərlər