İyunun 23-də İstanbul Böyükşəhər Bələdiyyəsinə keçiriləcək seçki ilə bağlı sensasion iddialar səsləndirilir. Bu iddialardan biri də CHP namizədi Əkrəm İmamoğlunun yol verdiyi nöqsanlara görə seçkinin baş tutmaması və Cümhur İttifaqının namizədi Binəli Yıldırımın bələdiyyə sədri təyin edilməsidir. Buna başlıca səbəb kimi İmamoğlunun Ordu valisi Səddar Yavuza “it” deməsinə görə qaldırılmış məhkəmə iddiası göstərilir. CHP namizədi israrla “Mən “vali itlik edib” yox, “bəsitlik edib” fikrini səsləndirdim” deyərək, iddiaları rədd edib. Sözügedən anın görüntüləri “YouTub” şəbəkəsində yayılıb. CHP tərəfi bunun montaj olduğunu deyib.
Tərəflərin iddialarına rəğmən, yekun qərarı Ordu Prokurorluğu verəcək.
Seçkilərlə bağlı daha bir sensasion məqam isə Əkrəm İmamoğlu ilə Binəli Yıldırım arasında baş tutan debatdan öncə İmamoğlunun debatın moderatoru İsmayıl Küçükkaya ilə “Mərmərə oteli”ndə bir araya gəlməsi haqda səsləndirilən fikirlərdir. Məlumata görə, moderatorla İmamoğlu arasındakı gizli görüş debatdan iki gün əvvəl baş tutub. Məxfi şəraitdə keçən bu görüşün 46 dəqiqə davam etdiyi bildirilib. Hətta Türkiyə Prezidenti Rəcəb Tayyib Ərdoğan da bildirib ki, debatda ədalət prinsipi qorunmayıb.
Bütün bunlar İstanbul Böyükşəhər Bələdiyyəsinə keçiriləcək seçkinin ləğv edilməsi məsələsini gündəmdə saxlayır. Təbii ki, bütün bunların mümkünsüz olduğunu sayanlar da var. Türkiyədəki siyasi dairələrdə belə fikir səslənir ki, hakim partiya bütün bu bəhanələri seçkini ləğv edib, Binəli Yıldırımı bələdiyyə sədri elan etmək üçün edir. Qeyd edək ki, bundan əvvəlki və İmamoğlunun qələbəsini rəsmiləşdirən yekun seçki nəticələri də ləğv edilib. Görünən budur ki, AKP nəyin bahasına olursa-olsun, seçkinin taleyini öz xeyrinə həll etmək istəyir.
Qabil Hüseynli: “Nəyin bahasına olursa-olsun, seçkinin nəticəsini öz xeyirlərinə dəyişmək istəyirlər”
Yaranmış vəziyyəti “Bakı-Xəbər”ə şərh edən politoloq Qabil Hüseynlinin sözlərinə görə, ortaya atılan bu cür cılız arqumentlər seçkinin ləğvi üçün əsas ola bilməz: “İddialardan biri debatın təşkilatçısı olan jurnalistlə İmamoğlunun görüşməsi ilə bağlıdır. AKP deyir ki, 30 dəqiqə söhbət ediblər. Qarşı tərəf isə bu görüşün təsadüfən, otelin foyesində baş tutduğunu deyir. Bu görüşün olması belə nəyisə dəyişən deyil. Televiziya jurnalistinin tam hüququdur ki, istənilən şəxslə görüşüb, fikir mübadiləsi aparsın. Aydın şəkildə görünür ki, verilişin moderatoru MİT-in oyununda yer alıb. Çünki qabaqcadan həmin ərazi müşahidə altına götürülüb. Vali ilə olan insidentdə də İmamoğlunun ciddi günahı yoxdur. VİP salonundan keçdiyi üçün vali onu oradan qovub. Adam, faktiki olaraq, İstanbulun bələdiyyə başqanı vəzifəsini daşıyır. Onun həmin imtiyazdan istifadə etmək kimi hüququ var. Yaranmış vəziyyətə İmamoğlu öz etirazını bildirib. İddia edirlər ki, guya ona it deyib. Amma məlum olur ki, İmamoğlu əsəbiləşib “itilin gedin o tərəfə” kimi ifadə işlədib. Bunların arasında fərq çoxdur. Görünən budur ki, rəy sorğularında böyük fərqlə İmamoğlu liderlik edir. Onlar bilirlər ki, ikinci turda İmamoğlu tam üstünlüklə qələbə çalacaq. Bu səbəbdən nəyin bahasına olursa-olsun, seçkinin nəticəsini öz xeyirlərinə dəyişmək istəyirlər. Hesab edirəm ki, bunun baş tutacağı təqdirdə Türkiyə üçün yaxşı olmaz. İkincisi isə xalq buna imkan verməz. Zorla bu addım atılarsa, onda Türkiyə bütün dünyada biabır olar. Hətta deyərdim ki, sanksiyalarla üzləşə bilər”.
Məhəmmədəli QƏRİBLİ
