14/11/2019 10:52
728 x 90

Beynəlxalq Hərbi Tibb Komitəsinin Nizamnaməsinə qoşulmaq Azərbaycana nə verəcək…

img

Məlum olduğu kimi, Müdafiə, təhlükəsizlik və korrupsiya ilə mübarizə komitəsinin iclasında "Beynəlxalq Hərbi Tibb Komitəsinin Nizamnaməsi"nə qoşulmaq haqqında" qanun layihəsinə baxılıb. Bu barədə Milli Məclis sədrinin birinci müavini, komitənin sədri Ziyafət Əsgərov parlamentdə çıxışı zamanı deyib.

O qeyd edib ki, sənəd Azərbaycanın maraqlarına tam uyğundur: “I Dünya Müharibəsindən sonra təsis olunan bu qurum müxtəlif ölkələrin hərbi tibb xidmətləri arasında əməkdaşlıq əlaqələri yaratmaq məqsədi daşıyıb. Həm müharibə şəraitində, həm də sülh dövründə əməkdaşlıq vasitəsilə ölkələrin qarşılıqlı olaraq bir-birinin təcrübəsindən bəhrələnməsi vacib bilinib. 1920-ci ildə ABŞ Tibb Xidməti Zabitlər Assosiasiyasının toplantısında bu məsələnin nizamlanması təklif edilib. Belçika hökuməti konsepsiyanın praktiki inkişafını dəstəkləyib və 1921-ci ildə Brüsseldə 1-ci Beynəlxalq Hərbi Tibb və Əczaçılıq Konqreslərinin Daimi Komitəsinin əsası qoyulub.

Fəaliyyətə başladığı gündən etibarən Daimi Komitə "missiyası sülh və ya münaqişə zamanı silahlı qüvvələrin xəstə və yaralı heyətinin qayğısına qalmaq, onların vəziyyətini yaxşılaşdırmaq və ağrılarını azaltmaq yollarını araşdırmaqdan ibarət olan dünya üzrə şəxslər arasında davamlı peşəkar əməkdaşlıq əlaqələrini qoruyub saxlamaq və gücləndirmək" məramı ilə çalışıb. Bütün bunlar müharibə qurbanlarının müdafiəsinə dair Cenevrə Konvensiyasının prinsiplərinə və ruhuna da uyğundur”.

  • Şair Ramaldanov: “Azərbaycan həmin komitəyə qoşulmaqla beynəlxalq təcrübə yerli mütəxəssislərə öyrədiləcək”

Azərbaycanın Beynəlxalq Hərbi Tibb Komitəsinin Nizamnaməsinə qoşulmasının əhəmiyyəti barəsində danışan hərbi ekspert, ehtiyatda olan polkovnik Şair Ramaldanov “Bakı-Xəbər”ə açıqlamasında qeyd etdi ki, Hərbi Tibb Komitəsinin özünəməxsus inkişaf  yolu, məlumat bazası olur: “Hərbi-tibbi sahə səhiyyənin digər sektorlarından seçilir. Bəllidir ki, müharibə zamanı iştirakçılar müxtəlif dərəcəli yara alır. Yaralıların həmin ərazidən qısa zamanda təxliyyə olunmasını hər adam edə bilməz. Yaralıların xəsarət almadan həmin ərazidən uzaqlaşdırılması ilə sırf peşəkarlar məşğul olmalıdırlar. Nəzərə almaq lazımdır ki, Azərbaycan müharibə şəraitində olan ölkədir. Yaralılara tibbi xidmətin göstərilməsi ilə bağlı Azərbaycanın özünəməxsus təcrübəsi var. Qarabağ uğrunda gedən döyüşlərdə Azərbaycanın bu sahədə təcrübəsinin olması beynəlxalq ictimaiyyətə də bəllidir. Bununla yanaşı, Azərbaycan həmin komitəyə qoşulmaqla beynəlxalq təcrübə yerli mütəxəssislərə öyrədiləcək”.

Həmsöhbətimiz onu da vurğuladı ki, tibb sektoru günü-gündən inkişaf edir. Tibbi avadanlıqlar da mütəmadi olaraq dəyişir: “Həkimlərimiz hərbi-tibbi avadanlıqların hər bir detalı haqqında məlumatlı olacaqlar. Bununla yanaşı, Azərbaycan Ordusunun peşəkar həkimlərlə təmin olunmasına ehtiyac var”.

Günel CƏLİLOVA

Son xəbərlər